រាជធានីភ្នំពេញ ៖ ឡុង សុវណ្ណឌឿន មកពីក្លឹបសាលវ័ន្តកីឡា ចង់សាកកម្លាំងជាមួយសេង មករា មកពីក្លឹបយុវកីឡា នៅលើសង្វៀនស្ថានីយទូរទស្សន៍បាយ័ន នាថ្ងៃសុក្រទី៥ ខែ សីហាខាងមុខនេះ ខណៈ ធិន សុវណ្ណ មកពីក្លឹបកងពលតូចលេខ៧០ ចង់សាកកម្លាំងជាមួយចាន់ សុខហួន អ្នកប្រដាល់ជើងថ្មីមកពីក្លឹបនិរោធមានជ័យ ។
រាជធានីភ្នំពេញ ៖ ឡុង សុវណ្ណឌឿន មកពីក្លឹបសាលវ័ន្តកីឡា ចង់សាកកម្លាំងជាមួយសេង មករា មកពីក្លឹបយុវកីឡា នៅលើសង្វៀនស្ថានីយទូរទស្សន៍បាយ័ន នាថ្ងៃសុក្រទី៥ ខែ សីហាខាងមុខនេះ ខណៈ ធិន សុវណ្ណ មកពីក្លឹបកងពលតូចលេខ៧០ ចង់សាកកម្លាំងជាមួយចាន់ សុខហួន អ្នកប្រដាល់ជើងថ្មីមកពីក្លឹបនិរោធមានជ័យ ។
ឡុង សុវណ្ណឌឿន ជាកីឡាករជើងថ្មីដែលទើបតែលេចមុខនៅលើសង្វៀនមិនយូរប៉ុន្មានឡើយ តែកេរ្តិ៍ឈ្មោះរបស់គេល្បីគួរសម ដោយសារតែជ័យជម្នះជាបន្តបន្ទាប់មកនេះ។ លើកនេះ គេមានបំណងចង់សាកជាមួយអ្នកប្រដាល់ចាស់វស្សាសេង មករា វិញ ព្រោះថា កន្លងមករវាងគេទាំង២នាក់មិនធ្លាប់ប៉ះគ្នាម្តងណាឡើយ ម្យ៉ាងមករា មួយរយៈមកនេះយីអ៊ុនរបស់គេមិនសូវជាល្អប៉ុន្មានទេ មិនតែប៉ុណ្ណោះភាគច្រើនគឺបរាជ័យនៅក្រោមកណ្តាប់ដៃរបស់អ្នកប្រដាល់ជើងថ្មីតែម្តង ។ ចំណែកសុវណ្ណឌឿន ក៏មិនហ៊ានអួតទុកមុនថាយ៉ាងណាដែរ គឺស៊ីសងសាកមើលសិនប៉ុណ្ណោះ ។
ធិន សុវណ្ណ និងចាន់ សុខហួន ក៏មិនធ្លាប់ជួបគ្នាពីមុនមកដែរ ព្រោះថាសុខហួនគ្រាន់តែជាអ្នកប្រដាល់ជើងថ្មីម្នាក់មិនសូវមានប្រវត្តិល្បីល្បាញនៅលើសង្វៀនប៉ុន្មានឡើយ ឯសុវណ្ណ ថ្វីដៃប្រកួតនៅលើសង្វៀនរបស់គេអ្នកណាក៏ទទួលស្គាល់ថាខ្លាំងដែរ ទាំងស្នៀតជើងនិងស្នៀតកណ្តាប់ដៃសុទ្ធតែអាចវាយចេញបានយ៉ាងល្អបំផុត ។ លើកនេះមិនដឹងថា ជើងចាស់ស៊ីជើងថ្មីឬជើងថ្មីស៊ីជើងចាស់នោះទេ ។
ចំណែកណុប សុភា មកពីក្លឹបប៉ោយប៉ែត ជួបមាស សាមឿន មកពីក្លឹបឃ្លាំងមឿងកីឡា ។ អាន មុន្នី មកពីក្លឹបនិរោធមានជ័យ ជួប ពៅ សារ៉ាត់ មកពីក្លឹបវីអាយភីចំការមន ។
រីឯការប្រកួតប្រដាល់ដណ្តើមខ្សែក្រវាត់ខារ៉ាបាវ នៅលើសង្វៀនស្ថានីយទូរទស្សន៍ CTN នាថ្ងៃសុក្រទី៥ ខែសីហាខាងមុខនេះដែរ គឺជាវគ្គប្រកួតជម្រុះវិលជុំក្នុងពូលA នៅក្នុងជុំទី៣ ។ ជ័យ វណ្ណៈ មកពីក្លឹបឃ្លាំងមឿងកីឡា ជួបរាជសីហ៍ បាបា មកពីក្លឹបសម្រែករាជសីហ៍បង្ក្រាបគ្រឿងញៀន រីឯអ៊ឹង បូរ៉ា មកពីក្លឹបសិង្ហកីឡា ជួប ពៅ ស៊ីយ៉េត មកពីក្លឹបក្រុងប៉ោយប៉ែត ។
វណ្ណៈ និងបាបា ធ្លាប់បានឆ្លងកាត់ការប្រកួតមួយលើកម្នាក់រួចមកហើយ ថែមទាំងយកឈ្នះការប្រកួតរៀងៗខ្លួនទៀតផង ។ វណ្ណៈធ្លាប់យកឈ្នះហ៊ុល ដារ៉ា មកពីក្លឹបសាលវ័ន្តកីឡា ដោយពិន្ទុ រីឯបាបា ធ្លាប់យកឈ្នះពៅ ស៊ីយ៉េតដោយពិន្ទុដែរ ដូច្នេះរវាងគេទាំង២នាក់សុទ្ធតែមាន៣ពិន្ទុនៅក្នុងដៃដូចគ្នា ។ លើកនេះគេទាំង២នាក់ជួបគ្នា ហើយទាំងសងខាងសុទ្ធតែចង់ស្វែងរក៣ពិន្ទុបន្ថែមដូចគ្នាទៀត ប៉ុន្តែបើនិយាយពីល្បិចប្រយុទ្ធនៅលើសង្វៀន វណ្ណៈល្អជាងបន្តិចហើយ ជាពិសេសកម្លាំងក៏រឹងមាំណាស់ដែរ។ ចំណែកបាបា ចិត្តរបស់គេហ៊ានគួរសម យ៉ាងហោចណាស់ក៏ធ្វើឱ្យវណ្ណៈវេទនាខ្លះៗដែរ មុននឹងឈ្នះនោះ ។
អ៊ឹង បូរ៉ា និងស៊ីយ៉េត ទើបតែឆ្លងកាត់ការប្រកួតបាន១លើកម្នាក់ដូចគ្នា ប៉ុន្តែបូរ៉ារកបាន៣ពិន្ទុហើយ ដោយសារប្រកួតលើកទី១គេបានវាយផ្តួលធា រិទ្ធី មកពីក្លឹបអេភូថងកីឡាឱ្យសន្លប់នៅទឹកទី៤ ។ ចំណែកស៊ីយ៉េតចាញ់២លើក ទើបតែរកបាន២ពិន្ទុគត់ហើយលើកនេះគេក៏ចង់ស្វែងរក៣ពិន្ទុបន្ថែមទៀតដែរ ប៉ុន្តែមិនដឹងថាទៅរួចជាមួយបូរ៉ាឬអត់ ម្យ៉ាងក្បាច់ប្រយុទ្ធរបស់បូរ៉ាក៏ល្អជាងស៊ីយ៉េត ថែមទៀត ។
ចំណែកគូប្រកួតមិត្តភាព នេន វណ្ណា មកពីក្លឹបកងពលធំអន្តរាគមន៍លេខ៣ព្រះវិហារ ជួបឡុង ចាន់ណាក់ មកពីក្លឹបសាលវ័ន្តកីឡា ។ ប៊ី យីម មកពីក្លឹបភ្នំពេជ្រកីឡា ប្រកួតជាលក្ខណៈសាកល ជាមួយសូ សុជាតិ មកពីក្លឹបតោមាស ៕
ចែករំលែកព័តមាននេះ