រាជធានីភ្នំពេញ ៖ តារាសម្តែងអ្នកនាង ចន ច័ន្ទលក្ខិណា បានបោះពាក្យសម្តីជាការឆ្លើយតបទៅកាន់តារាជើងចាស់មួយរូបដែលនៅតែបន្តធ្វើការរិះគន់មកលើរូបនាង ក្នុងតំណែងជាប្រធានសមាគមសិល្បៈករខ្មែរ ដែលនាងនឹងត្រូវបញ្ចប់អាណត្តិនាពេលខាងមុខនេះ ។ ដោយមិនបញ្ចេញឈ្មោះជាអ្នកសិល្បៈជើងចាស់ណាឲ្យច្បាស់នោះ អ្នកនាង ចន ច័ន្ទលក្ខិណា បានសម្តែងការមិនសប្បាយចិត្ត ត្បិតអ្នកសិល្បៈរូបនោះនៅតែបន្តការរិះគន់ចោទប្រកាន់គ្រប់បែបយ៉ាងក្នុងតំណែងជាប្រធានសមាគម បើទោះបីជាអ្នកនាងបានប្រកាន់គោលជំហរថានឹងមិនបន្តឈរឈ្មោះសម្រាប់ការបោះឆ្នោតជាប្រធានសមាគមសម្រាប់អាណត្តិថ្មីនាពេលនេះក៏ដោយ ។
អ្នកនាង ចន ច័ន្ទលក្ខិណា បានលើកឡើងថា សិល្បកររៀមច្បងខ្លះនៅតែព្យាយាមនិយាយប៉ះពាល់ដល់តួនាទីប្រធានសមាគមសិល្បៈដដែលៗសឹងគ្រប់ការ Live របស់គាត់ កន្លងមករៀមច្បងតែងនិយាយក្នុងការ Live ជារៀងរាល់ពេល គឺតែងរិះគន់ខ្ញុំផងចោទប្រកាន់ខ្ញុំផង មើលងាយខ្ញុំផង ជាន់ឈ្លីកិត្តិយសតួនាទីការងារខ្ញុំគ្រប់បែបយ៉ាង ទាំងនាងខ្ញុំមិនតបតអ្វីសោះ ហើយនាងខ្ញុំក៏បានបកស្រាយដោយសុជីវធម៌រួចមកហើយ តែរៀមច្បងនៅតែមិនស្តាប់ ឬធ្វើពើ និងនៅតែបំពានបំផ្លើស មុសានាងខ្ញុំគ្រប់បែបយ៉ាង នេះ ឬទង្វើគំរូដ៏ល្អរបស់សិល្បករសិល្បការនីរៀមច្បងដែលចង់អោយក្មេងៗគោរពយកគំរូតាម? ។
អ្នកនាងបញ្ជាក់ថា បើចង់អោយខ្ញុំឆាប់ចុះចេញពីតំណែងនេះតាមចិត្តរៀមច្បង សូមរៀមច្បងប្រើការអត់ធ្មត់បែបមនុស្សដែលមានចរិតចាស់ទុំខ្លះទៅ ព្រោះនាងខ្ញុំបានប្រកាសហើយថា នឹងមិនឈរឈ្មោះបោះឆ្នោតទៀតទេ ទោះបីជាមានការជំរុញលើកទឹកចិត្តពីសិល្បករចាស់ជរា និងបងប្អូនសិល្បៈជាច្រើនក្ដី ហើយខ្ញុំចង់បញ្ជាក់ប្រាប់រៀមច្បងថា មិនមែនខ្ញុំមិនអាចត្រឡប់មកឈរឈ្មោះអោយគេបោះឆ្នោតបានដោយយោងតាមការខមិនរិះគន់របស់មហាជនដូចរៀមច្បងចោទនោះទេ ។
អ្នកនាងបន្តថា បើរៀមច្បងចង់យកប្រជាប្រិយភាព តាមរយៈការខមិនរបស់មហាជនមករើសប្រធានសមាគមសិល្បៈក្នុងអាណត្តិថ្មី ក្នុងនោះក៏មានបេក្ខភាពរៀមច្បងម្នាក់ដែរ ដែលមហាជនមិនគាំទ្រ ។ នាងខ្ញុំគ្រាន់តែចង់យកពេលដែលនៅសេសសល់ខិតខំបំពេញតួនាទីក្នុងនាមជាប្រធានសមាគមឱ្យបានល្អតែប៉ុណ្ណោះ ជាពិសេស គឺរៀបចំឱ្យការបោះឆ្នោតជ្រើសរើសប្រធានសម្រាប់អាណត្តិថ្មីប្រព្រឹត្តទៅដោយរលូន ត្រឹមត្រូវ និងយុត្តិធម៌ ស្របតាមឆន្ទៈសិល្បករម្ចាស់សន្លឹកឆ្នោត ដូច្នេះសូមរៀមច្បងទុកឱកាសអោយខ្ញុំបំពេញតួនាទីអោយបានចប់ចុងចប់ដើមផង ខ្ញុំមិនដើរចេញមុនកំណត់ដូចរៀមច្បងនិយាយបំពានការពិតពីខ្ញុំនោះទេ ។
ដោយឡែកចំពោះបញ្ហាស្វែងរកទីផ្សារជូនដល់សិល្បករ គឺសមាគមមិនមានអំណាច ឬបុព្វសិទ្ធពិសេសអ្វីក្នុងការស្វែងរកការងារជូនសិល្បករបានគ្រប់គ្នានោះទេ ប៉ុន្តែសមាគមគ្រាន់តែមានលទ្ធភាពត្រឹមការអំពាវនាវដល់សិល្បករគ្រប់ៗរូបអោយពង្រឹងបន្ថែមនូវសមត្ថភាព បង្កើតការទំនាក់ទំនងល្អ និងបង្កើនប្រជាប្រិយភាពអោយកាន់តែខ្លាំង ព្រោះថា ស្ថានភាពការប្រកួតប្រជែងក្នុងទីផ្សារសិល្បៈ គឺមានទំហ៊ំធំទូលំទំលាយ សិល្បករថ្មីៗរះមកច្រើន ឯតម្រូវការការងារ គឺនៅមានកម្រិតចាំបាច់ម្នាក់ៗត្រូវខិតខំខ្លួនឯងផងដែរ ហើយក៏អាស្រ័យទៅលើអត្តចរិតបុគ្គលម្នាក់ៗដែលធ្វើការចុះសម្រុងជាមួយក្រុមការងារ និងការទំនាក់ទំនងល្អ និងសង្គម ។ ហើយការចោទប្រកាន់ថា សមាគមបក្សពួក តើបក្សពួកត្រង់ចំណុចណា ចំពោះអ្នកណាខ្លះ ឬយកបញ្ហាផ្ទាល់ខ្លួនឯងមកចោទសមាគម?
នាងបញ្ជាក់ថា ចំពោះបញ្ហារបស់រៀមច្បងកន្លងមក គឺប្រធានក្រុមប្រឹក្សាភិបាលជាអ្នកធ្វើការងារនេះជាមួយរៀមច្បង តែរៀមច្បងនៅតែទាមទារអោយប្រធានចេញមុខដោយផ្ទាល់ ។ តើរៀមច្បងចង់បានអ្វីអោយប្រាកដ បើរៀមច្បងចង់បានភាពកក់ក្តៅការសួរសុខទុក្ខពីប្រធានចាំបាច់អ្វីរៀមច្បងជ្រើសយកការ Live និយាយបែបដៀមដាមញ៉ុះញង់អោយហ្វេនៗរបស់រៀមច្បងមកជេរវា.យប្រហារខ្ញុំជាប្រធានធ្វើអី ? ។
សូមកុំព្យាយាមចង្អុលមកអ្នកដទៃដោយភ្លេចថា ម្រាមដៃ៤ទៀតបានចង្អុលមកខ្លួនឯង ។ នាងខ្ញុំជឿជាក់ថា សាធារណជនមួយចំនួន ថ្នាក់ដឹកនាំ ជាពិសេសបងប្អូនសិល្បករ-សិល្បការិនី មួយចំនួនធំលោកយល់ច្បាស់ ហើយនិងបានដឹងពីទង្វើរបស់រៀមច្បងកន្លងមក និងបច្ចុប្បន្ន ព្រោះលោកមានសុភវិនិច្ឆ័យគ្រប់គ្រាន់ ដើម្បីចូលរួម និងគាំទ្រសមាគមសិល្បករខ្មែរ ។
យ៉ាងណាបើតាមអ្នកនាង ចន ច័ន្ទលក្ខិណា ក្រុមប្រឹក្សាភិបាលរបស់សមាគមសិល្បករខ្មែរកំពុងតែរៀបចំនិតិវិធី និងគោលការណ៍ក្នុងការបោះឆ្នោតជាមួយ និងតំណាងក្រសួងវប្បធម៌ និងវិចិត្រសិល្បៈ នាខែកក្កដាខាងមុខនេះ ។ យើងខ្ញុំនឹងជូនដំណឹងកាលបរិច្ឆេទជាក់លាក់ជូនបងប្អូន ៕
ចែករំលែកព័តមាននេះ