សុខភាព៖ យោងតាមការចុះផ្សាយពីប្រភពបរទេស មិនមែនមនុស្សគ្រប់គ្នាសុទ្ធតែត្រូវការគេងថ្ងៃទេ។ អ្នកខ្លះមិនងងុយនៅពេលរសៀល ឬមិនអាចគេងលក់នៅពេលថ្ងៃបាន។ ប្រសិនបើអ្នក គេងយប់បានគ្រប់ ភ្ញាក់ឡើងមានកម្លាំង និងមិនងងុយខ្លាំងនៅពេលថ្ងៃ ការមិនគេងថ្ងៃមិនមែនមានន័យថាសុខភាពនឹងខូចនោះទេ។

អ្វីដែលសំខាន់ជាងការគេងថ្ងៃ គឺ ការគេងពេលយប់ឱ្យបានគ្រប់ និងមានគុណភាពល្អ។ មនុស្សពេញវ័យភាគច្រើនគួរគេងប្រហែល ៧ម៉ោង ឬច្រើនជាងនេះក្នុងមួយយប់។ ដូច្នេះ ប្រសិនបើអ្នកមិនគេងថ្ងៃ ប៉ុន្តែគេងយប់បានល្អ និងមានភាពស្រស់ស្រាយក្នុងពេលថ្ងៃ ក៏មិនចាំបាច់បង្ខំខ្លួនឱ្យគេងថ្ងៃឡើយ។

ការបង្ខំខ្លួនឱ្យគេងនៅពេលដែលមិនងងុយ អាចមិនផ្តល់ផលប្រយោជន៍ដល់មនុស្សគ្រប់គ្នាទេ។ ជាពិសេស ការគេងថ្ងៃយូរ ឬគេងនៅពេលរសៀលយឺតពេក អាចធ្វើឱ្យពិបាកគេងនៅពេលយប់។ ដូច្នេះ អ្នកដែលមិនមានទម្លាប់គេងថ្ងៃ អាចជ្រើសរើសសម្រាកស្ងាត់ៗ ផឹកទឹក ឬក្រោកដើរបន្តិច ដើម្បីឱ្យរាងកាយ និងខួរក្បាលបានសម្រាក។

ប៉ុន្តែប្រសិនបើថ្ងៃណាមួយអ្នក គេងយប់មិនគ្រប់ ហត់ខ្លាំង ឬងងុយនៅពេលរសៀល ការគេងខ្លីប្រហែល ២០–៣០នាទីអាចជួយឱ្យមានអារម្មណ៍ស្រស់ស្រាយ និងផ្តោតអារម្មណ៍បានល្អជាងមុន។ គួរគេងនៅដើមរសៀល និងជៀសវាងការគេងយូរ ដើម្បីកុំឱ្យប៉ះពាល់ដល់ការគេងនៅពេលយប់។

សរុបមក មិនគេងថ្ងៃ មិនមែនជារឿងអាក្រក់សម្រាប់សុខភាពទេ ប្រសិនបើអ្នកគេងយប់បានគ្រប់ និងមានកម្លាំងល្អនៅពេលថ្ងៃ។ ចំណុចសំខាន់គឺរក្សាម៉ោងគេងឱ្យបានទៀងទាត់ និងសង្កេតសភាពរាងកាយរបស់ខ្លួន។ ប្រសិនបើតែងតែងងុយខ្លាំង ហត់ ឬត្រូវពឹងលើការគេងថ្ងៃដើម្បីបំពេញការខ្វះដំណេក គួរយកចិត្តទុកដាក់លើគុណភាពនៃការគេងពេលយប់ និងស្វែងរកមូលហេតុឱ្យបានច្បាស់៕