រាជធានីភ្នំពេញ ៖ បេក្ខភាពបវរកញ្ញាវ័យក្មេង ល្អ ហួស បានប្រកាសពីការចុះផ្សព្វផ្សាយឈុតស្បៃខ្មែរនៅទូទាំង២៥ខេត្ត-ក្រុងនៃប្រទេសកម្ពុជា ក្នុងគោលបំណងចូលរួមផ្សព្វផ្សាយឲ្យបានទូលំទូលាយថែមទៀត អំពីសម្លៀកបំពាក់ដែលជាអត្តសញ្ញាណរបស់ជាតិ ។ ទន្ទឹមនឹងការប្រកាសធ្វើរឿងខាងលើនេះ…
រាជធានីភ្នំពេញ ៖ បេក្ខភាពបវរកញ្ញាវ័យក្មេង ល្អ ហួស បានប្រកាសពីការចុះផ្សព្វផ្សាយឈុតស្បៃខ្មែរនៅទូទាំង២៥ខេត្ត-ក្រុងនៃប្រទេសកម្ពុជា ក្នុងគោលបំណងចូលរួមផ្សព្វផ្សាយឲ្យបានទូលំទូលាយថែមទៀត អំពីសម្លៀកបំពាក់ដែលជាអត្តសញ្ញាណរបស់ជាតិ ។
ទន្ទឹមនឹងការប្រកាសធ្វើរឿងខាងលើនេះ ល្អ ហួស ក៏បានស្នើឲ្យមានការចូលរួមពីម្ចាស់សំអាងការនានាដែលនៅតាមខេត្តទាំងអស់ចូលរួមសហការ ដោយនាងនឹងធ្វើការទាក់ទងទៅដោយផ្ទាល់នៅពេលដែលនាងចុះទៅខេត្តណាមួយនោះ ។
តាមរយៈសំណេរដែលបង្ហោះលើបណ្តាញសង្គម ល្អ ហួស បានលើកឡើងថា នាងខ្ញុំល្អហួសនឹងចុះផ្សព្វផ្សាយឈុតស្បៃខ្មែរ25ខេត្តក្រុង បងៗដែលជាម្ចាស់សំអាងចង់តែងឈុតអោយល្អហួសថតសំរាប់ខេត្តរបស់បងៗ អាចខមមិនឈ្មោះសំអាងការ និងខេត្តរបស់បងបាន ល្អ ហួសនិងទាក់ទងទៅ ។
ក្រោយឃើញពីការប្រកាសរបស់ ល្អ ហួស ធ្វើរឿងខាងលើនេះ មហាជនជាច្រើនបានសម្តែងការគាំទ្រ ខណៈពេលដែលម្ចាស់សំអាងការជាច្រើនក៏បានបង្ហាញបំណងពីការចូលរួមនៅក្នុងការជួយការងារជាមួយរូបនាងផងដែរ ។
គេរំពឹងថា ការចូលរួមផ្សព្វផ្សាយពីឈុតស្បៃខ្មែរពី ល្អ ហួស នាពេលនេះ គឺជាការចូលរួមមួយយ៉ាងសំខាន់នៅក្នុងការផ្សព្វផ្សាយកាន់តែទូលំទូលាយអំពីឈុតស្បៃខ្មែរទៅកាន់មហាជនជាតិ និងអន្តរជាតិ ក្នុងពេលដែលឈុតស្បៃខ្មែរនេះកំពុងត្រូវបានផ្ទះលេខ២ទាញយកជារបស់គេ ។
ជាការកត់សម្គាល់ ក្រោយពេលដែលប្រទេសជិតខាងកម្ពុជាមួយកំពុងតែផ្សព្វផ្សាយពីឈុតស្បៃថា ជារបស់គេនោះ ថ្មីៗនេះ មានអ្នកសិល្បៈខ្មែរមួយចំនួនបានធ្វើសកម្មភាពយ៉ាងសស្រាក់សស្រាំនៅក្នុងការផ្សព្វផ្សាយអំពីឈុតស្បៃខ្មែរ ដើម្បីបញ្ជាក់ពីម្ចាស់ដើមពិតប្រាកដនៃឈុតស្បៃខ្មែរ ។
ជាក់ស្តែង អតីតបវរកញ្ញានាង កុយ អេនណា ក៏បានធ្វើរឿងខាងលើនេះដែរ ដោយនាងបានបញ្ចេញឈុតអាពាហ៍ពិពាហ៍នាសម័យបុរាណដែលមានរំលេចពីស្បៃខ្មែរបង្ហោះលើបណ្តាញសង្គម ប្រកបដោយភាពទាក់ទាញ ។
ជាមួយនឹងការរំលេចរូបភាពខាងលើនេះ កុយ អេនណា ក៏បានភ្ជាប់ជាមួយនឹងសំណេរថា ប្រហែសបាត់ប្រយ័ត្នគង់ សូមកូនខ្មែរគ្រប់រូបរួមគ្នាថែរក្សាស្បៃខ្មែរកុំអោយជាតិសាសន៍ដទៃដណ្តើមយកទៅជារបស់គេបាន ៕
ចែករំលែកព័តមាននេះ