រាជធានីភ្នំពេញ ៖ គិតត្រឹមតឺរយៈពេលជាង១ខែប៉ុណ្ណោះ គឺនៅដើមខែវិច្ឆិកា និងជិតពាក់កណ្ដាលខែធ្នូ ក្នុងឆ្នាំ២០២៤នេះ មានជនមិនស្គាល់មុខ និងពុំស្គាល់អត្តសញ្ញាណបានយកម៉ូតូ២គ្រឿងនិងរថយន្ត៣គ្រឿងទៅប្លុងចោលជាបន្តបន្ទាប់នៅក្នុងភូមិសាស្រ្តខណ្ឌពោធិ៍សែនជ័យ រាជធានីភ្នំពេញ ។

បើតាមការស្រាវជ្រាវរបស់សមត្ថកិច្ចនគរបាលបានរកឃើញថា មានរថយន្តខ្លះជួបគ្រោះថ្នាក់ចរាចរ បណ្ដាលឲ្យមានមនុស្សរងរបួសហើយបានបើករត់ទៅដល់កន្លែងស្ងាត់រួចក៏ទុកចោល ។ ចំណែករថយន្តខ្លះទៀតអ្នកបើកបរស្រវឹងស្រា បើកទៅមុខអត់រួចក៏ទុកចោល រីឯម៉ូតូវិញនៅពុំទាន់រកឃើញម្ចាស់និងមូលហេតុនៃការប្លុងចោលនៅឡើយ ។

ទាក់ទិនទៅនិងការប្លុងយានជំនិះចោលខាងលើនេះក៏មានករណីថ្មីមួយទៀតបានកើតឡើងដែរ ដោយមានម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៍ខ្មៅ ពាក់ស្លាកលេខភ្នំពេញ​1HC-0515 ។ ត្រូវបានជនមិនស្គាល់មុខយកទៅប្លុងចោលនៅក្នុងដីឡូត៌មួយកន្លែង ស្ថិតនៅតាមបណ្ដោយផ្លូវបេតុងក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។ បន្ទាប់មកត្រូវបានកម្មកររថយន្តប្រមូលសំរាម ម្នាក់ប្រទះឃើញ កាលពីវេលាម៉ោង៤ជិតភ្លឺថ្ងៃទី១១ ខែធ្នូ ឆ្នាំ២០២៤ រួចក៏បានរាយការណ៍ជូនអាជ្ញាធរនិងសមត្ថកិច្ចឲ្យចុះទៅនាំយកទៅរក្សាទុកធ្វើការស្រាវជ្រាវរកម្ចាស់ ។

ប្រជាការពារភូមិម្នាក់បានប្រាប់ឲ្យដឹងថា ម៉ូតូនោះត្រូវបានជនមិនស្គាល់មុខចាក់សោ ក ជាប់រួចផ្ដួលចោលនៅក្នុងព្រៃក្នុងដីឡូត៌ខាងលើនោះ ហើយបើមើលពីផ្លូវទៅអត់ឃើញនោះទេទាល់តែចូលទៅដល់ទើបឃើញ ។ ដោយឡែកនៅវេលាម៉ោងខាងលើ មានកម្មកររថយន្តប្រមូលសំរាមម្នាក់បានដើរចូលទៅបត់ជើងនៅក្នុងដីឡូត៌នោះ ហើយក៏បានប្រទះឃើញម៉ូតូ១គ្រឿងខាងលើ
ទើបប្រាប់​ឲ្យ​គាត់ដែលជាកម្លាំងប្រជាការពារជួយរាយការណ៍ជូនអាជ្ញាធរ និងសមត្ថកិច្ចបានដឹង ។

ប្រជាការពារដដែលបានប្រាប់ឲ្យដឹងបន្តទៀតថា ខណៈនោះបានបង្កឲ្យមា ការភ្ញាក់ផ្អើល ហើយកម្លាំងកងរាជអាវុធហត្ថខណ្ឌពោធិ៍សែនជ័យ ក៏បានចុះទៅកាន់ទីនោះភ្លាមៗផងដែរ ។ ពេលទៅដល់មន្រ្តីកងរាជអាវុធហត្ថបានពិនិត្យរកមើលជុំវិញកន្លែងកើតហេតុ ក្រែងមានមនុស្សស្លាប់ជិតនោះ ឬ មានវត្ថុតាងអ្វីផ្សេងទៀត ប៉ុន្តែរកពុំឃើញមានអ្វីឡើយ ។ ទើបនាំយកម៉ូតូនេះទៅរក្សាទុក នៅបញ្ជាការដ្ឋានកងរាជអាវុធហត្ថខណ្ឌ រង់ចាំធ្វើការស្រាវជ្រាវរកម្ចាស់បន្តទៀត ។

សូមជម្រាបជូនថា រយៈពេលជាង១ខែកន្លងមកនេះ ដោយគិតត្រឹមដើមខែវិច្ឆិកា និងជិតពាក់កណ្ដាលខែធ្នូ ក្នុងឆ្នាំ២០២៤នេះ មានជនមិនស្គាល់មុខ និងពុំស្គាល់អត្តសញ្ញាណ បានយកម៉ូតូចំនួន២គ្រឿង និងរថយន្តចំនួន៣គ្រឿងទៅប្លុងចោលនៅក្នុងខណ្ឌពោធិ៍សែនជ័យជាបន្តបន្ទាប់ ។

ក្នុងនោះហេតុកាណ៍ទី១ នៅវេលាម៉ោង១យប់រំលងអាធ្រាត្រឈានចូលថ្ងៃទី០៣ ខែវិច្ឆិកា ឆ្នាំ២០២៤ អ្នកភូមិបានប្រទះឃើញរថយន្ត១គ្រឿងម៉ាកតូយ៉ូតាព្រូសពណ៍បៃតងខ្ចី ពាក់ស្លាកលេខភ្នំពេញ 2BB-1748 ចតចោលនៅតាមផ្លូវបេតុងស្ថិតនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។

ដោយរថយន្តនោះអត់ចាក់សោទ្វារ ព្រមទាំងចាក់បទចម្រៀង និងទុកកូនសោនៅជាប់រថយន្តថែមទៀត បន្ទាប់មកអ្នកភូមិនោះក៏បានរាយការណ៍ជូននគរបាលប៉ុស្តិ៍ចោមចៅទី៣ ឲ្យចុះទៅពិនិត្យនិងនាំយកទៅរក្សាទុក ។ លុះប៉ុន្មានម៉ោងក្រោយមកនៅវេលាព្រឹកថ្ងៃដដែលនោះម្ចាស់ក៏បានទៅទំនាក់ទំនងសុំយកវិញ ហើយបាននិយាយប្រាប់នគរបាលថា រថយន្តនេះត្រូវបានបុគ្គលិករបស់គាត់យកជិះដើរលេងផឹកស៊ីពេលយប់ លុះដល់ពេលស្រវឹងធ្លាក់ភ្នែក បើកមិនទៅមុខអត់រួច ក៏បានឈប់និងទុកចោលលើផ្លូវតែម្ដង ។

ទី២-នៅវេលាម៉ោង៦ល្ងាចថ្ងៃទី១១ ខែវិច្ឆិកា ឆ្នាំ២០២៤ មានរថយន្ត១គ្រឿងម៉ាកតាកូម៉ាពណ៍ទឹកប្រាក់ ពាក់ស្លាកលេខភ្នំពេញ2Q-9813 ត្រូវជនមិនស្គាល់មុខយកទៅប្លុងចោលនៅក្នុងដីឡូត៌មួយកន្លែង នៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ក្រោយមក នគរបាលប៉ុស្តិ៍ចោមចៅទី៣ បានចុះទៅពិនិត្យមើល រួចបានរាយការណ៍ទៅកាន់ផ្នែកនគរបាលចរាចរខណ្ឌពោធិ៍សែនជ័យចុះទៅនាំយកទៅរក្សាទុកទាំងយប់ ហើយបន្ទាប់ពីការស្រាវជ្រាវ ទើបដឹងថា កាលពីវេលាយប់ថ្ងៃទី៨ ខែវិច្ឆិកា រថយន្តនេះបានបើកបុកអ្នកជិះម៉ូតូនៅម្ដុំភូមិព្រៃទា២ សង្កាត់ចោមចៅទី៣នោះដែរ បណ្ដាលឲ្យមានអ្នករងរបួស៣ទៅ៤នាក់ បន្ទាប់មកក៏បានបើករត់ទៅទុកចោលនៅក្នុងដីឡូត៌ខាងលើនោះតែម្ដង ។

ទី៣-នៅវេលាម៉ោង៤ជិតភ្លឺថ្ងៃទី៧ ខែធ្នូ ឆ្នាំ២០២៤ មានជនមិនស្គាល់មុខយកម៉ូតូម៉ាកហុងដាស្កូបពី១គ្រឿងពណ៍ទឹកប៊ិចចាស់ លាយពណ៍ពងមាន់ ពាក់ស្លាកលេខកំពត1J-2169 ទៅប្លុងចោល ។ ក្រោយមកត្រូវបានប្រជាពលរដ្ឋបានប្រទះឃើញ នៅក្នុងដីឡូត៌មួយកន្លែងស្ថិតនៅក្នុងភូមិព្រៃព្រីងជើង១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហើយនគរបាលបាននាំយកទៅរក្សាទុក និងមិនទាន់រកម្ចាស់ឃើញនៅឡើយទេ ។

ទី៤-កាលពីវេលាម៉ោង៥ព្រឹកថ្ងៃទី៨ ខែធ្នូ ឆ្នាំ២០២៤ អ្នកដើរហាត់ប្រាណបានប្រទះឃើញមានបុរសម្នាក់បើកយករថយន្តម៉ាកតូយ៉ូតាព្រូសពណ៍បៃតងខ្ចី១គ្រឿងទាំងបែកកង់មុខ និងក្រពឹតកាង ចូលតាមផ្លូវលំដែលគេមិនសូវធ្វើដំណើរ ស្ថិតនៅក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។ លុះពេលទៅដល់កន្លែងដែលមានទឹកនិងភក់ក៏បានជាប់ផុងកង់មុខ និងកើលទ្រូងទៅមុខលែងរួច បន្ទាប់មកបុរសនោះក៏បានដោះស្លាកលេខរថយន្តទាំងមុខទាំងក្រោយចេញ រួចចាកចេញទៅបាត់ដោយទុករថយន្តចោល ក្រោយមកនគរបាលចរាចរខណ្ឌពោធិ៍សែនជ័យបានចុះទៅនាំយកទៅរក្សាទុក ហើយសង្ស័យថារថយន្តនោះជួបគ្រោះថ្នាក់ចរាចរនៅកន្លែងណាមួយរួចបើករត់រហូតជាប់ផុងក៏ទុកចោលតែម្ដង ហើយរហូតមកដល់ពេលនេះរកម្ចាស់ពុំទាន់ឃើញនៅឡើយ ។

ចំណែកទី៥-ការប្លុងចោលម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៍ខ្មៅ ពាក់ស្លាកលេខភ្នំពេញ1HC-0515 ខាងលើនោះ ហើយកងរាជអាវុធហត្ថខណ្ឌពោធិ៍សែនជ័យ កំពុងធ្វើការស្រាវជ្រាវរកម្ចាស់ឲ្យទៅទទួលយកវិញ ៕