រាជធានីភ្នំពេញ ៖ ទើបតែលេចមុខនៅក្នុងពិភពសិល្បៈសម្តែង កាយវិការខារ៉ាអូខេពីចុងឆ្នាំ២០០៩ មកមិនទាន់ល្បីឈ្មោះផង កញ្ញាគីម ហុង ហៅលីលី លេចឮពាក្យចចាមអារ៉ាមពីរឿងស្នេហាទៅហើយ។ នាងមានអាយុ២៨ឆ្នាំហើយកំពុងសិក្សាមុខវិជ្ជាពេទ្យ និងចូលប្រឡូកក្នុងពិភពសិល្បៈសម្តែងកាយវិការខារ៉ាអូខេ និងដើរបង្ហាញម៉ូដ។ មានពាក្យចចាមអារ៉ាមថា នាងលីលី និងលោកកែវ កក្កដា ដែលជាតារារួមអាជីពមានសម្ព័ន្ធស្នេហាក្រៅឆាកជាមួយគ្នា ព្រោះគេសង្កេតឃើញ ទៅណាមកណាជាមួយគ្នារហូត ។ជាពិសេសនោះអ្នកទាំងពីរថតរូបបែបស្នេហារាលរោលទៀតផង។
នៅពេលជួបសម្ភាសន៍កញ្ញាលីលី និងលោកកែវ កក្កដា កាលពីល្ងាចថ្ងៃទី១ សីហា កញ្ញាលីលីឱ្យដឹងថា នាងនិងលោកកែវ កក្កដា មិនជាប់ពាក់ព័ន្ធស្នេហានឹងគ្នាទេ។ ការទៅណាមកណាជាមួយគ្នានោះព្រោះមានអាជីពដូចគ្នា និងជាបងប្អូនជីដូនមួយនឹងគ្នា។ ចំពោះការថតរូបជាមួយគ្នានោះមិនមែនជាស្នេហាក្រៅឆាកសម្តែងទេ គឺជាលក្ខណៈសិល្បៈប៉ុណ្ណោះ។
ចំណែកលោកកែវ កក្កដា និយាយថាលោកគ្មានជាប់ពាក់ព័ន្ធស្នេហាជាមួយកញ្ញាលីលីទេ ព្រោះជាបងប្អូនជីដូនមួយនឹងគ្នា មិនអាចស្រឡាញ់គ្នាបានទេ។
កញ្ញាគីម ហុង ហៅលីលី ឱ្យដឹងថា តាំងពីចុងឆ្នាំ២០០៩ មកនាងធ្លាប់សម្តែងឱ្យផលិតកម្មក្រៅប្រទេសជាច្រើនដូចជា ផលិតកម្មរៃមាស តោមាស កងពេជ្រ ស្រីលក្ខណ៍ និងផលិតកម្មម៉ៃសាម៉េត ជាដើម។
កន្លងមកថ្មីៗនេះ នាងមានកិត្តិយសបានឡើងច្រៀងក្នុងកម្មវិធីតន្ត្រីដួងតារាមាសនៃស្ថានីយទូរទស្សន៍អប្សរា និងចូលរួមសម្ភាសន៍ក្នុងកម្មវិធីអាថ៌កំបាំងរាតា របស់ស្ថានីយទូរទស្សន៍រាជធានីភ្នំពេញ ប៉ុស្តិ៍លេខ៣ ដែលនោះជាឱកាសមួយសម្រាប់ប្រិយមិត្តទស្សនិកជនស្គាល់នាងកាន់តែខ្លាំងឡើង៕
ចែករំលែកព័តមាននេះ