រដ្ឋធានីវ៉ាស៊ីនតោន ៖ នាល្ងាចថ្ងៃទី២៤ ខែកញ្ញា ឆ្នាំ២០២៦ (ម៉ោងនៅសហរដ្ឋអាមេរិក) ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ព្រមទាំងស្ត្រីទី១អាមេរិក លោកស្រី មេឡានី ត្រាំ (Melania Trump) បានរៀបចំពិធីលៀងសាយភោជន៍ផ្លូវការមួយនៅសេតវិមាន ដើម្បីស្វាគមន៍ប្រធានាធិបតីចិន លោក ស៊ី ជីងពីង (Xi Jinping) និងស្ត្រីទី១ចិន លោកស្រី ផេង លីយ័ន (Peng Liyuan)។
ក្រៅពីវត្តមានមន្ត្រី អ្នកមុខអ្នកការនៃប្រទេសទាំងពីរហើយនោះ ពិធីដ៏ឱឡារិកនេះ ក៏មានការចូលរួមពីមហាសេដ្ឋីកំពូលជាច្រើនរូប ដែលគ្រប់គ្រងក្រុមហ៊ុនបច្ចេកវិទ្យាមានតម្លៃបំផុតលើពិភពលោក ក្នុងនោះរួមទាំងលោក អេឡុន ម៉ាសក៍ (Elon Musk) មហាសេដ្ឋីសញ្ជាតិអាមេរិក បច្ចុប្បន្នជាបុគ្គលមានបំផុតលើពិភពលោកផងដែរ។
យោងតាមការប៉ាន់ប្រមាណរបស់ទស្សនាវដ្តី Forbes បានឱ្យដឹងថា ទ្រព្យសម្បត្តិសរុបរបស់បណ្តាបុគ្គលឥទ្ធិពលផ្នែកបច្ចេកវិទ្យា ដែលបានចូលរួមក្នុងពិធីនៅសេតវិមាននេះ មានចំនួនជាង ២,៤ ទ្រីលានដុល្លារអាមេរិកឯណោះ។
ជាការកត់សម្គាល់ ជិត ៤០% នៃចំនួនដ៏មហាសាលនេះ ជាកម្មសិទ្ធិរបស់លោក អេឡុន ម៉ាសក៍ ជាមួយទ្រព្យសុទ្ធប្រមាណដល់ទៅ ៩២៧,៩ ពាន់លានដុល្លារ។ បុគ្គលល្បីបន្តបន្ទាប់ពីទៀត ស្ថាបនិកក្រុមហ៊ុន Amazon លោក Jeff Bezos មហាសេដ្ឋីលំដាប់ទី២ពិភពលោក ជាមួយទ្រព្យសម្បត្តិ ៣៦៩,៣ ពាន់លានដុល្លារ។
មហាសេដ្ឋីមានបំផុតលំដាប់ទី៤ និងទី៥ ពិភពលោក នាយកប្រតិបត្តិក្រុមហ៊ុន Meta លោក Mark Zuckerberg មានចំនួន ២៦៦,៤ ពាន់លានដុល្លារ និងនាយកប្រតិបត្តិក្រុមហ៊ុន Dell Technologies លោក Michael Dell មានចំនួន ២៦៥,៤ ពាន់លានដុល្លារក៏មានវត្តមាននៅទីនោះផងដែរ ក្នុងចំណោមកំពូលនាយកប្រតិបត្តិបច្ចេកវិទ្យាជាច្រើនរូបផ្សេងទៀត។
អ្វីដែលគួរឱ្យកត់សម្គាល់នោះ បញ្ជីឈ្មោះភ្ញៀវកិត្តិយសមិនមានរួមបញ្ចូលថ្នាក់ដឹកនាំធុរកិច្ចចិនណាម្នាក់ឡើយ។ បើតាមប្រភពព័ត៌មានពីទីភ្នាក់ងារសារព័ត៌មាន AP បានឱ្យដឹងថា មន្ត្រីអាមេរិក និងចិនធ្លាប់បានពិភាក្សាគ្នាអំពីការបញ្ចូលថ្នាក់ដឹកនាំក្រុមហ៊ុនចិនល្បីៗមួយចំនួនទៅក្នុងបញ្ជីឈ្មោះភ្ញៀវដែរ។
ទោះយ៉ាងណាក៏ដោយ ការចរចាជួបប្រទះឧបសគ្គ ដោយសារភាគីអាមេរិកមានភាពយឺតយ៉ាវក្នុងការផ្តល់បទប្បញ្ញត្តិ និងការបញ្ជាក់ឱ្យបានច្បាស់លាស់អំពីតួនាទីនាយកប្រតិបត្តិចិន កំឡុងពេលបំពេញទស្សនកិច្ចនោះ។ គិតមកទល់ពេលនេះ សេតវិមានមិនទាន់ឆ្លើយតបទៅនឹងសំណើសុំការអត្ថាធិប្បាយជុំវិញ ការអវត្តមានថ្នាក់ដឹកនាំធុរកិច្ចចិននៅឡើយទេ៕ ប្រភព ៖ Znews
ចែករំលែកព័តមាននេះ