កំពូលតារាកំប្លែងនាយក្រឹម ៖ ជីវិតសិល្បៈប្រៀបដូចសត្វស្រមោច !
- ភ្នំពេញ
តារាកំប្លែង នាយក្រឹម បានប្រៀបប្រដូចជីវិតសិល្បៈទៅនឹងសត្វស្រមោច ដែលត្រូវខំប្រឹងធ្វើការងារនៅរដូវប្រាំង ដើម្បីសល់ប្រាក់ខ្លះទុករដូវវស្សា ដែលគ្មាន
តារាកំប្លែង នាយក្រឹម បានប្រៀបប្រដូចជីវិតសិល្បៈទៅនឹងសត្វស្រមោច ដែលត្រូវខំប្រឹងធ្វើការងារនៅរដូវប្រាំង ដើម្បីសល់ប្រាក់ខ្លះទុករដូវវស្សា ដែលគ្មានការងារធ្វើ ។
លោក អ៊ូ ប៊ុណ្ណារ៉ាត់ ហៅនាយក្រឹម បានប្រឡូកក្នុងវិថីសិល្បៈជាង៤០ឆ្នាំមកហើយ ដោយលោកបានចាប់ផ្តើមពីអាជីពជាអ្នកវ៉ាយស្គរ ល្ខោនបាសាក់ មកជាតារាកំប្លែងនៅក្នុងភាពយន្តជាច្រើន រហូតធ្វើឱ្យកេរ្តិ៍ឈ្មោះរបស់លោកល្បីខ្ទរខ្ទារទាំងក្នុង និងក្រៅប្រទេស និងទទួលបានប្រាក់ចំណូលច្រើន ដើម្បីចិញ្ចឹមជីវិត ។
មកទល់ពេលនេះ នាយក្រឹម នៅតែបន្តអាជីពសម្តែងកំប្លែងដូចមុនដដែល បើទោះបីជាអាជីពនេះ មិនអាចរកប្រាក់ចំណូលបានច្រើនដូចពេលមុនក្តី លោកនៅតែប្រឹងប្រែងសម្តែង និងរក្សាកេរ្តិ៍ឈ្មោះក្នុងវិស័យនេះតទៅមុខទៀត ។
នាយ ក្រឹម បាននិយាយថា ជីវិតសិល្បៈប្រៀបដូចសត្វស្រមោច ដូចមហាជនដឹងស្រាប់ហើយថា សិល្បៈរកបានតែពេលរដូវប្រាំងប៉ុណ្ណោះ ចំណែរដូវវស្សា គឺពិបាកក្នុងការរកប្រាក់ចំណូលណាស់។ សូម្បីតែរូបលោកផ្ទាល់ រាល់ពេលចូលខែវស្សា គឺរកប្រាក់ចំណូលមិនបានច្រើននោះទេ ប៉ុន្តែសំណាងល្អលោកសល់លុយកាលពីរដូវប្រាំងខ្លះ ដើម្បីចាយវាយ និងផ្គត់ផ្គង់ជីវភាពគ្រួសារ ។
ជាមួយនឹងការត្អូញត្អែររកប្រាក់ចំណូលមិនសូវបានក្នុងរដូវវស្សានេះ នាយក្រឹម បានអំពាវនាវឱ្យសិល្បករកុំភ្លេចខ្លួន ចូរធ្វើខ្លួនដូចសត្វស្រមោច កុំធ្វើខ្លួនដូចជាសត្វរៃ បានត្រឹមតែហ៊ឺហារមួយគ្រា ដល់ពេលដែលជីវិតជួបការលំបាកត្អូញសុំជំនួយ ។
នាយ ក្រឹម គឺជាសិល្បករជើងចាស់ដ៏មានប្រជាប្រិយភាពម្នាក់ ឆ្នាំនេះលោកមានវ័យ៦៣ឆ្នាំហើយ ប៉ុន្តែសុខភាព និងរូបរាងរបស់លោកនៅតែមាំទាំល្អ ។ នាយក្រឹម កំពុងរីករាយជាមួយគ្រួសារថ្មីរបស់លោក ជាក់ស្តែងតាំងពីភរិយាថ្មីលោកបង្កើតបានកូនភ្លោះស្រីទាំងពីរមក កាន់តែធ្វើឱ្យជីវិតគ្រួសារលោកមានសុភមង្គលឡើង ។
នាយ ក្រឹម មិនមានបំណងឱ្យកូនភ្លោះស្រីទាំងពីររបស់លោកប្រឡូកក្នុងវិស័យសិល្បៈឡើយ ដោយលោកចង់ឱ្យកូនស្រីរៀនបានខ្ពង់ខ្ពស់ មានចំណេះដឹងទៅបំរើការងារសង្គមវិញ ៕
ចែករំលែកព័តមាននេះ