រាជធានីភ្នំពេញ ៖ អតីតតារាសម្តែងដ៏ល្បីល្បាញនាទសវត្សរ៍ឆ្នាំ៩០ លោក ខៃ ប្រសិទ្ធ បានបង្ហាញវត្តមានមកលេងស្រុកខ្មែរជាថ្មីម្តងទៀត បន្ទាប់ពីលោកបានចាកចេញពីស្រុកកំណើតទៅរស់នៅលើទឹកដីប្រទេសអូស្ត្រាលីអស់ពេលជាច្រើនឆ្នាំមកនេះ ។ ដំណើរមកលេងមាតុភូមិរបស់អតីតតារាភាពយន្តរូបនេះមិនមែនជារឿងមួយថ្មី…
រាជធានីភ្នំពេញ ៖ អតីតតារាសម្តែងដ៏ល្បីល្បាញនាទសវត្សរ៍ឆ្នាំ៩០ លោក ខៃ ប្រសិទ្ធ បានបង្ហាញវត្តមានមកលេងស្រុកខ្មែរជាថ្មីម្តងទៀត បន្ទាប់ពីលោកបានចាកចេញពីស្រុកកំណើតទៅរស់នៅលើទឹកដីប្រទេសអូស្ត្រាលីអស់ពេលជាច្រើនឆ្នាំមកនេះ ។
ដំណើរមកលេងមាតុភូមិរបស់អតីតតារាភាពយន្តរូបនេះមិនមែនជារឿងមួយថ្មី និងជាលើកទីមួយសម្រាប់លោកឡើយ ពោលលោកតែងតែមកលេងស្រុកកំណើតជាបន្តបន្ទាប់ ក្នុងគោលដៅមកសួរសុខទុក្ខបងប្អូន សាច់ញាតិ និងការងារសប្បុរសធម៌នានា ។
យ៉ាងណា គេនៅមិនទាន់ដឹងទេថា លោក ខៃ ប្រសិទ្ធ បានមកដល់ប្រទេសកម្ពុជាតាំងពីថ្ងៃណា ហើយស្ទាក់នៅរយៈពេលប៉ុន្មានថ្ងៃ និងគោលបំណងអ្វីនៅក្នុងការមកលេងស្រុកខ្មែរជាថ្មីនាពេលនេះ ប៉ុន្តែគេបានឃើញរូបភាពរបស់លោកត្រូវបានតារាសម្តែងលោក សឿន វីតា បានបង្ហោះកាលពីថ្ងៃទី៣ ខែធ្នូ ឆ្នាំ២០២៤ ។
តាមរយៈរូបភាពចំនួន៣សន្លឹកដែលថតជាមួយលោក ខៃ ប្រសិទ្ធ តារាសម្តែងលោក សឿន វីតា បានភ្ជាប់ជាមួយសំណេរថា សំណាងណាស់ខ្ញុំ បានលោកពូតារាសម្តែង ជើងចាស់លោកពូ ខៃ ប្រសិទ្ធ បានចូលមកទិញត្រីងៀតនឹងអន្ទង់ងៀត ហើយលោកពូបានជួយលុយមកអោយខ្ញុំ200$ ដើម្បីផ្គត់ផ្គង់គ្រួសារ ។
លោកបញ្ជាក់ថា ស្រលាញ់លោកពូតាំងតូចលូវលោកពូនៅតែសង្ហាបានជួបលោកពូមកជួយគាំទ្រដល់ផ្ទះ ។
ទោះជាយ៉ាងណា ក្រោយពីឃើញការបង្ហោះរូបភាពរបស់លោក ខៃ ប្រសិទ្ធ នាពេលនេះ គេឃើញមានមហាជនជាច្រើនបានចូលទៅធ្វើការខំមិនពីក្រោម ដោយម្នាក់ៗសម្តែងការនឹករលឹកដល់រូបលោកយ៉ាងខ្លាំង ខណៈពេលដែលទស្សនិកជនក៏បានលើកសសើរពីរូបសម្រស់អតីតតារាភាពយន្តរូបនេះនៅតែសង្សារដដែល ។
ជាការកត់សម្គាល់នេះ មិនមែនជាលើកទីមួយទេដែលលោក ខៃ ប្រសិទ្ធ បានមកលេងស្រុកខ្មែរ ពោលកាលពីអំឡុងឆ្នាំ២០១៩-២០២០ លោកក៏ធ្លាប់មកលេងគ្រួសារ និងជួបមិត្តភក្តិចាស់ៗ ជាពិសេសទៀតនោះលោកក៏បានចូលរួមសម្តែងក្នុងបទចម្រៀង(ឪពុកអ្នកក្រ) និងបទ (ស័ង្ខសិល្ប៍ជ័យ) ។
គួរបញ្ជាក់ថា បន្ទាប់ពីបញ្ចប់អាជីពសិល្បៈនោះមកលោក ខៃ ប្រសិទ្ធ បានចាកចេញពីប្រទេសកម្ពុជាទៅរស់នៅសាងជីវភាពថ្មីនៅលើទឹកដីអូស្ត្រាលី ដែលគិតមកទល់នាពេលនេះមានរយះពេលជាង២០ឆ្នាំហើយ ។
សម្រាប់ការរស់នៅប្រទេសអូស្ត្រាលីនេះ កន្លងមកតារាសម្តែង និងជាមិត្តភក្តិជិតស្និតរបស់ ខៃ ប្រសិទ្ធ គឺលោក សាវីន ហ្វីលីព ធ្លាប់បានអះអាងប្រាប់កោះសន្តិភាពថា បច្ចុប្បន្នលោក ខៃ ប្រសិទ្ធ បាននឹងកំពុងរស់នៅក្នុងជីវភាពយ៉ាងហ៊ឺហារនៅក្នុងប្រទេសអូស្ត្រាលី ដោយមានផ្ទះជួល និងមានរថយន្តទំនើបៗសម្រាប់ជិះផ្ទាល់ខ្លួន ហើយលោកក៏មានមុខជំនួញផ្នែកអចលនទ្រព្យនៅក្នុងដៃផងដែរ ។
បើតាមលោក សាវីន ហ្វីលីពរហូតមកទល់ពេលនេះ លោក ខៃ ប្រសិទ្ធ នៅមិនទាន់លេចលឺមានភរិយាថ្មីនៅឡើយទេ ដោយលោកបន្តរស់នៅជាមួយកូនប្រុសរបស់លោកដែលជាតំណក់ឈាមរួមគ្នាជាមួយភរិយា គឺអ្នកស្រី ពិសិដ្ឋ ពិលីកា ។
លោកបញ្ជាក់ថា កូនប្រុសរបស់លោក ខៃ ប្រសិទ្ធ បានរៀនចប់ថ្នាក់បរិញ្ញាបត្រប្រមាណជាង២ឆ្នាំហើយ ហើយបច្ចុប្បន្នកំពុងស្នាក់នៅប្រទេសជប៉ុន ហើយកូនប្រុសរបស់លោកបច្ចុប្បន្នមានមុខមាត់ដូចលោកណាស់ ហើយក៏មានរូបរាងសង្ហាមិនចាញ់ឪពុករបស់គេដែរ ៕
ចែករំលែកព័តមាននេះ