ខេត្តសៀមរាប៖ ភ្លៀងធ្លាក់ជាប់ៗគ្នាជាច្រើនថ្ងៃ​លាយឡំផ្គររន្ទះ និងខ្យល់កន្ត្រាក់ បានបណ្តាលឱ្យមានការលិចលង់ផ្ទះសម្បែង ដំណាំ ផ្លូវថ្នល់ ព្រមទាំងបាក់រលំដើមឈើ និងដាច់​ប្ញសជាច្រើនកន្លែង​ក្នុងក្រុងសៀមរាប ដែលធ្វើឱ្យប៉ះពាល់ដល់ការធ្វើដំណើរ និងការរក​ស៊ីរបស់ប្រជាពលរដ្ឋ ។

ជុំវិញបញ្ហានេះ រដ្ឋបាលក្រុង និងតាមបណ្តាសង្កាត់នីមួយៗ ដោយមានកិច្ចសហការជា​មួយរដ្ឋបាលខេត្ត បានដាក់ពង្រាយកម្លាំងប្រជាការពារ និងមន្ត្រីជំនាញចុះអន្តរាគមន៍ជាបន្ទាន់ ដូចជាការកាយប្រឡាយរំដោះទឹក និងកាប់ដើមឈើដែលរលំ ឬងាប់ដើម្បីធានាសុវត្ថិភាពដល់ការធ្វើដំណើរ។

បើតាមប្រសាសន៍របស់ លោក ឡូយ មករា ចៅសង្កាត់រងសាលាកំរើក បានឱ្យដឹងនៅរសៀលថ្ងៃទី២៥ ខែកញ្ញា ឆ្នាំ២០២៦ នេះថា អាជ្ញាធរបានចុះកាប់ និងកាត់តម្រឹមដើមឈើចំនួន​៤​ទីតាំងសំខាន់ៗក្នុងសង្កាត់ រួមមាន៖

ទី១៖ កាប់ដើមឈើងាប់ដើម្បីបង្ការគ្រោះថ្នាក់ នៅចំណុចមាត់ស្ទឹងសៀមរាប ក្នុងភូមិវត្តបូព៌។

ទី២៖ កាប់បង្ការដើមឈើងាប់ នៅចំណុចផ្លូវក្រោយវត្តស្វាយ ភូមិសាលាកំរើក។

ទី៣៖ កាត់ឈើដែលដួលរលំដល់ដី នៅចំណុចផ្លូវសាលាខៀវ ជិតការ៉ាស់សាំងម្លប់ជ្រៃ ភូមិសាលាកំរើក។

ទី៤៖ កាប់បង្ការដើមឈើងាប់ នៅចំណុចផ្លូវសាលាខៀវ ជិតសណ្ឋាគារអមតៈ។

ចំណែកឯ លោក ហាយ យ៉ង់ អភិបាលរងក្រុងសៀមរាប​បានឱ្យដឹងដែរថា ជំនន់ទឹកភ្លៀង​នេះ បានបង្កការលិចលង់ផ្ទះសម្បែង និងផលដំណាំប្រជាពលរដ្ឋរីករាលដាលដល់ ៧ សង្កាត់ រួមមាន៖ សង្កាត់គោកចក, សង្កាត់សៀមរាប, សង្កាត់ជ្រាវ, សង្កាត់ទឹកវិល, សង្កាត់ស្រង៉ែ, សង្កាត់ស្វាយដង្គំ និងសង្កាត់ក្របីរៀល ។

បច្ចុប្បន្ន អាជ្ញាធរកំពុងសហការជាមួយមន្ត្រីអាជ្ញាធរជាតិអប្សរា ដើម្បីប្រើប្រាស់គ្រឿងចក្រ (អេស្កាវ៉ាទ័រ) កាយបើកច្រកទឹកហូរចេញទៅកាន់ស្រុកផ្សេងៗ ដើម្បីបញ្ចៀសការលិចលង់កាន់តែខ្លាំងក្នុងក្រុងសៀមរាប ៕