រាជធានីភ្នំពេញ ៖ នៅទីបំផុត អ្នកនាង ខាត់ សុឃីម បានសម្រេចនឹងមិនចូលរួមឈរឈ្មោះសម្រាប់ការបោះឆ្នោតជ្រើសរើសធ្វើជាប្រធានសមាគមសិល្បករខ្មែរឡើយ បើទោះបីជានាងបានទទួលការគាំទ្រពីមហាជន និងអ្នកសិល្បៈច្រើនក៏ដោយ ។…
រាជធានីភ្នំពេញ ៖ នៅទីបំផុត អ្នកនាង ខាត់ សុឃីម បានសម្រេចនឹងមិនចូលរួមឈរឈ្មោះសម្រាប់ការបោះឆ្នោតជ្រើសរើសធ្វើជាប្រធានសមាគមសិល្បករខ្មែរឡើយ បើទោះបីជានាងបានទទួលការគាំទ្រពីមហាជន និងអ្នកសិល្បៈច្រើនក៏ដោយ ។
យ៉ាងណា តារាពហុជំនាញរូបនេះ បានសម្តែងការគាំទ្រចំពោះបេក្ខភាពលោកជំទាវស្រីតូច ចំណាន ធ្វើជាប្រធានសមាគម ដោយសារអ្នកគិតថា លោកជំទាវមានសមត្ថភាព និងថវិកាគ្រប់គ្រប់សម្រាប់ការដឹកនាំសមាគមមួយនេះ ។
ក្នុងបទសម្ភាសន៍ក្នុងកម្មវិធីមួយអ្នកនាង ខាត់ សុឃីម បានលើកឡើងថា តាំងមិនដើមមក អ្នកនាងមិនដែលប៉ងប្រាថ្នាតំណែងជាប្រធានសមាគមសិល្បៈនេះឡើយ ប៉ុន្តែដោយសារមានគាំទ្រ និងលើកយកឈ្មោះរបស់នាង សម្រាប់តំណែងមួយនេះទើបនាងពិចារណាធ្វើ ។ អ្នកនាងបញ្ជាក់ថា ការដឹកនាំសិល្បៈនេះ មិនមែនជារឿងងាយនោះឡើយ ព្រោះអ្នកនាងយល់ច្រើនចំពោះអ្នកសិល្បៈ ហើយចំណុចសំខាន់នោះនាងយល់ខ្លះពីដំណោះស្រាយចំពោះបញ្ហាអ្នកសិល្បៈចង់បាន ។
នាងថា អ្នកសិល្បៈត្រឹមចែកលុយគ្នាមិនស្មើឡើងប៉ុស្តិ៍ច្រើនជាងគ្នាក៏មានបញ្ហាដែរ តែមិនទាំងអស់ឡើយ អ្វីដែលសំខាន់ គឺត្រូវមានដំណោះស្រាយ ។ យ៉ាងបើតាមអ្នកនាង ខាត់ សុឃីម កន្លងមក ដោយមានការគាំទ្រពីមហាជន និងអ្នកសិល្បៈជាពិសេសពីស្វាមីនោះ អ្នកនាងគិតថា នឹងឈរឈ្មោះជាប្រធានសមាគមសិល្បករខ្មែរ ប៉ុន្តែមកដល់ពេលនេះ គឺអ្នកនាងសម្រេចនឹងមិនឈរឈ្មោះនោះឡើយ ។
អ្នកនាងបញ្ជាក់ថា មូលហេតុនាងមិនឈរឈ្មោះនោះ គឺដោយសារមានបេក្ខភាពអ្នកដែលមានសមត្ថភាព និងថវិកាគ្រប់សម្រាប់ធ្វើជាប្រធានសមាគមមួយនេះ គឺលោកជំទាវ ស្រីតូច ចំណាន ខណៈពេលនាងក៏គាំទ្របេក្ខភាពលោកជំទាវផងដែរ ។
នាងថា សម្រាប់នាងសមត្ថភាព គឺមានកម្រិត អញ្ចឹងបើនាងជាប្រធាននោះ គឺនាងនឹងត្រូវតែរ៉ៃអង្គាសថវិកាពីសប្បុរសជនដដែល ចឹងនាងមិនចង់អោយសិល្បៈមួយនេះត្រូវតែរ៉ៃអង្គាសរហូតចឹងនោះឡើយ ។ នាងបន្ថែមថា នាងចង់អោយសិល្បៈមួយនេះរីកលូតលាស់ ដោយសារមានអ្នកមានធនធានជួយជ្រោមជ្រែង ដោយមិនចាំបាច់ដើរសុំគេ ហើយអ្នកសិល្បៈទៀតសោតកុំដណ្តើមគ្នាឈ្នះ និងដណ្តើមគ្នាត្រូវ ពោលសំខាន់ត្រូវរួមគ្នា ដើម្បីសិល្បៈរីកលូតលាស់ ។
យ៉ាងណា ក្នុងនាមជាអ្នកសិល្បៈមួយរូប អ្នកនាង ខាត់ សុឃីម សូមស្នើសុំដល់ក្រសួងពាក់ព័ន្ធ ជាពិសេសក្រសួងវប្បធម៌ជួយធ្វើយ៉ាងណាបណ្តុះគំនិតក្មេងៗជំនាន់ក្រោយអោយបានចូលរៀននៅសាលាវិចិត្រសិល្បៈ ។
អ្នកនាងបញ្ជាក់ថា អ្នកសិល្បៈគួរចេញពីមូលដ្ឋានគ្រឹះពីសាលាដែលល្អផូរផង់ ដូចរៀមច្បងសិល្បៈចាស់ៗ ដែលពួកគាត់មានជំនាញ និងចំណេះគ្រប់គ្រាន់សម្រាប់បណ្តុះបណ្តាលដល់ក្មេងៗជំនាន់ក្រោយ ៕
ចែករំលែកព័តមាននេះ