រាជធានីភ្នំពេញ ៖ លោក អុល សំអាង បានប្តេជ្ញាចិត្តរក្សាទម្រង់ដើមនៃការសម្តែងល្ខោនបាសាក់របស់ក្រុមលោក បើទោះបីជាបច្ចុប្បន្នទម្រង់សិល្បៈបុរាណមួយនេះ កំពុងស្ថិតនៅក្នុងការកែទម្រង់ខ្លះតាមបច្ចេកទេសក្នុងសម័យទំនើបនាពេលនេះ ។ លោកបញ្ជាក់ថា…
រាជធានីភ្នំពេញ ៖ លោក អុល សំអាង បានប្តេជ្ញាចិត្តរក្សាទម្រង់ដើមនៃការសម្តែងល្ខោនបាសាក់របស់ក្រុមលោក បើទោះបីជាបច្ចុប្បន្នទម្រង់សិល្បៈបុរាណមួយនេះ កំពុងស្ថិតនៅក្នុងការកែទម្រង់ខ្លះតាមបច្ចេកទេសក្នុងសម័យទំនើបនាពេលនេះ ។
លោកបញ្ជាក់ថា បើទោះបីជារយៈពេលប៉ុន្មានឆ្នាំចុងក្រោយនេះ ការសម្តែងល្ខោនបាសាក់បានវិវត្តន៍ពីការសម្តែងវង់ធំ និងជាវង់តូច ឬមធ្យមក៏ដោយ ប៉ុន្តែក្រុមរបស់លោក ក៏នៅតែរក្សាការសម្តែងដោយមិនឲ្យប្រាស់ចាកឆ្ងាយពីទម្រង់ដើមរបស់ល្ខោនបាសាក់នោះឡើយ ។ លោក អុល សំអាង បានអះអាងប្រាប់កោះសន្តិភាពថា សម្រាប់រយៈពេលប៉ុន្មានឆ្នាំចុងក្រោយនេះ ក្រុមរបស់លោកមានការវិវត្តន៍ខ្លាំង ដោយសារតែការសម្តែងមានតាមវត្តអារាមផង សម្តែងឲ្យក្រុមហ៊ុនផង ហើយការសម្តែងទាំងអស់មានទាំងតូច និងមធ្យម ។
លោកបន្តថា ជាក់ស្តែង កាលពីអំឡុងបុណ្យចូលឆ្នាំខ្មែរ ក្រុមរបស់លោកត្រូវបានក្រុមហ៊ុនអញ្ជើញឲ្យទៅសម្តែងតាមខេត្តមួយចំនួន ដែលមានជនភៀសសឹករស់នៅ ដូចជាខេត្តសៀមរាម បន្ទាយមានជ័យ និងឧត្តរមានជ័យជាដើម។ល។
លោកថា បើទោះបីជាការសម្តែងនោះមិនបានធ្វើឡើងមួយយប់ទល់ភ្លឺ និងមានរយៈពេលខ្លីក៏ដោយ ប៉ុន្តែវាជាការចូលរួមផ្សព្វផ្សាយ និងបង្ហាញពីទម្រង់សិល្បៈឲ្យក្មេងៗជំនាន់ក្រោយបានស្គាល់ ជាពិសេស បង្កើតភាពរីករាយនៅក្នុងការទស្សានាពីសំណាក់ប្រជាពលរដ្ឋដែលជាជនភៀសសឹកផងដែរ ។
យ៉ាងណា បើតាមលោក អុល សំអាង ទោះបីការសម្តែងនោះអាចថា ជាការសម្តែងជាទ្រង់ទ្រាយតូច ឬមធ្យមក៏ដោយ ប៉ុន្តែក្រុមរក្សាលោកនៅតែរក្សាទម្រង់ដើម ពោលគឺមិនសម្តែងឲ្យប្រាស់ចាក ឬឃ្លាតចាកឆ្ងាយពីល្ខោនបាសាក់ដែរ ។
លោកបញ្ជាក់ថា ការធ្វើបែបនេះ គឺដើម្បីចូលរួមថែរក្សា និងអភិរក្សនូវទម្រង់ដើមនៃល្ខោនបាសាក់ ហើយជារឿយៗក្រុមរបស់លោកតែងតែតស៊ូ បើទោះបីជាកន្លងក្រុមបានជួបនូវបញ្ញាលំបាកផ្នែកសេដ្ឋកិច្ចក្នុងរយៈពេលប៉ុន្មានឆ្នាំចុងក្រោយនេះក៏ដោយ ។
លោក អុល សំអាង បានលើកឡើងបន្ថែមថា លោកនៅតែទន្ទេញពីការចូលរួមផ្សព្វផ្សាយពីទម្រង់សិល្បៈបុរាណខ្មែរតាមលទ្ធភាព ដែលធ្វើបាន ជាជាងលើកស្ទួយសិល្បៈបរទេស បើទោះបីជាពេលខ្លះទម្រង់សិល្បៈបុរាណហាក់មិនសូវទទួលបានការគាំទ្រពីយុវវ័យមួយចំនួនក៏ដោយ ។
ជាការកត់សម្គាល់ កន្លងមក ប្រធានវង់ល្ខោនបាសាក់វង់ទី១ រាជធានីភ្នំពេញ លោក អុល សំអាង ធ្លាប់បានធ្វើការអំពាវនាវដល់ភាគីពាក់ព័ន្ធ សុំកុំទុកសិល្បៈល្ខោនបាសាក់មហាជន ឱ្យរស់នៅតាមយថាកម្ម ពោលគួរមានការគិតគូរជួយជ្រោមជ្រែង ដ្បិតក្រុមសិល្បៈល្ខោនបាសាក់មហាជន បានដើរតួនាទីយ៉ាងសំខាន់ក្នុងការស្តារការវិវត្តន៍ក្នុងការរីកចម្រើនក្នុងស្ថានការណ៍បត់បែនរបស់សង្គមតាំងតែពីការកកើតនៃទម្រង់ល្ខោនបាសាក់នេះ ។
លោកបញ្ជាក់ថា ទោះបីជាមានក្រុមសិល្បៈមហាជនជាច្រើន បង្កើតបន្តបន្ទាប់ពីមួយឆ្នាំទៅមួយឆ្នាំ មិនប្រាកដថែរក្សាបាន និងទម្រង់នៃល្ខោនបាសាក់ខ្មែរនោះទេ ក៏ប៉ុន្តែក្រុម អុល សំអាង បានរក្សានិងខិតខំរៀនស្រាវជ្រាវរិះរកគ្រប់មធ្យោបាយក្នុងការថែរក្សា និងសម្ដែងឲ្យចំវង់ល្ខោនបាសាក់ទាំងកាយវិការនិយាយស្ដីទាំងបទភ្លេងបទចម្រៀងបាសាក់នាដកម្មក្នុងការសម្ដែងឲ្យចំនឹងទម្រង់
បាសាក់នេះ ៕
ចែករំលែកព័តមាននេះ