ADផ្ទាំងផ្សព្វផ្សាយពាណិជ្ជកម្ម

Picture

សម្ដេចធិបតី ច្រានចោលចំពោះគំនិតផ្តួចផ្តើមហាមមិនឲ្យនាំរថយន្តចាស់ចូល

3 អាទិត្យ មុន
  • ភ្នំពេញ

រាជធានី​ភ្នំពេញ ៖ សម្ដេច​ធិ​បតី ហ៊ុន ម៉ា​ណែ​ត នាយក​រដ្ឋមន្ដ្រី​កម្ពុជា បាន​ច្រានចោល​ចំពោះ​គំនិត​ផ្តួចផ្ដើម ក្នុង​ការ​ហាម​មិន​ឲ្យ​នាំ​ចូល​រថយន្ដ​ចាស់​ចូល​ប្រទេស​កម្ពុជា ប៉ុន្ដែ​ត្រូវ​ពង្រឹង​ប្រព័ន្ធ​រថយន្ដ​នៅ​កម្ពុជា​ឲ្យ​បាន​ល្អ​វិញ ។…

រាជធានី​ភ្នំពេញ ៖ សម្ដេច​ធិ​បតី ហ៊ុន ម៉ា​ណែ​ត នាយក​រដ្ឋមន្ដ្រី​កម្ពុជា បាន​ច្រានចោល​ចំពោះ​គំនិត​ផ្តួចផ្ដើម ក្នុង​ការ​ហាម​មិន​ឲ្យ​នាំ​ចូល​រថយន្ដ​ចាស់​ចូល​ប្រទេស​កម្ពុជា ប៉ុន្ដែ​ត្រូវ​ពង្រឹង​ប្រព័ន្ធ​រថយន្ដ​នៅ​កម្ពុជា​ឲ្យ​បាន​ល្អ​វិញ ។

សម្ដេច​ធិ​បតី ហ៊ុន ម៉ា​ណែ​ត បាន​លើក​ឡើង​បែប​នេះ​នា​ឱកាស​អញ្ជើញ​ជា​អធិបតី​បើក​ការដ្ឋាន​សាងសង់​ស្ពាន​អាកាស​ភ្លោះ ចំណុចប្រសព្វ​មហាវិថី សម្តេច​តេ​ជោ ហ៊ុន សែន និង​ផ្លូវជាតិ​លេខ​២ ស្ថិត​នៅ​ព្រំប្រទល់​រាជធានី​ភ្នំពេញ និង​ខេត្តកណ្តាល នៅ​ថ្ងៃ​ទី​១៧ ខែមិថុនា ឆ្នាំ​២០២៤ ។

សម្ដេច​ធិ​បតី បាន​បញ្ជាក់​ថា​៖« មក​ដល់​ម៉ោង​នេះ នៅ​កម្ពុជា​មិន​ទាន់​មានការ​ចាំបាច់​ក្នុង​ការ​កំណត់​ឆ្នាំ​រថយន្ត​ចំពោះ​ការ​នាំ​ចូល​នោះ​ទេ ប៉ុន្ដែ​ត្រូវ​ពង្រឹង​ប្រព័ន្ធ​ពិនិត្យ​បច្ចេក​រថយន្ត​ឲ្យ​បាន​ល្អ​វិញ​ព្រោះថា មួយ​ឆ្នាំ​ៗ ត្រូវ​យក​រថយន្ដ​មក​ឆៀក​ម្ដង​ៗ» ។

សម្ដេច​ធិ​បតី នាយក​រដ្ឋមន្ដ្រី បាន​លើក​ឡើង​ថា «​ថ្ងៃមុន​ក៏​មានការ​គិត​អំពី​ការ​កំណត់​ឆ្នាំ​នាំ​ចូល​រថយន្ដ ខ្ញុំ​ថា កុំ​អី​ត្រូវ​ពង្រឹង​ប្រព័ន្ធ​ឆៀក ប្រព័ន្ធ​ឆែក​បច្ចេកទេស​ឲ្យ​បាន​រឹង​មាំ​វិញ ។ កាល​មុន​មាន​កិច្ចប្រជុំ ឯកឧត្តម អូន ព័ន្ធ​មុនី​រ័​ត្ន សូម​យោបល់​ខ្ញុំ ដោយសារ​គិតគូរ​អំពី​បរិស្ថាន ចឹ​ង​ក៏​បាន​គិតគូរ​អំពី​ស្នើ​សុំ​ថា ឥឡូវ​គួរតែ​ហាម​ឆ្នាំ​២០២៤​នេះ​ហាម​មិន​ឲ្យ​នាំ​រថយន្ដ​លើស​អាយុ​១០​ឆ្នាំ ដល់​ឆ្នាំ​២០៣០ ហាម​មិន​ឲ្យ​នាំ​ចូល​រថយន្ដ​ដែល​អាយុ​៥​ឆ្នាំ ដើម្បី​យើង​ធានា​រថយន្ដ​ឲ្យ​ល្អ កុំ​ឲ្យ​ប៉ះពាល់​បរិស្ថាន ខ្ញុំ​ថា​ដក​ចោល​ទៅ​» ។

រូបតំណាង

ជាមួយ​គ្នា​នោះ​ដែរ សម្ដេច​ធិ​បតី ក៏​បាន​លើក​ឡើង​ថា ប្រទេស​ខ្លះ​គេ​ហាម​នាំ​ចូល​រថយន្ដ​ចាស់ ដើម្បី​លើក​ស្ទួយ​វិស័យ​កម្រិត​ឧស្សាហកម្ម​រថយន្ដ​នៅ​ក្នុង​ប្រទេស ។ ដោយឡែក ក្រុមហ៊ុន​ដំឡើងរថយន្ដ​នៅ​កម្ពុជា ក៏​លើកទឹកចិត្ត ប៉ុន្ដែ​ពួក​គាត់​មាន​សិទ្ធិ​ប្រកួតប្រជែង​ជាមួយ​អ្នក​នាំ​ចូល​រថយន្ដ​មួយ​ទឹក ។

នា​ឱកាស​នោះ​ដែរ សម្ដេច​ធិ​បតី នាយក​រដ្ឋមន្ត្រី សង្កត់ធ្ងន់​ថា រដ្ឋ​មិន​អាច​ហាមឃាត់​មិន​ប្រជាពលរដ្ឋ​ដែល​រស់នៅ​ក្នុង​រាជធានី​ភ្នំពេញ​មិន​ឱ្យ​ទិញ​រថយន្ត ឬ​ម៉ូតូ​បាន​ទេ ព្រោះ​នេះ​តម្រូវការ​របស់​ពលរដ្ឋ ហើយ​នេះ​ក៏​សរ​បញ្ជាក់​ពី​ការ​រីក​ចម្រើន​យ៉ាង​លឿន​នៅ​ក្នុង​រាជធានី​ភ្នំពេញ និយាយ​ដោយឡែក និង​និយាយ​ជា​រួមការ​រីក​ចម្រើន​នៅ​ទូ​ទាំង​ប្រទេស ។ សម្ដេច​ធិ​បតី​បាន​អះអាង​ថា ដរាបណា ប្រទេស​នៅ​តែ​មាន​សុខ​សន្តិភាព ភាព​រីក​ចម្រើន​នឹង​នៅ​តែ​មាន​ទៅ​មុខ​បន្ថែម​ទៀត​៕

អត្ថបទសរសេរ ដោយ

កែសម្រួលដោយ