រថយន្តដឹកធ្យូងបុ.កជាមួយរថយន្តដឹកកម្មករ របួ.សធ្ងន់ស្រាលជាង១០នាក់
- កំពង់ស្ពឺ
ខេត្តកំពង់ស្ពឺ ៖ កម្មករ-កម្មការរិនី រោងប្រមាណជាង១០នាក់ បានរងរបួសធ្ងន់ស្រាល ត្រូវបានដឹកយកទៅសង្គ្រោះព្យាបាលនៅមន្ទីរពេទ្យឯកជនមួយកន្លែងក្បែរកន្លែងកើតហេតុ បន្ទាប់ពីជួបគ្រោះថ្នាក់ចរាចរណ៍រវាងរថយន្តកែច្នៃដឹកធ្យូងពេញព្រៀបបុកជាមួយរថយន្តដឹកកម្មកររោងចក្រពីក្រោយ បង្កឱ្យមានការភ្ញាក់ផ្អើលទាំងព្រឹក។
ហេតុការណ៍គ្រោះថ្នាក់ចរាចរណ៍ខាងលើនេះបានបង្កឱ្យភ្ញាក់ផ្អើលកើតឡើងកាលពីវេលាម៉ោង៦និង២០នាទីព្រឹកថ្ងៃទី២១ ខែកញ្ញា ឆ្នាំ២០២៦ នៅតាមបណ្តោយផ្លូវជាតិលេខ៥១ ចន្លោះបង្គោលគីឡូម៉ែត្រលេខ៣១-ទៅលេខ៣២ ត្រង់ចំណុចភូមិអង្គតាឡឹក ឃុំសំបូរ ស្រុកសំរោងទង ខេត្ដកំពង់ស្ពឺ។
នគរបាលស្រុកសំរោងទងបាននិយាយឲ្យដឹងថា នៅមុនពេលកើតហេតុ មានរថយន្ត១គ្រឿងម៉ាកសាំយ៉ុង ពណ៌ស ពាក់ផ្លាកលេខភ្នំពេញ 2AR-7672 (កែច្នៃដឹកធ្យូង ពេញព្រៀប) អ្នកបើកបរមានឈ្មោះ មាស ប៊ុនធូ ភេទប្រុស អាយុ៣១ឆ្នាំរស់នៅក្នុងភូមិត្រពាំងត្រាច ឃុំស្វាយតាយាន ស្រុកកំពង់រោទិ៍ ខេត្តស្វាយរៀង បានបើកបរ តាមបណ្តោយផ្លូវជាតិលេខ៥១ ពីទិសខាងជើងទៅទិសខាងត្បូង លុះពេលធ្វើដំណើរមកដល់ចំណុចកើតហេតុខាងលើបានបុកពីក្រោយរថយន្ត១គ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខភ្នំពេញ 2AH-6524 អ្នកបើកបរឈ្មោះ ស្រី កុសល ភេទប្រុស អាយុ៣២ឆ្នាំ រស់នៅក្នុងភូមិព្រៃជង្រុក ឃុំមានជ័យ ស្រុកសាមគ្គីមុនីជ័យ ខេត្តកំពង់ស្ពឺ ដែលកំពុងបើកបរស្របទិសគ្នា ពីក្រោយពេញទំហឹង ដែលបាន(ដឹកកម្មករ កម្មការរិនីរោងចក្រ ចំនួន៥០នាក់ មានចំនួន២ គឺភូមិកណ្តាល និងភូមិព្រៃជង្រុក) បណ្តាលឱ្យរបួសសរុបចំនួន១២នាក់ ក្នុងនោះមាន ស្រីចំនួន១០នាក់ ជាកម្មកររបស់រោងចក្រ វីលសុនលីតឌើ ខេបូឌាខូអិលធីឌី (សាំងវ៉ូ) ។
នគរបាលស្រុកសំរោងទង បាននិយាយឱ្យដឹងទៀតថា កម្មករដែលរងគ្រោះរូមមាន
ទី១-ឈ្មោះលី ចន្តា ភេទស្រី អាយុ ៤៨ឆ្នាំ
ទី២-ឈ្មោះ លី ស្រីមុំ ភេទស្រី អាយុ ៣៩ឆ្នាំ
ទី៣-ឈ្មោះថន ទៀង ភេទស្រី អាយុ ៤២ឆ្នាំ
អ្នកទាំង៣នាក់ រស់នៅក្នុងភូមិព្រៃជង្រុក ឃុំមានជ័យ ស្រុកសាមគ្គីមុនីជ័យ ខេត្តកំពង់ស្ពឺ
ទី៤-ឈ្មោះវ៉េង ម៉ុន ភេទស្រី អាយុ ៥២ឆ្នាំ
ទី៥-ឈ្មោះសេង អែម ភេទស្រី អាយុ ៣៤ឆ្នាំ
ទី៦-ឈ្មោះសួស សុភាព ភេទស្រី អាយុ ១៩ឆ្នាំ
ទី៧-ឈ្មោះជ័យ ធាវី ភេទស្រី អាយុ ១៨ឆ្នាំ
ទី៨-ឈ្មោះទឿន សុខណា ភេទស្រី អាយុ ១៨ឆ្នាំ
ទី៩-ឈ្មោះទូច ទី ភេទប្រុស អាយុ ១៨ឆ្នាំ
ទី១០-ឈ្មោះលីសេង ណៃហួយ ភេទស្រី អាយុ ៣៥ឆ្នាំ
ទី១១-ឈ្មោះហន វ៉េ ភេទប្រុស អាយុ ២០ឆ្នាំ
និងទី១២-ឈ្មោះពឿន ស្រីអូន ភេទស្រី អាយុ ២៣ឆ្នាំ អ្នកទាំង៩(ប្រាំបួន)នាក់ រស់នៅក្នុងភូមិកណ្តាល ឃុំមានជ័យ ស្រុកសាមគ្គីមុនីជ័យ ខេត្តកំពង់ស្ពឺ។
ក្រោយកើតហេតុ អ្នករងរបួស ត្រូវបានដឹកបញ្ជូនទៅសង្គ្រោះ ព្យាបាលនៅមន្ទីរពេទ្យឯកជនមួយកន្លែង ក្បែរកន្លែងកើត ក្នុងភូមិអង្គតាឡឹក ឃុំសំបូរ ស្រុកសំរោងទង ។
នគរបាលស្រុកសំរោងទង បានបញ្ជាក់ទៀតថា ករណីគ្រោះថ្នាក់ចរាចរណ៍ខាងលើនេះ រងការខូចខាតរថយន្តចំនួន២គ្រឿង កំរិតស្រាល នគរបាលជំនាញបានយករថយន្តទាំង២គ្រឿងទៅរក្សាទុកនៅប៉ុស្តិ៍នគរបាលរដ្ឋបាលឃុំសំបូរ បណ្តោះអាសន្នសិន។
ចំពោះអ្នកបើកបររថយន្តទាំង២នាក់ ត្រូវបាន នគរបាលនាំមកទៅធ្វើការសាកសួរនៅអធិការដ្ឋាននគរបាលស្រុកសំរោងទង៕
ចែករំលែកព័តមាននេះ