រាជធានីភ្នំពេញ ៖ បន្ទាប់ពីបាត់មុខមួយរយៈតារាចម្រៀងដែលធ្លាប់តែមានឈ្មោះល្បីកាលពីប៉ុន្មានឆ្នាំមុននាងយក់ ឋិតរដ្ឋា បានប្រាប់អ្នកសារព័ត៌មានថា នាងត្រៀមចេញអាល់ប៊ុមដំបូងក្នុងផលិតកម្មថ្មីនាដើមខែសីហា ខាងមុខនេះ បន្ទាប់ពីបានចាកចេញពីផលិតកម្មប៊ិកមែន ដោយស្ងាត់ៗដើម្បីស្តារកេរ្តិ៍ឈ្មោះឡើងវិញ លើវិស័យសិល្បៈ ។
កាលពីពាក់កណ្តាលឆ្នាំ២០១០ នាងយក់ ឋិតរដ្ឋា ចេញបទចម្រៀងជាច្រើនក្នុងផលិតកម្មប៊ិកមែន ហើយបទចម្រៀងទាំងនោះទទួលបានការគាំទ្រ និងធ្វើឱ្យកេរ្តិ៍ឈ្មោះរបស់នាងឡើងមួយកម្រិត។ ប៉ុន្តែក្រោយមកក៏ស្រាប់តែបាត់សំឡេងយក់ ឋិតរដ្ឋា ពីវិស័យសិល្បៈតែម្តង សូម្បីតែក្នុងផលិតកម្មប៊ិកមែន ក៏គ្មានបទចម្រៀងរបស់នាងដែរ ។
មានលេចឮព័ត៌មានថា នាងបានសម្រាកពីវិស័យសិល្បៈមួយរយៈជាមួយស្វាមី គឺលោកឃុំ ប៉ុណ្ណាដែត ។ ប៉ុន្តែព័ត៌មាននោះត្រូវបាននាងយក់ ឋិតរដ្ឋា ច្រានចោល ហើយបញ្ជាក់ថា នាងនិងស្វាមីមិនបានចាកចេញពីសិល្បៈទេ ។ ចំណែកនាងបាត់មុខមួយរយៈនេះ គឺនាងនិងស្វាមីជាប់រវល់ចេញទៅសម្តែងនៅក្នុងកម្មវិធីប្រគំតន្ត្រីតាមបណ្តាខេត្ត ។ អ្វីដែលធ្វើឱ្យមានការភ្ញាក់ផ្អើលនោះគឺនាងយក់ ឋិតរដ្ឋា ខ្សឹបប្រាប់កោះសន្តិភាពថានាងនឹងចេញអាល់ប៊ុមបទ ចម្រៀងលើកដំបូងក្នុងផលិតកម្មថ្មីនាដើមខែសីហា ខាងមុខនេះដែលនាងអះអាងថា អាល់ប៊ុមទី១របស់នាងប្រាកដជាទទួលបានការគាំទ្រមិនខាន ព្រោះសុទ្ធសឹងជាបទចម្រៀងទាក់ទងនឹងស្រទាប់យុវវ័យ។ ប៉ុន្តែនាងមិនប្រាប់ថា ផលិតកម្មដែលនាងកំពុងផ្ញើប្រាណនេះឈ្មោះផលិតកម្មអ្វី ឬជាផលិតកម្មទើបបង្កើតថ្មី ឬចាស់នោះទេ ដោយនាងគ្រាន់តែបង្ហើបថា ផលិតកម្មនោះមិនធំដូចផលិតកម្មហង្សមាស ឬសាន់ដេទេ តែជាទ្រនំដ៏ស្តុកមួយសម្រាប់រូបនាង ។
រំលឹកពីប្រវត្តិនាងយក់ ឋិតរដ្ឋា គឺជាតារាចម្រៀងលំដាប់ថ្នាក់កំពូល មុនពេលរូបនាងមិនទាន់មានស្វាមី ហើយភាពល្បីរបស់នាងកាលនោះ អាចប្រៀបនឹងតារាល្បីនាសម័យបច្ចុប្បន្នដែរ ។ ក្រោយពេលនាងរៀបអាពាហ៍ពិពាហ៍ជាមួយតារាចម្រៀងឃុំ ប៉ុណ្ណាដែត ភាពល្បីរបស់នាងហាក់បានធ្លាក់ចុះយ៉ាងខ្លាំង ស្របពេលដែលនាងនិងស្វាមីបាត់មុខមួយរយៈពីវិស័យសិល្បៈ ។ វត្តមានជាថ្មីរបស់នាងយក់ ឋិតរដ្ឋា បន្ទាប់មកនេះក៏មិនអាចស្តារកេរ្តិ៍ឈ្មោះរបស់នាងនិងស្វាមីឱ្យបានស្មើនឹងភាពល្បីរបស់នាងកាលពីដំបូងដែរ។
ពាក់ព័ន្ធបញ្ហានេះយក់ ឋិតរដ្ឋា បានសន្យាថា នាងនឹងខិតខំឱ្យអស់ពីសមត្ថភាពពេលដែលនាងចូលច្រៀងឱ្យផលិតកម្មថ្មីនេះ ដើម្បីស្តារ និងសាងកេរ្តិ៍ឈ្មោះឡើងវិញ បើទោះបីជានាងមានស្វាមីមានកូនក៏ដោយ ព្រោះតារាចម្រៀងល្បីៗលើពិភពលោកភាគច្រើនក៏មានស្វាមី និងមានកូនដូចគ្នា ។នាងបញ្ជាក់ថា តារាចម្រៀង ឬតារាសម្តែងដែលល្បី គឺគេមិននិយាយដល់ការរើសអើងចាស់ ឬក្មេង មានស្វាមី ឬមានកូននោះទេ សំខាន់សីលធម៌ អត្តចរិត ទំនាក់ទំនង និងទឹកដមសំឡេងល្អពីរោះ និងទទួលបានការគាំទ្រពេញនិយមពីទស្សនិកជន ។ ដូច្នេះនាងមានសង្ឃឹមថា តាមរយៈបទចម្រៀងអាល់ប៊ុមដំបូងនៃផលិតកម្មថ្មីនេះនឹងអាចឱ្យនាងស្តារ និងកសាងកេរ្តិ៍ឈ្មោះឡើងវិញ ដូចគ្រាដើមមិនខាន ។
នាងយក់ ឋិតរដ្ឋា អំពាវនាវដល់ទស្សនិកជនកម្ពុជា សំខាន់អ្នកដែលធ្លាប់និយមគាំទ្រនាងសុំឱ្យបន្តការគាំទ្រដល់រូបនាង ហើយនាងនឹងខិតខំឱ្យអស់សមត្ថភាព និងដាក់ខ្លួនបម្រើទស្សនិកជនមិនឱ្យខកបំណងឡើយ៕
ចែករំលែកព័តមាននេះ