នាថការី សុខគា គឹមលាង សម្រេចចូលប្រកួត Miss Universe
- ភ្នំពេញ
នៅទីបំផុត នាថការីរបាំបុរាណ សុខគា គឹមលាង ហៅកូន Ant បានសម្រេចចូលរួមប្រកួតកម្មវិធីប្រឡងកញ្ញាដ៏ធំរបស់ពិភពលោក Miss Universe ហើយ…
នៅទីបំផុត នាថការីរបាំបុរាណ សុខគា គឹមលាង ហៅកូន Ant បានសម្រេចចូលរួមប្រកួតកម្មវិធីប្រឡងកញ្ញាដ៏ធំរបស់ពិភពលោក Miss Universe ហើយ បន្ទាប់ពីនាងបានទទួលភ្លើងខៀវពីក្រុមគ្រួសារ និងការជម្រុញពីបណ្តាប្រិយមិត្តគាំទ្រ ។
សុខគា គឹមលាង អាចនឹងចូលរួមប្រកួតប្រជែងកម្មវិធីសម្រស់ដ៏ធំខាងលើនេះនៅឆ្នាំ២០២៥ខាងមុខ បន្ទាប់ពីមើលឃើញពីភាពជោគជ័យរបស់អ្នកនាង ប្រាសាទ ដាវីន ដែលអាចបំបែកកំណត់ត្រាកម្ពុជាឈានចូលដល់វគ្គ TOP ជាលើកដំបូង ។
ក្នុងបទសម្ភាសន៍ជាមួយអ្នកសារព័ត៌មានក្នុងការទទួលដំណើរវិលមកមាតុប្រទេសវិញរបស់អ្នកនាង ប្រាសាទ ដាវីន កាលពីម្សិលមិញ សុខគា គឹមលាង បានលើកឡើងថា សម្រាប់ការចូលរួមការប្រកួត Miss Universe នាពេលនេះ គឺនាងបានទទួលការកម្លាំងជម្រុញវេលា និងគាំទ្រពីសំណាក់គ្រួសាររបស់នាង ហើយពួកគាត់មានការស្រឡាញ់លើបេក្ខភាពអ្នកនាង ប្រាសាទ ដាវីន នេះផងដែរ ។
នាងបញ្ជាក់ថា សម្រាប់ការត្រៀមខ្លួននោះ គឺនាងត្រូវការអ្នកនាង ប្រាសាទ ដាវីន ដើម្បីជួយបង្ហាត់បង្រៀន និងផ្តល់បទពិសោធន៍សម្រាប់ការប្រកួតមួយ ហើយប្រសិនបើនាងទទួលការបង្ហាត់បង្ហាញពីអ្នកនាង ប្រាសាទ ដាវីន បានគ្រប់គ្រាន់នោះ នាងអាចនឹងចូលរួមប្រកួតនៅឆ្នាំក្រោយនេះ ។
ដោយឡែក ក្រោមពីការអះអាងខាងលើនេះ សុខគា គឹមលាង ក៏បានបង្ហោះសំណេរខ្លីមួយនៅលើគណនេយ្យហ្វេសប៊ុករបស់ខ្លួនថា រាល់ការប្រឹងប្រែងខិតខំ និងបទពិសោធន៍របស់ខ្ញុំ នឹងធ្វើឲ្យ Universe ទទួលស្គាល់កូនខ្មែរកាន់តែច្បាស់ថា ប្រទេសតូចតែបេះដូងធំ គឺ Kon Ant 🐜Cambodia ។
យ៉ាងណា ក្រោយឃើញការប្រកាសពីការចូលរួមប្រកួតប្រជែងកម្មវិធី Miss Universe ពីសំណាក់ សុខភា គឹមលាង នាពេលនេះ គេបានឃើញមហាជនកម្ពុជាជាច្រើនបានសម្តែងការអបអរសាទរ និងគាំទ្រយ៉ាងខ្លាំងចំពោះរូបនាង ក្នុងពេលដែលពួកគេកំពុងទន្ទឹងរងចាំឱកាសមួយនេះជាយូរមកហើយ ។
ជាការកត់សម្គាល់ កន្លងមក មានទស្សនិកជនជាច្រើនបានជម្រុញឲ្យ សុខគា គឹមលាង ចូលរួមប្រកួតនៅក្នុងកម្មវិធីបវរកញ្ញាណាមួយ ដោយសារតែពួកគេបានឃើញពីទេពកោលស្យនិងរូបសម្រស់របស់នាងគឺពិតជាសាកសមសម្រាប់ការប្រកួតផ្នែកសម្រស់ ។
យ៉ាងណាកន្លងមក សុខគា គឹមលាង តែងតែធ្វើការបដិសេធចំពោះការចូលរួមប្រកួត ដោយឈរលើមូលហេតុថា នាងមិនទាន់ហ៊ានថតឈុតសិចស៊ី ឬឈុតហែលទឹក ក្នុងពេលដែលកម្មវិធីប្រឡងបវរកញ្ញាគឺតម្រូវឲ្យបេក្ខភាពបវរកញ្ញាទាំងអស់ត្រូវថត និងបង្ហាញនូវភាពក្លាហានគ្រប់ទម្រង់ទាំងការស្លៀកពាក់ ។
សុគា គឹមលាង ធ្លាប់បានបញ្ជាក់ប្រាប់ថា នាងចូលចិត្តសិល្បៈបុរាណច្រើនជាងសម័យ ហើយចរិតរបស់នាងក៏បុរាណទៅតាមហ្នឹងដែរ ទាំងការស្លៀកពាក់ និងការតុបតែងខ្លួន បើនិយាយពីរឿងសិចស៊ី គឺនាងសុំចាញ់គេហើយ ។
ទោះជាយ៉ាងណា សម្រាប់ការសម្រេចចូលប្រកួត Miss Universe របស់ សុខគា គឹមលាង នាពេលនេះ ទស្សនិកជនបានដាក់ក្តីរំពឹងថា នាងអាចនឹងបំបែកកំណត់ត្រាកម្ពុជាថ្មីៗបន្ថែមទៀត បន្ទាប់ពីអ្នកនាង ប្រាសាទ ដាវីន បានឈានដល់វគ្គ Top ជាលើកដំបូងសម្រាប់ការប្រកួតសម្រស់ដ៏ធំរបស់ពិភពលោកមួយនេះ ៕
ចែករំលែកព័តមាននេះ