ខេត្តឧត្តរមានជ័យ ៖ មានផ្លូវមានជីវិត មានស្ពានមានសង្ឃឹម ។ ខណៈផ្លូវស្ពានថ្នល់ជាច្រើននៅទូទាំងប្រទេស ត្រូវរាជរដ្ឋាភិបាលកសាងជាបន្តបន្ទាប់ ដើម្បីបម្រើប្រយោជន៍ដល់ប្រជាជនក្នុងការប្រើប្រាស់ និងដឹកជញ្ជូនទំនិញ ។…
ខេត្តឧត្តរមានជ័យ ៖ មានផ្លូវមានជីវិត មានស្ពានមានសង្ឃឹម ។ ខណៈផ្លូវស្ពានថ្នល់ជាច្រើននៅទូទាំងប្រទេស ត្រូវរាជរដ្ឋាភិបាលកសាងជាបន្តបន្ទាប់ ដើម្បីបម្រើប្រយោជន៍ដល់ប្រជាជនក្នុងការប្រើប្រាស់ និងដឹកជញ្ជូនទំនិញ ។
យ៉ាងណាមិញ នៅតំបន់មួយក្នុងខេត្តឧត្តរមានជ័យ ពលរដ្ឋនិងព្រះសង្ឃកំពុងដង្ហោយរកការជួយសង្គ្រោះដើម្បីបានស្ពានថ្មី ខណៈស្ពានដែលមាននាពេលបច្ចុប្បន្នេះ គឺមានសភាពចាស់ទ្រុឌទ្រោម ដែលងាយបង្កហានិភ័យដល់អ្នកប្រើប្រាស់ ។
ប្រាកដណាស់ កាលពីថ្មីៗកន្លងទៅនេះ ស្ពានកម្សត់មួយកន្លងដែលពោលខាងលើ គឺមានទីតាំងនៅទីជនបទដាច់ស្រយាល មានសភាពចាស់ខ្លាំង ធ្វើអោយមហាជនអ្នកប្រើប្រាស់បណ្តាញសង្គម ដែលបានឃើញវីដេអូអំពីស្ពានកម្សត់មួយនេះ សម្តែងការព្រួយបារម្ភជំនួសបងប្អូន ដោយស្ពានធ្លាប់តែឆ្លងទៅមករាល់ថ្ងៃ ពេលនេះ ស្ពានបែរជាចាស់ទ្រុឌទ្រោម ឆ្លងទៅមកលែងចង់កើត ឈើក៏ពុកជើងសសរក៏មិនមាំ ឆ្លងម្តងណាខ្លាចម្តងនោះ ។
មែនទែនទៅ តាមរយៈរូបភាពឃើញថា ស្ពានមួយនេះសភាពចាស់ទ្រុឌទ្រោមណាស់ទៅហើយ ដោយប្រជាជនក្នុងភូមិមានការខ្វះខាតពិបាកក្នុងការជុសជុល ។ នៅរដូវទឹកឡើង គឺលិចស្ពាន ដូច្នេះ ស្ពានអូរជីក ឬស្ពាន៩៧នេះ តែងលិចលង់និងខូចខាតយ៉ាងដំណាំពេលរដូវវស្សា ហើយស្ពានក៏លិចផងដែរ ។
ស្ពានកម្សត់ដែលពលរដ្ឋដង្ហោយរកការជួយសង្គ្រោះ គឺស្ពានអូរជីកស្ថិតក្នុងភូមិ៩៧ ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ។ កន្លងមក ស្ពានមួយនេះ បានជួយប្រជាពលរដ្ឋឆ្លងទៅមករាល់ថ្ងៃឥតជិនណាយនោះឡើយ មិនថា ព្រះសង្ឃ សិស្សសាលា លោកគ្រូ អ្នកគ្រូ កសិករ ឬបងប្អូនអ្នកលក់ដូរក្តី បានពឹងពាក់អាស្រ័យឆ្លងទៅមក ។
គួរបញ្ជាក់ដែរថា ស្ពាន៩៧នេះ ជាអាយុច្រើនណាស់ហើយ ស្ពាននេះធ្វើឡើងដោយប្រជាពលរដ្ឋក្នុងភូមិកាលពីកន្លងទៅ ព្រះសង្ឃនិមិត្តបិណ្ឌបាតក៏ពិបាក អ្នកដំណើរឆ្លងកាត់ជិះមិនស្រួលចិត្ត ពោលគឺឆ្លងកាត់ស្ពានចាស់ទាំងព្រលឹងចុងសក់ ។
តាមរយៈបទសម្ភាសន៍ជាមួយកម្មវិធី 60Buzz នៃសារព័ត៌មានកោះសន្តិភាព គុណម្ចាស់ព្រះនាម អាន អាន បានមានសង្ឃដីកាថា ស្ពានអូរជីក ឬស្ពាន៩៧នេះ បានកសាងឡើងក្នុង ១៩៩៩ មកម្ល៉េះ ដោយប្រជាពលរដ្ឋ ។ គុណម្ចាស់បន្តថា ដល់ពេលរដូវវស្សាចូលមកដល់ ទឹកក៏ឡើង ភ្លៀងក៏ធ្លាក់ បានធ្វើអោយស្ពាននេះលិចលង់ដូច្នេះ ពីមួយឆ្នាំទៅមួយឆ្នាំ ទឹកតែងខាំជាប់នឹងស្ពាន ធ្វើអោយស្ពានពុកផុយ មិនអាចអោយមនុស្សម្នាពឹងពាក់អាស្រ័យទៅមុខស្ទើរមិនបាន ។
ស្ថានភាពបច្ចុប្បន្ន ស្ពាននេះពិតជាចាស់ខ្លាំងណាស់ទៅហើយ ដោយអាយុកាលដល់ជាង២៥ឆ្នាំ ទើបគុណម្ចាស់ សូមបិណ្ឌបាតពីសប្បុរសជន ពិសេសថ្នាក់ដឹកនាំប្រទេស ដើម្បីអាចមានលទ្ធភាពសង់ស្ពានថ្មី ។ ព្រះអង្គ អាន អាន មានថេរដីកាបន្តថា ព្រោះសព្វថ្ងៃនេះ គឺស្ពាននេះដើរតួនាទីសំខាន់ណាស់ ក្នុងការធ្វើដំណើររបស់ប្រជាពលរដ្ឋឧបាសក ឧបាសិកា កូនសិស្សឆ្លងទៅរៀន និងបម្រើផលប្រយោជន៍ជាច្រើនទៀតឥតគណនា ។ ប្រសិនបើគ្មានស្ពាននេះទេ ក៏មានផ្លូវវាងដែរ តែផ្លូវវាងគឺឆ្ងាយ អាចថាពិបាកសម្រាប់អ្នកធ្វើដំណើរ ។
គុណម្ចាស់បន្តថា ជារៀងរាល់ឆ្នាំស្ពានមួយនេះតែងជុសជុល ដោយប្រជាពលរដ្ឋក្នុងភូមិ ហើយស្ពានអូរជីកនេះមានកម្ពស់ប្រមាណ១០ម៉ែត្រ បណ្តាយ៥០ម៉ែត្រ ធ្វើឡើងពីឈើសុទ្ធនោះ។ ជាចុងក្រោយ គុណម្ចាស់សុំអោយបងប្អូនមហាជនក្នុងបណ្តាញសង្គមជួយដល់ស្ពានមួយនេះផង ព្រោះប្រជាជនក្នុងតំបន់នេះពួកគាត់ភាគច្រើនខ្វះខាត សុទ្ធតែជាប្រជាកសិករ រកមួយថ្ងៃបានមួយថ្ងៃ ដូច្នេះបានជួសជួលស្ពាន គ្មានលទ្ធិភាពធ្វើស្ពានថ្មី ដោយបច្ចុប្បន្ននេះស្ពាននេះពុកផុយទៅហើយ៕ ដោយ៖លីហួ គីមឆាយ.
ចែករំលែកព័តមាននេះ