រាជធានីភ្នំពេញ ៖ តារាចម្រៀងអ្នកនាង មាស សុខសោភា បានចេញមុខដោយធ្វើការអំពាវដល់ប្រជាពលរដ្ឋខ្មែរទាំងអស់ត្រូវរួបរួមគ្នា ស្រឡាញ់គ្នា ហើយកុំជេរប្រមាថគ្នា ក្នុងអំឡុងពេលដែលប្រទេសកម្ពុជាកំពុងមានជម្លោះជាមួយថៃនៅតាមខ្សែបន្ទាត់ព្រំដែន ។…
រាជធានីភ្នំពេញ ៖ តារាចម្រៀងអ្នកនាង មាស សុខសោភា បានចេញមុខដោយធ្វើការអំពាវដល់ប្រជាពលរដ្ឋខ្មែរទាំងអស់ត្រូវរួបរួមគ្នា ស្រឡាញ់គ្នា ហើយកុំជេរប្រមាថគ្នា ក្នុងអំឡុងពេលដែលប្រទេសកម្ពុជាកំពុងមានជម្លោះជាមួយថៃនៅតាមខ្សែបន្ទាត់ព្រំដែន ។
តាមរយៈសំណេរដែលបានសរសេរបង្ហោះលើបណ្តាញសង្គម តារាចម្រៀងរូបនេះបានលើកឡើងថា ជំរាបសួរពុកម៉ែ បងប្អូនទាំងអស់ជាទីគោរព និងជាទីនឹករលឹកអំពីនាងខ្ញុំ មាស សុខសោភា ដោយផ្អែកទៅលើស្ថានការណ៍ស្រុកទេស កំពុងតែកើតសង្គ្រាមនាងខ្ញុំមានសេចក្តីព្រួយបារម្ភ អំពីសុខទុក្ខរបស់ពុកម៉ែ និងបងប្អូនទាំងអស់គ្នាខ្លាំងណាស់ ពិសេស ប្រមុខដឹកនាំនៃរាជរដ្ឋាភិបាលរបស់យើងលោកកំពុងតែខ្នះខ្នែងព្យាយាមទប់ស្កាត់មិនចង់ឱ្យកើតមាននូវសង្គ្រាមបំផ្លិចបំផ្លាញដល់អាយុជីវិតមនុស្សលោកឡើយ ។
នាងបន្តថា ឆ្លៀតក្នុងឱកាសនេះ នាងខ្ញុំសូមចិត្តពុកម៉ែបងប្អូនទាំងអស់គ្នា រក្សាភាពស្ងៀមស្ងាត់ដោយទុកឱ្យប្រមុខដឹកនាំរបស់យើង ដែលលោកមានបញ្ញាញាណជាអ្នកដោះស្រាយ លោកមិនទុកពួកយើងចោលទេ អ្វីដែលសំខាន់ក្នុងពេលដែលកំពុងមានអាសន្ននេះ យើងទាំងអស់ត្រូវចេះរួមសាមគ្គីគ្នា ស្រលាញ់គ្នា ទំលាក់ចោលនូវការជេប្រមាថគ្នា ការយកកំហឹងមកធ្វើជាល្បិចកល ដើម្បីដាក់ជាទោសកំហុសដល់គ្នាក្នុងនាមយើងជាកូនខ្មែរដូចគ្នាក៏ត្រូវនាំគ្នាបញ្ឈប់ការប្រមាថគ្នាត្រឹមនេះទៅចុះ ។
នាងបញ្ជាក់ថា ក្នុងនាមយើងជាកូនខ្មែរដូចគ្នា យើងមិនមែនជាសត្រូវនិងគ្នានោះទេ ដូច្នេះយើងទាំងអស់គ្នាគួរតែចេះជួយចែករំលែកចំណេះដឹងល្អៗដល់គ្នានាំគ្នាសាងអំពើល្អ ប្រកាន់ឱ្យខ្ជាប់នូវសច្ចធម៌ និងគុណធម៏ ព្យាយាមចែករំលែកគុណធម៌ទាំងឡាយដែលជាធម្មទានមួយលើអស់ទានទាំងពួងណាបងប្អូន។
កំហុសទាំងឡាយណាដែលមាន យើងគួរតែចេះអត់ឱនដល់គ្នា ចេះជួយអប់រំកែតម្រូវចំណុចខុសដល់គ្នាដោយសេចក្តីថ្លៃថ្នូរស័ក្តិសមជាពូជពង្សអំបូរខ្មែររបស់យើងណាបងប្អូន។
ជាការកត់សម្គាល់ នៅអំឡុងពេលកម្ពុជាកំពុងមានជម្លោះពីការឈ្លានពានរបស់ថៃនាពេលនេះ តារាចម្រៀងនាង មាស សុខសោភា ក៏ដូចជាអ្នកសិល្បៈជាច្រើនរូបទៀតបានចូលរួមយ៉ាងសកម្មនៅក្នុងការផ្តល់ជាសម្លេងបញ្ជាក់ពីកម្ពុជាចង់បានសន្តិភាព ។
ជាក់ស្តែង កន្លងមកតារាចម្រៀងរូបនេះក៏បានបង្ហោះសំណេរនៅលើបណ្តាញសង្គមរបស់នាងថា ក្នុងនាមនាងខ្ញុំជាកុលធីតាខ្មែរ១រូប សូមគាំទ្រយ៉ាងពេញទំហឹងក្នុងការចូលរួមការពារសន្តិភាព ការពារសច្ចធម៌ និងប្រកាន់ខ្ជាប់នូវគុណធម៌ មិនលំអៀង និងមិនញុះញង់ឱ្យភាគីណាមួយបង្ករជម្លោះដាក់គ្នាដែលនាំកើតមាននៅក្តីមហន្តរាយដល់អាយុជីវិតរបស់មនុស្សជាតិទាំងសងខាងឡើយ ។
ពិសេសសូមសាទរ ចំពោះទង្វើកុលបុត្រ កុលធីតាខ្មែរគ្រប់រូបណា ដែលមានឆន្ទៈចូលរួមដើរលើផ្លូវសុច្ចរឹត ចេះការពារសច្ចធម៌ ការពារបេតិកភ័ណ្ឌពិភពលោក ស្រលាញ់សន្តិភាព នាងខ្ញុំសូមអធិដ្ឋានចំពោះព្រះអាទិទេព ព្រះអរហន្តទាំង៨ ឥសីទាំង៤ យាងតាមបីបាច់ថែរក្សាការពារកុលបុត្រ កុលធីតាខ្មែរ ពុកម៉ែព្រមទាំងបងៗកងយុទ្ធមិត្តការពារព្រំដែនគ្រប់រូបដែលឈរលើគោលការណ៌សន្តិភាព ស្រលាញ់យុត្តិធម៌ ចេះការពារធនធានធម្មជាតិ ការពារអាយុជីវិតមនុស្សជាតិគ្រប់ជាតិសាសន៌ទាំងអស់ សូមជួបប្រទះតែសេចក្តីសុខចម្រើន កំលាំងពលំមាំមួននិងទទួលបានជ័យជំនះគ្រប់ពេលវេលា ៕
ចែករំលែកព័តមាននេះ