រាជធានីភ្នំពេញ ៖ តារាចម្រៀងនាង ស៊ុន ស្រីពេជ្រ បានរំលឹកប្រវត្តិពីអតីតកាលដ៏ជូរចត់ និងកំសត់របស់ឪពុកនាងគឺនាយ សង់ ស៊ីស ដែលបានតស៊ូយ៉ាងលំបាកនៅក្នុងការរកប្រាក់មកផ្គត់ផ្គង់គ្រួសារ…
រាជធានីភ្នំពេញ ៖ តារាចម្រៀងនាង ស៊ុន ស្រីពេជ្រ បានរំលឹកប្រវត្តិពីអតីតកាលដ៏ជូរចត់ និងកំសត់របស់ឪពុកនាងគឺនាយ សង់ ស៊ីស ដែលបានតស៊ូយ៉ាងលំបាកនៅក្នុងការរកប្រាក់មកផ្គត់ផ្គង់គ្រួសារ ។ ចំណុចមួយស្ទើរមិនជឿ ដែល ស៊ុន ស្រីពេជ្រ ច្បិចយកមកបង្ហាញនោះគឺនាយ សង់ ស៊ីស បានដណ្តើមនំប៉័ងជាមួយសត្វសុនខ ក្នុងពេលដែលលោកត្រាច់ចរ មករកការងារធ្វើនៅភ្នំពេញទាំងគ្មានទីពឹង ។
តាមរយៈសំណេរដែលបង្ហោះលើបណ្តាញសង្គមនាង ស៊ុន ស្រីពេជ្រ បានរៀបរាប់ថា បើនិយាយពីក្រវិញគឺក្រហៅមិនឮទេ កាលហ្នុង ម៉ែខ្ញុំមានកូន៧នាក់នៅតូចៗ ពុកខ្ញុំតែងតែយកដងរែកសម្រាប់រែកទឹកដេញលេងជាចាប៉ី ដៃដេញបណ្តើរមាត់ច្រៀងផងធ្វើជាភ្លេងផង កាលហ្នុងខ្ញុំនៅតូចណាស់ តែម៉ែបាននិយាយរឿងនោះអោយស្តាប់ ថាពេលយប់ឡើងពុកដើរច្រៀងតាមផ្ទះគេដើម្បីដូរជាអង្ករ ជាទឹកដោះគោ ត្រីខ ជួនបានចេកយកមកផ្ញើប្រពន្ធកូន ថ្ងៃខ្លះបានអង្ករតិចពេកមិនបានដាំជាបាយហូបទេ មានតែបបរដាក់អំបិលប្រៃឡេមៗហូបជុំកូនប្រពន្ធ ហ៊ឺម…។
នាងបន្តថា ក្នុងឆ្នាំ៩០ជាង ( ១៩៩០ជាង ) ពុកមកភ្នំពេញលើកដំបូង ដើម្បីមករកការងារធ្វើ ដែលអីវ៉ាន់ជាប់ខ្លួនមានតែខោអាវមួយកំផ្លេ អង្រឹងមួយ ដើរសុំការងារគេធ្វើ យប់កន្លែងណាចងអង្រឹងសម្រាកកន្លែងនោះ ។
នាងបញ្ជាក់ថា អ្វីដែលខ្ញុំនៅចងចាំមិនភ្លេចនោះ គឺយប់មួយដែលពុកសម្រាកនៅផ្សារ ព្រឹកព្រលឹមស្រាងៗឡើងធម្មតាអ្នកលក់ដូរគេយកបន្លែត្រីសាច់មកលក់ម៉ោង៥គេដាស់យើងឲ្យភ្ញាក់ព្រោះជាកន្លែងគេរកស៊ីលក់ដូរ ណាមួយពុកក៏គ្មានលុយ គ្មានសាច់ញាតិនៅភ្នំពេញទើបយប់ឡើងមានតែចងអង្រឹងតាមផ្សារ។ ស្រណោះបំផុតនោះគឺ ក្មេងតូចម្នាក់ដែលម្តាយមកទិញអីវ៉ាន់នៅផ្សារហើយពរកូននៅចង្កេះ ដៃក្មេងតូចម្ខាងមានកាន់នំប័ង គាត់យំរំអុកទារម៉ែទិញនេះទិញនោះ ម្តាយមិនព្រមទិញឲ្យក្មេងនោះក៏ខឹងគ្រវែងនំបុ័ងចោលទៅដី លោកពុកខ្ញុំត្រូវនឹងអត់មានអីពិសារផងគាត់ក៏ស្ទុះទៅយកនំបុ័ងដែលជ្រុះនៅដីនោះ ប៉ុន្តែចៃដន្យឆ្កែមួយក្បាលក៏ស្ទុះទៅខាំពាំនំបុ័ងដូចគ្នា ពុកខ្ញុំទាញពីមាត់ឆ្កែបានពាក់កណ្តាលយកមកពិសារ។
ស៊ុន ស្រីពេជ្រ លើកឡើងបន្ថែមថា នឹកឃើញជីវិតលោកពុកតស៊ូណាស់ដើម្បីកូនៗ ពុកខ្ញុំការងារដែលគាត់បានធ្វើដំបូងគេនៅភ្នំពេញនោះគឺ គាត់ឈរមើលលោកពូ ឡោ ស៊ី ( បច្ចុប្បន្នគាត់ស្លាប់ ) កំប្លែងកាត់សក់ ជាមួយបងស្រី សា ឡាឡា នៅរោងការ ពុកខ្ញុំអង្គុយក្បែរអ្នកភ្លេង សុំគេគោះឆុបឆឹងពេលពូ ឡោ ស៊ីច្រៀងអាយ៉ៃពេលកាត់សក់ បន្ទាប់មក គាត់សុំគេវាយស្គរ ចៃដន្យពូ ឡោ ស៊ី គាត់មើលឃើញពុកចឹងពេលកាត់សក់ចប់ ពូ ឡោស៊ីក៏សួរថាពុកចេះវាយឃឹមទេ ពុកថាចេះ ហើយក៏សួរថាចេះច្រៀងទេ ពុកថាចេះ គាត់សួរទៀតថា ចេះច្រៀងអាយ៉ៃទេ ពុកថាចេះ ។ តាំងពីថ្ងៃនោះមកពូ ឡោ ស៊ី ក៏ហៅពុកអោយចូលក្រុមគាត់ ហើយក៏ឲ្យពុកម្តងម្កាលឡើងកាត់សក់ និងច្រៀងអាយ៉ៃផងដែរ បន្ទាប់មកក៏មានបងប្អូនលោកគ្រូភ្លេងឃើញពុកអាចធ្វើបានក៏ហៅពុកអោយច្រៀង និងលេងភ្លេងក្នុងពិធីមង្គលការ ។
នាងបញ្ជាក់ថា ពុកមិនត្រឹមតែចេះភ្លេង ចេះច្រៀង និងកំប្លែងប៉ុណ្ណោះទេ តែពុកក៏ធ្លាប់ជាគ្រូបង្ហាត់បង្រៀនគេផងដែរ។ នាងថា ពុកខ្ញុំភាគច្រើនជាសិល្បករម្នាក់ដែលមិនចេះប្រកាន់ខ្លួន តែងជួយយកអាសារអ្នកដ៏ទៃ ហេតុនេះហើយទើបពុកបច្ចុប្បន្នទោះពុកសំដែងលែងកើត និយាយមិនបានក៏នៅតែមានពុកម៉ែបងប្អូននឹករលឹក ចងចាំទេពកោសល្យរបស់គាត់ និងជាទីគោរពស្រលាញ់របស់ពុកម៉ែបងប្អូនជានិច្ច កូនសូមអោយពុកមានអាយុវែង និងសុខភាពល្អណាលោកពុក ៕
ចែករំលែកព័តមាននេះ