រាជធានីភ្នំពេញ ៖ កម្មវិធីប្រឡងជ្រើសរើសកញ្ញាឯក Fino ឆ្នាំ២០១០ ដែលរៀបចំឡើងដោយក្រុមហ៊ុន YAMAHA និងផលិតកម្មហាយស្តារសហការជាមួយស្ថានីយទូរទស្សន៍ខ្មែរ ប៉ុសិ៍្តលេខ៩ដែលមានលោកចេវ វីរៈ អ្នកគ្រប់គ្រងរៀបចំកម្មវិធីរយៈពេល១៦សបា្តហ៍កន្លងមកជ្រើសរើស បានកញ្ញាឯក Fino ឆ្នាំ២០១១ ចំនួន៤នាក់ គឺលេខ១
រាជធានីភ្នំពេញ ៖ កម្មវិធីប្រឡងជ្រើសរើសកញ្ញាឯក Fino ឆ្នាំ២០១០ ដែលរៀបចំឡើងដោយក្រុមហ៊ុន YAMAHA និងផលិតកម្មហាយស្តារសហការជាមួយស្ថានីយទូរទស្សន៍ខ្មែរប៉ុសិ៍្តលេខ៩ដែលមានលោកចេវ វីរៈ អ្នកគ្រប់គ្រងរៀបចំកម្មវិធីរយៈពេល១៦សបា្តហ៍កន្លងមកជ្រើសរើសបានកញ្ញាឯក Fino ឆ្នាំ២០១១ ចំនួន៤នាក់ គឺលេខ១ លេខ២ លេខ៣ និងកញ្ញាថតរូបស្អាតម្នាក់ ។
លោកចេវ វីរៈ អ្នកដឹកនាំកម្មវិធីឱ្យដឹងថា តាំងពីក្រុមហ៊ុន YAMAHA និងផលិតកម្មហាយស្តាររួមសហការជាមួយស្ថានីយទូរទស្សន៍ខ្មែរប៉ុសិ៍្តលេខ៩រៀបចំកម្មវិធីជ្រើសរើសកញ្ញា ឯក Fino 2011 ចាប់ពីដើមខែមេសាមក មានបេក្ខនារីមកពីបណ្តាខេត្ត-រាជធានីទូទាំងព្រះរាជាណាចក្រកម្ពុជាប្រមាណជិត៣០០០នាក់ ដាក់ពាក្យប្រកួតប្រជែង ។ គណៈកម្មការតម្រូវឱ្យបេក្ខនារីបង្ហាញទេពកោសល្យសិល្បៈ និងចំណេះដឹងទូទៅ ហើយឡើងសម្តែងបង្ហាញក្នុងកម្មវិធីប្រគំតន្ត្រីចុងសបា្តហ៍រាល់ថ្ងៃអាទិត្យវេលាម៉ោង៥ល្ងាចរហូតដល់ម៉ោង៧យប់ដោយមានផ្សាយផ្ទាល់តាមកញ្ចក់ទូរទស្សន៍ខ្មែរប៉ុសិ៍្តលេខ៩ ។
គណៈកម្មការតម្រូវឱ្យបេក្ខនារីមានរូបសម្ផស្សស្រស់ស្អាត មានចំណេះដឹងចាប់ពីថ្នាក់ទី១១ឡើងទៅ មានចរិតប្ញកពាស្លូតបូត រាក់ទាក់រួសរាយ និងតម្រូវឱ្យចេះរាំចង្វាក់ប្រជាប្រិយនិងរាំបែបបរទេស រួមទាំងឆ្លើយនឹងសំណួរដែលទាក់ទិនទៅនឹងតំបន់ទេសចរណ៍ធម្មជាតិផ្សេងៗ និងតំបន់ទេសចរណ៍បែបប្រវត្តិសាស្ត្រ និងសំណួរពីលក្ខណៈស្រស់ស្អាតរបស់ម៉ូតូ YAMAHA Fino ។ ក្រៅពីនេះបេក្ខនារីមានឱកាសបានដើរកម្សាន្តនៅតំបន់ទេសចរណ៍ប្រាសាទបុរាណទន្លេបាទី និងសួនសត្វភ្នំតាម៉ៅ ដើម្បីសិក្សាស្វែងយល់ពីប្រាសាទបុរាណខ្មែរ និងសិក្សាយល់ដឹងពីការស្រឡាញ់សត្វព្រៃ ថែរក្សា អភិរក្សសត្វព្រៃកុំឱ្យបាត់បង់ ។
លោកចែវ វីរៈ ឱ្យដឹងថា ចាប់តាំងពីសបា្តហ៍ទី១រហូតមកដល់វគ្គផ្តាច់ព្រ័ត្រនេះ កម្មវិធីជ្រើសរើសបានកញ្ញាឯក៤នាក់លេខ១ បានទៅលើកញ្ញាពេជ្រ វីរីយ៉ា អាយុ១៨ឆ្នាំ ទម្ងន់៤៣គីឡូម៉ែត្រ កម្ពស់១,៦៣ម៉ែត្រ រៀនថ្នាក់ទី១២ ទទួលការបំពាក់មកុដពីអ្នកស្រីឌី សាវ៉េត ទទួលបានម៉ូតូ Fino មួយគ្រឿងពីលោក MATSUO AKITO អគ្គនាយកក្រុមហ៊ុនមកពី ជប៉ុន និងថវិកា១០០០ដុល្លារពីលោកគង់ នួន អគ្គនាយកក្រុមហ៊ុនគង់ នួន ក្រុមហ៊ុន YAMAHA ប្រចាំកម្ពុជា ។ លេខ២ បានទៅលើកញ្ញាសុខ មុន្នីពិសី ពាក់ស្លាកលេខ៨ អាយុ១៧ឆ្នាំ រៀនថ្នាក់ទី១១ ទម្ងន់៤១គីឡូក្រាម កម្ពស់១,៦៦ម៉ែត្រ ទទួលបានម៉ូតូ Fino មួយគ្រឿងថវិកា៧៥០ដុល្លារ លេខ៣បានទៅលើ កញ្ញាអឿន លក្ខិណា អាយុ១៩ឆ្នាំ ពាក់លេខ១៥ មានកម្ពស់១,៧០ម៉ែត្រ ទម្ងន់៤៨គីឡូក្រាម ជានិស្សិតឆ្នាំទី១ ទទួលម៉ូតូ១គ្រឿងថវិកា៥០០ដុល្លារ ចំណែកចំណាត់ថ្នាក់ថតរូបស្អាតបានទៅលើកញ្ញាអឿន រតនា អាយុ១៩ឆ្នាំ ពាក់លេខ៧ មានទម្ងន់៤៤គីឡូក្រាម កម្ពស់១,៦៦ម៉ែត្រ សិស្សថ្នាក់ទី១១ ទទួលថវិកា៨០០.០០០រៀល។
បន្ទាប់ពីគណៈកម្មការ និងអគ្គនាយកក្រុមហ៊ុនផ្តល់រង្វាន់ជូនដល់បេក្ខនារីរួចមក លោកចេវ វីរៈ ឱ្យដឹងថា បន្ទាប់ពីកម្មវិធីជ្រើសរើសកញ្ញាឯក Fino 2011 នេះ បញ្ចប់ទៅដោយជោគជ័យក្រុមហ៊ុនគង់ នួន អាហរ័ណនីហរ័ណនឹងរៀបចំកម្មវិធីជ្រើសរើសកញ្ញាឯក BRIDGESTONE បន្តទៀតចាប់ពីខែកញ្ញាឆ្នាំ២០១១ តទៅសម្រាប់ឆ្នាំ២០១២ ខាងមុខនេះដោយកម្មវិធីតម្រូវឱ្យបេក្ខនារីដាក់ពាក្យប្រកួតប្រជែងដូចបេក្ខនារីប្រឡងកញ្ញាឯក Fino ដែរ ៕
ចែករំលែកព័តមាននេះ