តារាចម្រៀងលោក ម៉ៅ ហាជី បានចេញមុខសុំទោសជាសាធារណៈចំពោះមហាជនចំពោះកំហុសដែលលោកបានសាងនៅក្នុងបទចម្រៀងមួយដែលយកលំនាំតាមបទនិពន្ធសម្តេចសង្ឃរាជ ជួន ណាត ។ បទថ្មីរបស់តារាចម្រៀងរូបនេះ មានចំណងជើងថា Team…
តារាចម្រៀងលោក ម៉ៅ ហាជី បានចេញមុខសុំទោសជាសាធារណៈចំពោះមហាជនចំពោះកំហុសដែលលោកបានសាងនៅក្នុងបទចម្រៀងមួយដែលយកលំនាំតាមបទនិពន្ធសម្តេចសង្ឃរាជ ជួន ណាត ។
បទថ្មីរបស់តារាចម្រៀងរូបនេះ មានចំណងជើងថា Team ទឹកត្នោតជូរ បានធ្វើឡើងដោយមានលាយលំនាំមេឡូឌីបទដែនខ្មែរ ដែលជាព្រះរាជនិពន្ធដោយសម្តេចសង្ឃរាជ ជួន ណាត ដោយយកកែខ្លឹមសារថ្មីជាមួយបទភ្លេងបែបញ័រកន្ទាក់ ។
ក្រោយការបង្ហោះបទចម្រៀងខាងលើ នៅតាមបណ្តាញសង្គមនោះតារាចម្រៀងលោក ម៉ៅ ហាជី បានទទួលរងការរិះគន់ពីមហាជនដូចទឹកបាក់ទំនប់ ដោយម្នាក់ៗយល់ឃើញថា នេះជាកំហុសដ៏ធំមួយដែលមិនគួរយកលំនាំបទដែលគេយកប្រើសម្រាប់ជាតិយកមកកាឡៃទំនុកថ្មីផ្តេសផ្តាសបែបនេះឡើយ ។
យ៉ាងណាក្រោយរងការរិះគន់ ក៏ដូចជាការព្រមានពីក្រសួងវប្បធម៌អោយលុបបទនេះចេញវិញនោះ ទីបំផុតតារាចម្រៀងក្នុងផលិតកម្មថោនក៏បានសម្រេចចេញមុខសុំទោសជាសាធារណៈភ្លាមៗផងដែរ ។
តាមរយៈវីដេអូឃ្លីប ម៉ៅ ហាជី បានលើកឡើងថា បន្ទាប់ពីលោកបានចេញបទថ្មីមានចំណងជើងថា Team ទឹកត្នោតជូរ ដែលជាបទសប្បាយៗបែបស្រុកស្រែ ហើយក៏ធ្លាក់ចូលបន្តិចទៅក្នុងមេឡូឌីបទដែលជាព្រះរាជនិពន្ធដោយសម្តេចសង្ឃរាជ ជួនណាត ។
លោកបញ្ចាក់ថា តាមពិតបទនឹង (ដែនដីខ្មែរ) យើងធ្លាប់ច្រៀងហើយកាលពីក្មេង និងនៅរៀនតែដល់ពេលធំទៅយើងក៏ចង់ភ្លេចមេឡូឌី ហើយដល់ពេលធ្វើបទថ្មីក៏ចូលមេឡូឌីមួយនេះដោយមិនដឹង ។ លោកថា នៅពេលបង្ហោះបទនឹងទៅ(Team ទឹកត្នោតជូរ) ក៏មានបងប្អូនចូលទៅខំមិនសួរ ហេតុអីក៏យកបទសម្តេចសង្ឃដែលជាភ្លេងជាតិយកមកធ្វើចឹង ។
យ៉ាងណាបើតាមលោក ម៉ៅ ហាជី លោកទទួលស្គាល់នេះជាកំហុសអចេតនា ហើយលោកសង្ឃឹមបងប្អូនទាំងអស់គ្នានឹងអធ្យាស្រ័យ ហើយទៅថ្ងៃមុខសម្រាប់ជាតារាចម្រៀង និងអ្នកនិពន្ធ នឹងមិនធ្វើអ្វីអោយប៉ះពាល់ដល់ភ្លេងជាតិ និងបទណាមួយដែលជាបទប្រពៃណីខ្មែរយើងនោះឡើយ ។
លោកបញ្ជាក់ថា សម្រាប់បទនេះគឺមិនពាក់ព័ន្ធដល់ផលិតថោនឡើយ ដោយផលិតកម្មបានយកពីលោក ហើយបង្ហោះតាមលោកទេ ហើយបើបងប្អូនចង់ជេរអ្វីលោកនឹងទទួលយក ។ លោកបន្ថែមថា លោកពិតជាមានការសោកស្តាយ និងបន្ទោសខ្លួនឯងជាខ្លាំង ដែលបានសាងកំហុសមួយនេះ ហើយសង្ឃឹមថា បងប្អូននឹងទទួលការសុំទោសពីលោក និងការលើកលែងទោសចំពោះអ្នកនិពន្ធបទនេះផងដែរ ៕
ចែករំលែកព័តមាននេះ