សន្ទុះទឹកស្ទឹងសង្កែបានហក់ឡើងខ្លាំង ចំកណ្ដាលបេះដូងក្រុងបាត់ដំបងឈានដល់ការប្រកាសអាសន្នហើយ
- បាត់ដំបង
ខេត្តបាត់ដំបង ៖ កម្ពស់ទឹកស្ទឹងសង្កែ បានហក់ឡើងយ៉ាងខ្លាំង គិតត្រឹមម៉ោង១ និង៣០នាទីរសៀលថ្ងៃទី២៥ កញ្ញា នេះ កម្ពស់ទឹកបានហក់ឡើងដល់កម្រិត១៣.៩៣ម៉ែត្រ នៅចំកណ្ដាលបេះដូងក្រុងបាត់ដំបងតែម្ដង ។ នេះបើតាមការផ្ដល់ព័ត៌មានបឋមដោយប្រធានមន្ទីរធនធានទឹក និងឧតុនិយមខេត្ត ។
ប្រធានមន្ទីរធនធានទឹក និងឧតុនិយមខេត្ត លោក ខៃ សុដា បានប្រាប់កោះសន្តិភាពនៅរសៀលថ្ងៃទី២៥ កញ្ញា នេះថា សន្ទុះទឹកស្ទឹងសង្កែ បានហក់ឡើងយ៉ាងខ្លាំងនៅរសៀលថ្ងៃនេះ ។ បើគិតត្រឹមម៉ោង១ និង៣០នាទីរសៀលថ្ងៃទី២៥ កញ្ញា កម្ពស់ទឹកស្ទឹងសង្កែ នៅក្នុងក្រុងបាត់ដំបង បានហក់ឡើងដល់កម្រិត១៣.៩៣ម៉ែត្រ ដែលជាកម្រិតប្រកាសអាសន្នឲ្យមានការប្រុងប្រយ័ត្នខ្ពស់បំផុត ។
ជាមួយគ្នានេះ គេឃើញ នៅតំបន់«ផ្សារបឹងឈូក»ក្នុងក្រុងបាត់ដំបង បាននិងកំពុងរងកម្មធ្ងន់ធ្ងរជាងគេ ដោយជំនន់ទឹកភ្លៀងនេះ ព្រោះជាតំបន់ទំនាប ។ សន្ទុះទឹកបាននិងកំពុងបែកធ្លាយហូរចេញពីដងស្ទឹងតាមប្រព័ន្ធលូនានា ចូលទៅកាន់តំបន់ទំនាប «ផ្សារបឺងឈូក» រីឯលើកំណាត់ផ្លូវមួយចំនួនទៀត ក៏កំពុងប្រឈមនឹងការលិចលង់ជាបន្តបន្ទាប់គ្នាដែរ ។ បើតាមក្រុមអាជីករបានប្រាប់ថា ជំនន់ទឹកភ្លៀងដែលហូរហៀចេញពីដងស្ទឹង បានចាប់ផ្ដើមនៅម៉ោង១២ថ្ងៃត្រង់ ឥឡូវកំពុងហូរបុកចូលតំបន់ផ្សារកាន់តែខ្លាំងឡើងៗ ហើយ ធ្វើឲ្យក្រុមអ្នកលក់ដូរមួយចំនួនរើតូប រើហឹងទៅរកទីទួលខ្ពស់មានសុវត្ថិភាពជាបណ្ដើរៗហើយ ។ ក្រៅពីតំបន់ផ្សារបឹងឈូក ដែលស្ថិតចំកណ្ដាលបេះដូង ក្រុងបាត់ដំបង នៅតាមបណ្ដាស្រុកនានា ដែលមានភូមិសាស្ត្រ ជាប់នឹងដងស្ទឹងសង្កែ ក៏កំពុងប្រឈមនឹងការលិចលង់ដោយជំនន់ទឹកភ្លៀងដ៏អាក្រក់នេះដែរ ។
តំបន់ខ្លះទឹកហូរឆ្លងកាត់ផ្លូវ ឆ្លងកាត់លើស្ពាន លិចផ្ទះសម្បែងប្រជាពលរដ្ឋ សាលារៀន និងលិចផលដំណាំ ។ល។ និង។ល។ អាជ្ញាធរមូលដ្ឋាន បាននិងកំពុងប្រឹងប្រែងតាមដាន និងចុះពិនិត្យជាក់ស្ដែងយ៉ាងសកម្មនៅតាមមូលដ្ឋាន និងគ្រប់ស្ថានភាពទឹកជំនន់នេះ ប៉ុន្តែគេពុំទាន់មានរបាយការណ៍ជាក់លាក់ស្ដីពី «ស្ថានភាពទឹក ឬគ្រោះមហន្តរាយ» នៅឡើយទេ ។
លោក ខៃ សុដា ប្រធានមន្ទីរធនធានទឹក និងឧតុនិយមខេត្តបាននិយាយថា ពេលនេះទ្វារទឹក «ទំនប់ពហុបំណង បាត់ដំបង» ដែលជាអាងស្ដុកទឹកដ៏ធំសម្បើមនៃដងស្ទឹងសង្កែ បានបើកទ្វារទម្លាក់ទឹកប្រហែល៨០% ប៉ុន្តែទ្វារទឹក«កង្ហត» នៅក្នុងស្រុកបាណន់ និងទ្វារទឹក «ទំនប់សាលាតាអន»នៅប៉ែកខាងក្រោម ក្នុងស្រុកឯកភ្នំ បានបើកទាំងអស់ ដើម្បីរំលស់ទឹកពីដងស្ទឹង ដែលកំពុងមានសន្ទុះខ្លាំង នៅកណ្ដាលក្រុងបាត់ដំបង ។ លោកប្រធានមន្ទីរធនធានទឹកក៏បានព្រមានដែរថា កម្រិតទឹកនឹងអាចហក់ឡើងលើសពី១៤ម៉ែត្រក្នុងយប់នេះ ពីព្រោះភ្លៀងនៅតែបន្តធ្លាក់ឥតដាច់ គ្របដណ្ដប់គ្រប់ទិសទី នៃខេត្តបាត់
ដំបង ។
លោកបានបញ្ជាក់ថា ពេលនេះ ជំនន់ទឹកភ្លៀងនៅតាមបណ្ដាអូរព្រែកនានា នៅតំបន់ខាងលើ ជាពិសេសនៅស្រុកសំឡូត និងស្រុករតមណ្ឌលជាដើម បាននិងកំពុងហូរធ្លាក់ចូលដងស្ទឹងសង្កែ ធ្វើឲ្យទឹកស្ទឹងសង្កែ បន្តហក់ឡើងថែមទៀត ។ ដូច្នេះ សូមបងប្អូនប្រជាពលរដ្ឋ ជាពិសេស អ្នករស់នៅតំបន់ទំនាប ឬនៅរស់នៅតាមដងស្ទឹងសង្កែ ត្រូវមានការប្រុងប្រយ័ត្នឲ្យបានខ្ពស់បំផុតចំពោះមនុស្សចាស់ជរា កុមារតូចៗ សម្ភារៈប្រើប្រាស់នានា ក្រែងមានគ្រោះថ្នាក់ដោយសារជំនន់ទឹកស្ទឹង ដោយយថាហេតុ ព្រោះទឹកស្ទឹងសង្កែនឹងហក់ឡើងបន្ថែមទៀតក្នុងយប់នេះ ៕
ចែករំលែកព័តមាននេះ