ប្រទេសថៃ ៖ មហាជន ជាពិសេសស្នេហាវិស័យភាពយន្តថៃ បានសម្តែងការព្រួយបារម្ភយ៉ាងខ្លាំងចំពោះស្ថានភាពផ្លូវចិត្តតួឯកស្រីក្នុងខ្សែភាពយន្តដ៏ល្បីរបស់ថៃ «I Fine..Thank You..Love You» កញ្ញា…
ប្រទេសថៃ ៖ មហាជន ជាពិសេសស្នេហាវិស័យភាពយន្តថៃ បានសម្តែងការព្រួយបារម្ភយ៉ាងខ្លាំងចំពោះស្ថានភាពផ្លូវចិត្តតួឯកស្រីក្នុងខ្សែភាពយន្តដ៏ល្បីរបស់ថៃ «I Fine..Thank You..Love You» កញ្ញា Ice Preechaya បន្ទាប់ពីនាងភ្លេចបិទការឡាយវីដអូ (Live) លើកម្មវិធី TikTok ពេលកំពុងងូតទឹកក្នុងផ្ទះរបស់នាងយ៉ាងភ្ញាក់ផ្អើលនៅលើបណ្តាញអ៊ីនធឺណិត កាលពីពេលថ្មីៗនេះ។
រឿងហេតុកើតឡើង កាលពីថ្ងៃទី១៨ ខែសីហា ឆ្នាំ២០២៤ នៅពេលដែលតារាស្រី Ice Preechaya កំពុងឡាយវីដេអូ (ផ្សាយផ្ទាល់) ជជែកលេងជាមួយអ្នកគាំទ្រនៅលើកម្មវិធី TikTok មុនចូលបន្ទប់ទឹក។ ប៉ុន្តែតួឯកស្រីរឿង I Fine..Thank You..Love You ដ៏ល្បីក្នុងឆ្នាំ ២០១៤ វ័យ៣១ឆ្នាំរូបនេះ ស្រាប់តែភ្លេចបិទការឡាយ ហើយចូលត្រាំនៅក្នុងអាងទឹក និងលើកជើងដុសសាប៊ូដោយមិនបានដឹងថា សកម្មភាពរបស់នាងត្រូវបានផ្សាយផ្ទាល់អស់រយៈពេលជាច្រើននាទី មុនពេលនាងដឹងខ្លួន ហើយលុបវីដេអូនោះចោល។
ទោះយ៉ាងណាក៏ដោយ សកម្មភាពនៅក្នុងបន្ទប់ទឹករបស់តារាស្រីរូបនេះ ត្រូវបានអ្នកលេងអ៊ីនធឺណិតមួយចំនួន ដែលកំពុងមើលការឡាយនោះបានថតវីដេអូឃ្លីបទុក ហើយបានបន្តចែករំលែកលើបណ្តាញសង្គម និងក្លាយជាប្រធានបទដ៏ក្តៅគគុកនៅក្នុងប្រទេសថៃ។
តាមប្រភពពីសារព័ត៌មានថៃ Thairath កាលពីថ្ងៃទី១៩ ខែសីហា កន្លងទៅ បានឱ្យដឹងថា ក្រោយកើតមានរឿងហេតុដ៏ចៃដន្យរួចមក បណ្តាអ្នកគាំទ្រ Ice នាំគ្នាសម្តែងការព្រួយបារម្ភយ៉ាងខ្លាំងអំពីស្ថានភាពផ្លូវចិត្តរបស់តារាស្រីរូបនេះ។
ស្របពេលដែលថ្មីៗនេះ អ្នកគ្រប់គ្រងតារាស្រីរូបនេះ បានប្រាប់អ្នកសារព័ត៌មាន Thairath ក៏ដូចជាការបង្ហោះសេចក្តីថ្លែងការណ៍មួយ ជុំវិញហេតុការណ៍នោះថា «Ice សូមអភ័យទោសដល់អ្នកទាំងអស់គ្នា និងសុំសេចក្តីសប្បុរសរបស់បងប្អូនទាំងអស់គ្នា បញ្ឈប់ការចែករំលែក ឬផ្សព្វផ្សាយវីដេអូតទៅទៀត ពេលនេះ Ice មានអារម្មណ៍សោកស្តាយ និងអាម៉ាស់ខ្លាំងណាស់ ហើយទទួលយកកំហុសដែលបានកើតឡើង។ ហើយនេះជាមេរៀនសំខាន់មួយសម្រាប់ Ice ក្នុងការឡាយវីដេអូ និងការបង្ហោះផ្សេងៗនៅលើបណ្តាញសង្គម»។
នៅក្នុងថ្ងៃជាមួយគ្នានោះផងដែរ មេធាវីថៃម្នាក់ បានចេញមុខព្រមានអ្នកលេងអ៊ីនធឺណិតឱ្យមានការប្រុងប្រយ័ត្នខ្ពស់ចំពោះបទឧក្រិដ្ឋ នៃការចែករំលែកវីដេអូឃ្លីប ដែលបែកធ្លាយរបស់តារាស្រី អាយ ព្រីឆៃយ៉ា ដោយបាននិយាយថា វាជាបទល្មើសក្រោមច្បាប់ស្តីពីឧក្រិដ្ឋកម្មកុំព្យូទ័រ ដែលផ្តន្ទាទោសដាក់ពន្ធនាគារមិនលើសពី៥ឆ្នាំ និង/ឬពិន័យជាសាច់ប្រាក់លើសពី១០ម៉ឺនបាត ដែលស្មើនឹង ៣ពាន់ដុល្លារអាមេរិក ពីព្រោះការនាំយករូបភាពអាសអាភាស ឬប្រព័ន្ធផ្សព្វផ្សាយអាសអាភាសទៅក្នុងប្រព័ន្ធកុំព្យូទ័រ បង្កការខូចខាត ឬភាពអាម៉ាស់ដល់អ្នកដទៃ។
គួរឱ្យដឹងថា មួយរយៈចុងក្រោយនេះ កញ្ញា អាយ ព្រីឆៃយ៉ា ជួបប្រទះបញ្ហាមិនចេះចប់មិនចេះហើយ ទាំងបញ្ហានៅក្នុងគ្រួសារ និងបញ្ហាស្នេហាផងដែរ។ ហើយនៅក្នុងនោះរួមទាំងករណីដែលឈ្មោះតារាស្រីរូបនេះ ត្រូវបានយកទៅជាប់ពាក់ព័ន្ធជាមួយនឹងជនសង្ស័យមានឈ្មោះថា Am ដែលត្រូវបានដឹងថាបានសម្លា.ប់មិត្តភក្តិរបស់ខ្លួន ដោយការបំពុលនឹងថ្នាំ Cyanide។ ឆ្លងកាត់រឿងរ៉ាវខ្មៅងងឹតមិនចេះចប់មិនចេះហើយ បានបន្ថែមសម្ពាធផ្លូវចិត្តលើតារាស្រីរូបនេះ រហូតដល់នាងចង់បញ្ចប់ជីវិតរបស់ខ្លួនថែមទៀតផង៕
ចែករំលែកព័តមាននេះ