រាជធានីភ្នំពេញ ៖ តារាសម្តែង រឿន ណាត និងគូស្នេហ៍គឺលោកលាវ វេងហួរ នឹងចូលរោងការក្នុងពេលឆាប់ៗនេះហើយ បន្ទាប់ពីគេបានកសាងទំនាក់ទំនងស្នេហ៍ក្រៅឆាក ជាមួយគ្នាត្រឹមប៉ុន្មានខែចុងក្រោយនេះ ក្នុងពេលដែលគូស្នេហ៍របស់នាង ក៏ទើបតែធ្វើឲ្យនាងមានការរំភើបខ្លាំង ក្រោយបានលុតជង្គង់សុំនាងរៀបការនៅលើទឹកដីអង្គរកាលពីពេលថ្មីៗនេះ ។
មង្គលការរបស់តារាស្រីរូបនេះ អាចនឹងកើតឡើងឆាប់ៗនេះ បន្ទាប់ពីគេបានឃើញ រឿន ណាត បានបង្ហោះវីដេមួយតាមរយៈបណ្តាញសង្គមបង្ហាញពីសកម្មភាពរបស់នាង កំពុងជ្រើសរើសធៀបការសម្រាប់ត្រៀមហៅភ្ញៀវចូលរួមនៅថ្ងៃពិសេសរបស់ខ្លួន ។
តាមរយៈវីដែអូនេះ រឿន ណាត មិនបានបញ្ជាក់ពីពេលវេលាច្បាស់លាស់នូវថ្ងៃចូលរោងការនោះឡើយ ប៉ុន្តែគេបានកត់សម្គាល់ដឹង ដោយសារតែនាងបានភ្ជាប់ជាមួយនឹងសំណេរខ្លីថា ត្រៀមឈុតឲ្យហើយផងណា see you នោះមានន័យថា មង្គលការរបស់នាងអាចនឹងកើតមានឆាប់ៗនេះ ។
ជាការកត់សម្គាល់ អតីត Miss universe Cambodia 2018 កញ្ញា រឿន ណាត បានសម្តែងការភ្ញាក់ផ្អើលយ៉ាងខ្លាំង បន្ទាប់ពីឃើញគូស្នេហ៍របស់នាងបានលុតជង្គង់សុំនាងរៀបការនៅមុខប្រាសាទអង្គរវត្ត ។
ជាមួយក្តីរំភើបមួយនេះ រឿន ណាត ក៏បានបង្ហោះសំណេរតាមបណ្តាញសង្គមថា អរគុណបងដែលចូលមកថ្នមថែបេះដូងអូន បងធ្វើអោយស្នេហានេះស្រស់ស្អាតខ្លាំង បងអោយតម្លៃអូន លើសអ្វីដែលអូនប្រថ្នា អូនមិនដែលទាមទាតែបងផ្ដល់អោយគ្រប់យ៉ាង បងធ្វើអោយអូនមានអារម្មណ៍ថា ខ្លួនសំណាងណាស់ បងទុកអូនដូចជាព្រះនាងម្ចាស់…អរគុណដែរចូលមកក្នុងជីវិតអូន 🙏🏻 ។
ដោយឡែក សម្រាប់គូស្នេហ៍របស់នាង គឺតារាសម្តែងលោកលាវ វេងហួរ បានបង្ហោះសំណេររបស់ខ្លួនដែរថា ថ្ងៃកំណើតដ៏សែនពិសេស អរគុណអូនដែលបានចូលមកជីវិតបង ដែលបានធ្វើឲ្យជីវិតបងមានសម្រស់និងមានន័យ បងសន្យាថា បងនឹងការពារបេះដូងអូនអស់មួយជីវិត ។
យ៉ាងណា តាមរយៈសកម្មភាពខាងលើនេះ ទស្សនិកជន មិត្តភក្តិ ជាពិសេស បណ្តាអ្នកគាំទ្រជាច្រើនបានចូលរួមសម្តែងការអបអរសាទរក្នុងពេលដែលចំណងស្នេហ៍របស់ពួកគេទាំងពីរបានឈានឡើងមួយកម្រិតទៀត ខណៈពេលដែលគេរំពឹងអ្នកទាំងពីរនឹងដឹកដៃគ្នាចូលរោងការឆាប់ៗខាងមុខនេះ ។
គូស្នេហ៍បវរកញ្ញា-បុរសឯក កញ្ញា រឿន ណាត និងលោក លាវ វេងហួរ កាន់តែស្អិតរមួតឡើងរាល់ថ្ងៃ ហើយជារឿយៗគេរមែងឃើញគូស្នេហ៍ថ្មីថ្មោងនេះ បង្ហាញភាពស្និទ្ធស្នាលដាក់គ្នាលើបណ្តាញសង្គម ។
កន្លងមក រឿន ណាត និងគូស្នេហ៍ធ្លាប់បានប្រាប់មិនលាក់លៀមថា អ្នកទាំងពីរប៉ះក្រសែភ្នែកគ្នាដោយសារការថតខ្សែភាពយន្តជាមួយគ្នា ពោលគឺស្នេហាបែបឃើញភ្លាមស្រលាញ់ភ្លែតតែម្តង។ ដោយភាគីខាងស្រីជាអ្នកចាប់អារម្មណ៍មុន តែខាងប្រុសជាអ្នកហ៊ានផ្តោះផ្តងស្នេហា ដោយពុំគិតថា អាចស្រវាផ្កាមួយទងនេះមកកាន់ក្នុងដៃបានឡើយ ។ តែផ្ទុយស្រឡះ រឿន ណាត និង លាវ វេងហួរ បើកភ្លើងខៀវឱ្យគ្នាទៅវិញទៅមក រហូតបង្កើតបានទំនាក់ទំនងស្នេហាផ្អែមល្អែមដូចសព្វថ្ងៃនេះ ៕
ចែករំលែកព័តមាននេះ