រាជធានីភ្នំពេញ ៖ ជនសង្ស័យម្នាក់ ត្រូវបានប្រជាពលរដ្ឋឃាត់ខ្លួនប្រគល់ឲ្យនគរបាល ចំណែកបក្ខពួក២នាក់ទៀត មានសំណាងបានរត់គេចខ្លួនរួច ក្រោយពេលពួកនេះ ធ្វើសកម្មភាពលួចយកម៉ូតូសណ្ដោងរ៉ឺម៉ក ១គ្រឿង ហើយខណៈពេលកំពុងជិះយកគេចខ្លួន ត្រូវបានម្ចាស់តាមរកឃើញ ក៏ស្រែកឆោឡោ បង្កការភ្ញាក់ផ្អើលដល់ប្រជាពលរដ្ឋជួយឡោមព័ទ្ធចាប់ ។
ហេតុការណនោះបានកើតឡើងកាលពីវេលាម៉ោង០៥និង៥០នាទីព្រឹកថ្ងៃទី២៤ ខែកញ្ញា ឆ្នាំ២០២៦ នៅតាមមហាវិថីចោមចៅ(ផ្លូវវ៉េងស្រេង) ស្ថិតនៅចំណុចមុខហាងកាហ្វេមួយកន្លែង ក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យដែលត្រូវចាប់ខ្លួននោះឈ្មោះ សោម វណ្ណៈ ភេទប្រុសអាយុ៣៣ឆ្នាំ ជនជាតិខ្មែរ មានមុខរបរ និងការស្នាក់នៅមិនពិតប្រាកដ ដោយឡែកបក្ខពួក ដែលរត់គេចខ្លួនបាត់ម្នាក់ឈ្មោះ អាក្លូ អាយុប្រមាណ៤០ឆ្នាំ និងម្នាក់ទៀតឈ្មោះ អាយឺត អាយុប្រមាណ៣៣ឆ្នាំ ស្នាក់នៅពុំពិតប្រាកដ ។
ក្រោយពេលឃាត់ខ្លួនជនសង្ស័យខាងលើ នគរបាលបានដកហូតសម្ភារមួយចំនួន មានដូចជា៖ ដែកចុងស្រួចសម្រាប់កាច់កម៉ូតូចំនួន០២ដើម, សោចិញ្ចៀន០១ដើម, កូនកន្ត្រៃ០១ដើម, សោម៉ូតូ០១, ទូរសព្ទ ០១គ្រឿងម៉ាក HONORពណ៌ខ្មៅ។ ម៉ូតូ០១គ្រឿង ម៉ាក HONDA DREAM C125 ពណ៌ខ្មៅ ផលិតឆ្នាំ២០២៦ ពាក់ស្លាកលេខ ភ្នំពេញ 1MS-1688 និងម៉ូតូ០១គ្រឿងទៀត ម៉ាកHonda ពណ៌ខ្មៅ ពាក់ស្លាកលេខ តាកែវ 1F-4931(របស់ជនសង្ស័យ សម្រាប់ជិះធ្វើសកម្មភាព)។ កន្ទុយរ៉ឺម៉ក០១គ្រឿង គ្មានស្លាកលេខជារបស់ជនរងគ្រោះ ដែលជនសង្ស័យដោះទុកចោល រួចយកម៉ូតូ០១គ្រឿង ម៉ាក Yamaha Sirius ពណ៍ខៀវ គ្មានស្លាកលេខទៅបាត់ ។
បុរសដែលជាម្ចាស់ម៉ូតូសណ្ដោយរ៉ឺម៉កខាងលើឈ្មោះ លួន នីន អាយុ៤៦ឆ្នាំ ជនជាតិខ្មែរ មុខរបររត់រឺម៉ក ស្នាក់នៅផ្ទះជួលភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ ។
សមត្ថកិច្ច បានប្រាប់ឲ្យដឹងថា នៅមុនពេលកើតហេតុបុរសឈ្មោះ លួន នីន បានជិះម៉ូតូ មាកYAMAHA SIRIUS ពណ៌ខៀវ គ្មានស្លាកលេខសណ្ដោងរ៉ឺម៉ក ១គ្រឿង ចេញពីផ្ទះនៅក្នុងភូមិត្រពាំងថ្លឹង៣ សង្កាត់ចោមចៅទី១ ទៅផឹកការហ្វេនៅក្នុងភូមិត្រពាំងថ្លឹង៤ សង្កាត់ចោមចៅទី១ ខណ្ឌពោធិ៍សែនជ័យ។ លុះពេលទៅដល់បានទុកម៉ូតូសណ្ដោងរ៉ឺម៉កខាងលើ នៅខាងមុខហាងការហ្វេរួចហើយដើរចូលទៅអង្គុយផឹកការហ្វេជាធម្មតា ហើយបន្ទាប់ពីផឹករួច ដើរចេញពីហាងការហ្វេវិញ ស្រាប់តែចោរលួចទាំងម៉ូតូ និងកន្ទុយរ៉ឺម៉កទៅបាត់ ពេលនោះ គាត់បានរត់ទៅសួរអ្នកជិតខាងថា មានឃើញនរណា យកម៉ូតូសណ្តោងរ៉ឺម៉ករបស់គាត់ ឬអត់ ?
សមត្ថកិច្ច បានប្រាប់ឲ្យដឹងបន្តថា ប៉ុន្តែអ្នកនៅជិតនោះប្រាប់ថា មិនបានឃើញទេ បន្ទាប់មកម្ចាស់ម៉ូតូសណ្ដោងរ៉ឺម៉ករូបនោះ ក៏បានរត់ទៅខ្ចីម៉ូតម្ចាស់ហាងការហ្វេ ដើម្បីជិះទៅរកម៉ូតូសណ្តោងរ៉ឺម៉ករបស់ខ្លួន។ លុះពេលទៅដល់ត្រង់ចំណុចខាងមុខផ្សារទួលពង្រ ស្ថិតនៅភូមិត្រពាំងរំចេក សង្កាត់ចោមចៅទី១ ខណ្ឌពោធិ៍សែនជ័យ ក៏ឃើញកន្ទុយរ៉ឺម៉ក ត្រូវចោរទុកចោលនៅទីនោះ ហើយបាត់មិនឃើញម៉ូតូឡើយ ។
សមត្ថកិចខាងលើ បានប្រាប់បន្តថា ខណៈនោះគាត់ក៏ជិះម៉ូតូទៅតាមរកម៉ូតូរបស់ខ្លួនបន្តទៀត ដោយរកមិនឃើញ ក៏ជិះម៉ូតូត្រលប់ទៅកន្លែងទីតាំងដែលប្រទះឃើញកន្ទុយរ៉ឺម៉កនៅចំណុចខាងមុខផ្សារទួលពង្រវិញ ស្រាប់តែឃើញជនសង្ស័យ និងបក្ខពួកកំពុងតែលើកកន្ទុយរ៉ឺម៉កនោះ បំពាក់លើម៉ូតូរបស់ខ្លួន ដើម្បីអូសចេញគេចខ្លួន។ ពេលនោះគាត់ (ម្ចាស់រ៉ឺម៉កម៉ូតូ) ក៏បានស្រែកឆោឡោ និងរត់ចូលចាប់ ហើយដោយមានប្រជាពលរដ្ឋជួយផង ក៏ចាប់បានជនសង្ស័យម្នាក់ឈ្មោះ សោម វណ្ណៈ ចំណែកបក្ខពួកឈ្មោះអាក្លូ និងឈ្មោះអាយឺត បានយកម៉ូតូនោះ ជិះរត់គេចខ្លួនបាត់អស់ ។
បន្ទាប់មក ជនរងគ្រោះ ក៏បានប្រគល់ជនសង្ស័យឲ្យប៉ុស្តិ៍នគរបាលរដ្ឋបាលចោមចៅទី១ ដើម្បីសាកសួរ និងកសាងសំណុំរឿងបញ្ជូនទៅផ្នែកជំនាញព្រហ្មទណ្ឌ នៃអធិការដ្ឋាននគរបាលខណ្ឌពោធិ៍សែនជ័យ ចាត់ការបន្តតាមនីតិវីធីច្បាប់ ៕
ចែករំលែកព័តមាននេះ