តារាសម្តែងលោក សាវីន ហ្វីលីព បានជូនដំណឹងដល់សមត្ថកិច្ចឲ្យជួយស្រាយជ្រាវរកជនដែលបានយករូប និងឈ្មោះរបស់លោកទៅបង្កើតឆាណែលយូធូបក្លែងក្លាយយកទៅប្រព្រឹត្តរឿងមិនល្អជាបន្តបន្ទាប់ រហូតប្រមាថអាយុជីវិតថ្នាក់ដឹកនាំទាំងដែលលោកមិនដឹងរឿង ។ តាមរយៈសំណេរដែលបានបង្ហោះលើបណ្តាញសង្គមលោក សាវីន ហ្វីលីព…
តារាសម្តែងលោក សាវីន ហ្វីលីព បានជូនដំណឹងដល់សមត្ថកិច្ចឲ្យជួយស្រាយជ្រាវរកជនដែលបានយករូប និងឈ្មោះរបស់លោកទៅបង្កើតឆាណែលយូធូបក្លែងក្លាយយកទៅប្រព្រឹត្តរឿងមិនល្អជាបន្តបន្ទាប់ រហូតប្រមាថអាយុជីវិតថ្នាក់ដឹកនាំទាំងដែលលោកមិនដឹងរឿង ។
តាមរយៈសំណេរដែលបានបង្ហោះលើបណ្តាញសង្គមលោក សាវីន ហ្វីលីព បានលើកឡើងថា ថ្ងៃនេះជនខិលខូចបានបន្តយករូបថត និងឈ្មោះខ្ញុំទៅបង្កើតឆាណែលយូធូបក្លែងក្លាយ ដោយចូលទៅខមិនក្នុងឆាណែលយូធូប របស់តារាសម្ដែង លោក ចន ដោយបំផុសដំណឹងអកុសលលើសម្ដេចតេជោ ហ៊ុន សែន ថា សម្ដេចបានស្លា.ប់ដោយជំងឺទឹកនោមផ្អែម ។
លោកបញ្ជាក់ថា ជនខិលខូចបានព្យាយាមធ្វើបាបខ្ញុំជាច្រើនដង ក្នុងសប្ដាហ៍នេះ ខ្ញុំសូមជូនដំណឹងនេះ ដល់សមត្ថកិច្ចស្នងការរាជធានីភ្នំពេញមេត្តាជួយស្រាវជ្រាវជនខិលខូចនេះមកផ្ដន្ទាទោសតាមច្បាប់ផង ។
បន្ថែមលើអ្វីដែលលោកបានសរសេរបង្ហោះខាងលើនេះ លោក សាវីន ហ្វីលីព ក៏បានអះអាងប្រាប់កោះសន្តិភាពតាមសារអេឡិចត្រូនិចថា រហូមកទល់នាពេលនេះមានរយៈពេល១០ថ្ងៃហើយ ដែលជនខិលខូចបានយកឈ្មោះ និងរូបរបស់លោកបង្កើតជាឆាណែលយូធូបក្លែងក្លាយ ហើយចូលទៅខមិនជេរទាំងបងប្អូននៅបារាំង និងអាមេរិក ។
លោកបន្តថា ថ្មីៗគណនេយ្យក្លែងក្លាយនេះក៏បានចូលទៅខមិនពីក្រោយឆាណែលយូធូបតារាសម្តែងមួយរូបដោយបានប្រើប្រាស់ពាក្យសម្តីប្រមាថអាយុជីវិតថ្នាក់ដឹកនាំថែមទៀតផង ។
លោកបញ្ជាក់ថា លោកមិនដឹងទេថា អ្នកណាដែលបានបង្កើតរឿងនេះឡើង ប៉ុន្តែវាអាចចេញមកពីអ្នកដែលគេច្រណែន និងស្អប់រូបលោក ហើយធ្វើរឿងនេះ ដើម្បីបំផ្លាញលោកទាំងយើងមិនដឹងខ្លួន ។ លោកថា បើលេងត្រឹមខ្ញុំ ម្តាយឪពុកខ្ញុំ ឬបងប្អូនខ្ញុំ ខ្ញុំមិនខឹងទេ តែនេះលេងដល់ថ្នាក់ដឹកនាំ ទើបខ្ញុំមានការប្រតិកម្មខ្លាំង ទើបពេលនេះខ្ញុំត្រូវប្រកាសឲ្យមហាជនដឹងជាសាធារណៈកុំឲ្យមានការយល់ច្រឡំចំពោះខ្ញុំ ។
យ៉ាងណា បើតាមលោក សាវីន ហ្វីលីព ចំពោះបញ្ហានេះលោកបានជូនដំណឹងទៅលោកស្នងការនគរបាលរាជធានីភ្នំពេញរួចហើយ ឲ្យលោកចាត់វិធានការស្រាវជ្រាវរកជនដែលបានធ្វើរឿងមួយនេះ ដើម្បីផ្តន្ទាទោសទៅតាមច្បាប់ ៕
ចែករំលែកព័តមាននេះ