ពិធិការិនី និងតារាសម្តែងនាង ឌួង ហ្ស៊ូរីដា បានចេញមុខការពារដល់អ្នកនាង ចន ច័ន្ទលក្ខិណា ក្រោយរងការរិះគន់មួយចំនួន បន្ទាប់អ្នកនាងបានប្រកាសបញ្ចប់អាណតិ្តប្រធានសមាគមសិល្បខ្មែរ ហើយបើកផ្លូវអោយមានការបោះឆ្នោតរើសប្រធានថ្មី…
ពិធិការិនី និងតារាសម្តែងនាង ឌួង ហ្ស៊ូរីដា បានចេញមុខការពារដល់អ្នកនាង ចន ច័ន្ទលក្ខិណា ក្រោយរងការរិះគន់មួយចំនួន បន្ទាប់អ្នកនាងបានប្រកាសបញ្ចប់អាណតិ្តប្រធានសមាគមសិល្បខ្មែរ ហើយបើកផ្លូវអោយមានការបោះឆ្នោតរើសប្រធានថ្មី ។
ក្រោយប្រកាសបញ្ចប់អាណតិ្តជាប្រធានសមាគមសិល្បករពីអ្នកនាង ចន ច័ន្ទលក្ខិណា នោះមកការជ្រើសរើសប្រធានថ្មីសម្រាប់តំណែងនេះបានក្លាយជាប្រធានបទដ៏ក្តៅគគុកមួយ នៅក្នុងការជជែកវែងញែកគ្នានៅលើបណ្តាញសង្គម ។ មហាជន ជាពិសេសអ្នកសិល្បជាច្រើនរូប បានបញ្ចេញទស្សនរបស់ខ្លួនពីការជ្រើសរើសប្រធានថ្មី ដោយនៅក្នុងនោះក៏បានដាក់បេក្ខភាពជាអ្នកសិល្បសម្រាប់ការបោះឆ្នោតនាពេលខាងមុខនេះផងដែរ ។
ដោយឡែកទន្ទឹមពីការប្រកាសបញ្ចប់អាណតិ្តជាប្រធានសមាគមសិល្បករខ្មែរពីអ្នកនាង ចន ច័ន្ទលក្ខិណា នាពេលនេះគេក៏ឃើញមហាជន និងអ្នកសិល្បមួយចំនួនបានចេញមុខរិះគន់ពីចំណុចអវិជ្ជមានពីការដឹកនាំរបស់តារាសម្តែងរូបនេះផងដែរ ។
យ៉ាងណាក្រោយឃើញរលកនៃការរិះគន់ទៅអ្នកនាង ចន ច័ន្ទលក្ខិណា នាពេលនេះ ក្នុងនាមជាអ្នកសិល្បស្រឡាញ់រាប់អានគ្នានោះនាង ឌួង ហ្ស៊ូរីដា ក៏បានចេញមុខការពារ ដោយបានស្នើបញ្ចប់ការរិះគន់ត្បិតរយៈពេលនៃការកាន់តំណែងជាប្រធានសមាគមន៍សិល្បករខ្មែររយៈពេល៦ឆ្នាំមកនេះ អ្ន្នកនាង ចន ច័ន្ទលក្ខិណា ក៏មានគុណសម្បត្តិជាច្រើនផងដែរ ។
តាមរយៈសំណេរដែលបានសរសេរបង្ហោះលើបណ្តាញសង្គមនោះនាង ឌួង ហ្ស៊ូរីដា បានលើកឡើងថា ធ្វើជាមនុស្សត្រូវមានគុណធម៌ចាស់ ឬថ្មី មិនសំខាន់ទេ អ្វីដែលសំខាន់គឺយើងត្រូវការអ្នកដឹកនាំដែលអនុវត្តន៍ផ្ទាល់មិនគ្រាន់តែដើម្បីគឺថាតាមគ្នានោះទេ ។ នាងបញ្ជាក់ថា ប្រធានសមាគមថ្មីជ្រើសរើសបានលុះត្រាណាមានការបោះឆ្នោតពីអ្នកសិល្បៈតាមរយៈការជួបជុំដូចអាណត្តិកន្លងមក ហើយក៏សូមគោរពអញ្ចើញអស់លោកអ្នកសិល្បៈទាំងឡាយ មានវត្តមានក្នុងថ្ងៃបោះឆ្នោតផង ដើម្បីអោយមានតម្លាភាពពិតប្រាកដ និងប្រើតួនាទីជាអ្នកសិល្បៈរបស់ខ្លួនជ្រើសរើសថ្នាក់ដឹកនាំដែលខ្លួនគិតថា ស័ក្តិសម ។ កុំពូកែតែខាងស៊ែរផុសតាមគ្នា គាំទ្រ មិនគាំទ្រ ដល់ពេលថ្ងៃបោះឆ្នោតបាត់មុខអស់មិនមានវត្តមាន (វត្តមានមិនដល់500រយនាក់ផង) ។
នាងបន្ថែមថា ទោះបីជ្រើសរើសអ្នកថ្មី ក៏មិនគួរលុបបំបាត់ចោល និងបំបាក់ទឹកចិត្តជាន់ពន្លិចនូវគុណសម្បត្តិដែលអ្នកចាស់បានកសាងយ៉ាងច្រើនសន្ធាប់ដែរ សួរថា អ្នកដែលថាគេអសមត្ថភាពហ្នឹង ធ្លាប់បានជួយអ្វីខ្លះដល់វីរៈសិល្បចាស់ៗរៀងរាល់ខែជិត៦ឆ្នាំនេះបានមួយខែហើយនៅ? ហេតុអ្វីមើលឃើញតែពីភាពអវិជ្ជមាន? តើអ្នកកំពុងបិតភ្នែកធ្វើមិនឃើញ ឬយ៉ាងណា?ត្រឹមសង្គមគ្រួសារតូចមួយ យើងនៅឈ្លោះគ្នា ទាស់ទែងគ្នា ជៀសមិនផុត ចុះទម្រាំសង្គមសិល្បៈដែលមានអ្នកសិល្បរាប់ម៉ឺននាក់ ទាំងក្រៅប្រព័ន្ធ និងក្នុងប្រព័ន្ធ ក្រោមឱវាទរបស់ក្រសួងវប្បធម៌ជាម៉ែឪផង ក៏លោកគ្រប់គ្រងមិនអស់ដែរ ហេតុអ្វីត្រូវមកទំលាក់កំហុសនៅពេលដែលជ្រើសរើសអ្នកថ្មី ហើយដៀលត្មេសអ្នកចាស់នោះ?
ហេតុអ្វីមិនរក្សាអនុស្សាវរីយ៍ល្អៗដែលធ្លាប់សាងជាមួយគ្នា ហើយទុកពេលវេលា និងការគូសសន្លឹកឆ្នោតជាអ្នកសម្រេចលើការការបោះឆ្នោតទៅបានអត់? រឺក៏យើងសម្រេចចិត្តយក FB និង TikTok រាប់ជាសំឡេងឆ្នោត? (ជួយពិចារណាតាមការគួរ) យល់ថា អ្នកគ្រប់គ្នាមានសិទ្ធក្នុងការគាំទ្រអ្នកនេះ អ្នកនោះជាប្រធាន ប៉ុន្តែពួកយើងក៏មានសិទ្ធក្នុងការ ការពារផ្លូវចិត្ត សតិអារម្មណ៍មនុស្សស្រីម្នាក់នេះដែលលះបង់តួនាទីជាកូនល្អ ជាភរិយាល្អ ជាម្តាយល្អ ដើម្បីជួយជ្រោមជ្រែងការងារសិល្បជាង៦ឆ្នាំនេះ មិនដែលគិតពីភាពនឿយហត់ ការពារផលប្រយោជន៍អ្នកសិល្បៈជាច្រើននាក់ ហើយក៏ធ្វើអោយសមាគមផ្លាស់ប្តូរមុខមាត់ថ្មី និងមានការរីកចម្រើនច្រើនជាងអាណត្តិផ្សេងៗ ។
យ៉ាងណាបើតាម ឌួង ហ្ស៊ូរីដា អ្វីដែលជាការសុំអង្វរ គឺឈប់បានឈប់ទៅ ការបង្ហោះឌឺដង ផ្លែផ្កា រវាងគ្នា និងគ្នា ក្លាយទៅជាការបំពុលពេញប្រពន្ធ័ Social Media ។ អ្នកណាក៏មានសិទ្ធឈរឈ្មោះអោយអ្នកសិល្បបោះឆ្នោតក្លាយជា«ប្រធានសមាគមថ្មី» បានគ្រប់គ្នា អោយតែមានឆន្ទៈច្បាស់លាស់ចូលខ្លួនមកសម្រាប់អ្នកចង់បានតំណែងមួយនេះ ព្រោះការបោះឆ្នោតមានការគូសសន្លឹកឆ្នោតច្បាស់លាស់ ដូចយើងបោះឆ្នោតតំណាងរាស្ត្រដូចគ្នា មិនមែនបោះឆ្នោតតាម FB រឺ តាម TikTok ទេ ។
ជាការកត់សម្គាល់រហូតមកទល់នាពេលនេះ គេឃើញមានអ្នកនាង ខាត់ សុឃីម និងលោក គួច ខេវិន អាចនឹងឈរឈ្មោះជាប្រធានសមាគមសិល្បករសម្រាប់អាណតិថ្មីនេះ ខណៈពេលបេក្ខភាពមួយចំនួនទៀតដូចជា លោក សាវីន ហ្វីលីព លោក ដួង សុខគា និងអតីតប្រធានសមាគមសិល្បករខ្មែរលោក សុះ ម៉ាច បានចេញមុខបដិសេធសម្រាប់ការស្នើសុំអោយឈរឈ្មោះជាប្រធានថ្មីនេះ ៕
ចែករំលែកព័តមាននេះ