ADផ្ទាំងផ្សព្វផ្សាយពាណិជ្ជកម្ម

Picture

ក្រសួង​ការងារ​បញ្ជ្រាប​ការ​យល់​ដឹង​ស៊ីជម្រៅ​ លើ​របប​សន្តិសុខ​សង្គម ​សម្រាប់​អ្នក​ក្នុង​បន្ទុក​សមាជិក ប​.​ស​.​ស​. ជា​មន្ត្រី​សាធារណៈ

1 ខែ មុន
  • ភ្នំពេញ

រាជធានីភ្នំពេញ៖ ឯកឧត្តម ហេង សុ​ផា​ន់​ណា​រិ​ទ្ធ អគ្គនាយករង ប​.​ស​.​ស​. នៅ​ថ្ងៃ​ទី​២០ ខែកុម្ភៈ ឆ្នាំ​២០២៤​ នេះ…

រាជធានីភ្នំពេញ៖ ឯកឧត្តម ហេង សុ​ផា​ន់​ណា​រិ​ទ្ធ អគ្គនាយករង ប​.​ស​.​ស​. នៅ​ថ្ងៃ​ទី​២០ ខែកុម្ភៈ ឆ្នាំ​២០២៤​ នេះ បាន​បញ្ជាក់​ថា ​ការ​អនុវត្ត​របប​សន្តិសុខ​សង្គម​ផ្នែក​ថែទាំ​សុខភាព ​តាម​របប​ភាគទាន​ដោយ​ស្ម័គ្រចិត្ត ​សម្រាប់​អ្នក​ក្នុង​បន្ទុក​សមាជិក ប​.​ស​.​ស​. ជា​មន្ត្រី​សាធារណៈ គឺជា​កម្មវិធី​របស់​រាជរដ្ឋាភិបាល​បង្កើត​ឡើង ដើម្បី​ជួយ​ដល់​មន្ត្រី​សាធារណៈ ឱ្យ​ទទួល​បានការ​ថែទាំ​សុខភាព​ សម្រាប់ខ្លួនឯង ប្តី​ឬ​ប្រពន្ធ​និង​កូន​ក្នុង​បន្ទុក ដែល​ជួយ​គ្រប់គ្រង​ចំណាយ​ លើ​បញ្ហា​សុខភាព និង​គ្រោះថ្នាក់​ផ្សេង​ៗ ក្នុង​គោលដៅ​រក្សា​លំនឹង​ប្រាក់​ចំណូល ​ក្នុង​គ្រួសារ និង​បង្កើន​ផលិតភាព​ការងារ ​។

ឯកឧត្តម​បាន​បន្ត​ថា នៅ​ពេល​អ្នក​ក្នុង​បន្ទុក​សមាជិក ប​.​ស​.​ស​. ជា​មន្ត្រី​សាធារណៈ គាត់​ចុះ​ឈ្មោះ​ជា​សមាជិក ប​.​ស​.​ស​. នោះ​អ្នក​ក្នុង​បន្ទុក (​ប្តី​ឬ​ប្រពន្ធ និង​កូន​នៅ​ក្នុង​បន្ទុក​) នឹង​ទទួល​បាន​អត្ថប្រយោជន៍​ដូច​ជា សេវា​ពិនិត្យ ពិគ្រោះ​យោបល់ ព្យាបាល និង​ថែទាំ ប្រាក់​បំណាច់​មាតុភាព និង​ប្រាក់​វិភា​ជន៍​បូជាសព នៅ​ពេល​ទទួល​រងគ្រោះថ្នាក់​ជាយថាហេតុ​ណាមួយ ​រហូត​បាត់​បង់ជីវិត ​។

គួរ​បញ្ជាក់​ថា ដើម្បី​បញ្ជ្រាប​ការ​យល់​ដឹង​ឱ្យ​កាន់តែ​ស៊ីជម្រៅ​ច្បាស់លាស់​បន្ថែម​ទៀត ​ទៅ​លើ​របប​សន្តិសុខ​សង្គម​ សម្រាប់​មន្ត្រី​សាធារណៈ និង​សហ​ព័ទ្ធ ព្រមទាំង​កូន​ក្នុង​បន្ទុក​នេះ កាលពី​ថ្ងៃ​ទី​១៥ ខែកុម្ភៈ ឆ្នាំ​២០២៤ បេឡា​ជាតិ​សន្តិសុខ​សង្គម (​ប​.​ស​.​ស​.) នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ បាន​រៀបចំ​ពិធី​ផ្សព្វផ្សាយ​ស្តី​ពី “​ការ​អនុវត្ត​របប​សន្តិសុខ​សង្គម​ផ្នែក​ថែទាំ​សុខភាព​តាម​របប​ភាគទាន​ដោយ​ស្ម័គ្រចិត្ត​សម្រាប់​អ្នក​ក្នុង​បន្ទុក​សមាជិក ប​.​ស​.​ស​. ជា​មន្ត្រី​សាធារណៈ​” នៅ​ទីស្ដីការគណៈរដ្ឋមន្ត្រី និង​ក្រសួង​សេដ្ឋកិច្ច និង​ហិរញ្ញវត្ថុ​ ។

ដើម្បី​ចុះ​ឈ្មោះ​អ្នក​ក្នុង​បន្ទុក​សមាជិក ប​.​ស​.​ស​. ចំពោះ ប្តី​ឬ​ប្រពន្ធ ត្រូវ​មាន អត្តសញ្ញាណ​បណ្ណ​សញ្ជាតិ​ខ្មែរ​, សៀវភៅ​ស្នាក់​នៅ​ឬ​សៀវភៅ​គ្រួសារ​, សេចក្តីចម្លង​សំបុត្រ​អាពាហ៍ពិពាហ៍​ ។

សម្រាប់​កូន​ក្នុង​បន្ទុក ត្រូវ​មាន​អត្តសញ្ញាណ​បណ្ណ​សញ្ជាតិ​ខ្មែរ​, សៀវភៅ​ស្នាក់​នៅ​ឬ​សៀវភៅ​គ្រួសារ​, សេចក្តីចម្លង​សំបុត្រ​កំណើត​។ ករណី​កូន​ក្នុង​បន្ទុក​មាន​ចំនួន​ចាប់ពី ២ នាក់​ឡើង ដែល​បំពេញ​គ្រប់​លក្ខខណ្ឌ​តម្រូវ​ឱ្យចុះ​ទាំងអស់​ ៕ អត្ថបទសហការ