ស្រីស្អាត ដួង ម៉ានិច ប្រកាសមិនធ្វើរឿងមួយ សម្រាប់ទទួលភ្ញៀវក្នុងថ្ងៃមង្គលការឡើយ
- ភ្នំពេញ
តារាសម្តែងនាង ដួង ម៉ានិច បានប្រកាសថា សម្រាប់ទទួលភ្ញៀវកិត្តិយសនៅក្នុងពិធីមង្គលការរបស់នាង គឺនាងនឹងមិនដាក់
រាជធានីភ្នំពេញ ៖ តារាសម្តែងនាង ដួង ម៉ានិច បានប្រកាសថា នាងនឹងមិនដាក់ស្រា សម្រាប់ទទួលភ្ញៀវនៅក្នុងពិធីមង្គលការរបស់នាងនោះឡើយ ហើយនាងនឹងប្រកាសប្រាប់ និងសុំទោសដល់ភ្ញៀវទុកជាមុនអំពីរឿងមួយនេះ ។
នៅក្នុងបទសម្ភាសន៍មួយជាមួយលោក អ៊ឹម ជីវ៉ា តារាសម្តែងដែលចូលចិត្តសម្ញែងភាពសិចស៊ីនាង ដួង ម៉ានិច បានលើកឡើងថា «ពិធីមង្គលការរបស់នាងនឹងរៀបចំធ្វើឡើងនាអំឡុងខែមេសា ឬដើមខែឧសភា ឆ្នាំ២០២៤ខាងមុខនេះ។ ហើយដោយសារ នាងមានពេលវេលាខ្លីសម្រាប់រៀបចំពិធីមង្គលការនេះ ខណៈពេលដែលពិធីមង្គលការរបស់នាង គឺធ្វើជារបៀបអឺរ៉ុប» ។
នាងបញ្ជាក់ថា «ដ្បិតតែពិធីមង្គលការរបស់នាងរៀបចំបែបអឺរ៉ុបក៏ពិតមែន ប៉ុន្តែនាងក៏មិនរំលងប្រពៃណីខ្មែរដែរ ដោយនៅក្នុងពិធីនេះ ក៏មានការរៀបចំជារបៀបខ្មែរខ្លះផងដែរ ជាពិសេសនោះ ការរៀបចំលាងបាតជើងឪពុកម្តាយ»។
ស្រីស្អាត ដួង ម៉ានិច បន្ថែមថា «សម្រាប់ពិធីមង្គលការរបស់នាង គឺនាង និងអនាគតស្វាមី សម្រេចចិត្តមិនដាក់ស្រា សម្រាប់ទទួលភ្ញៀវដែលចូលរួមនោះឡើយ ដោយសារនាងគិតថា ការទទួលទានស្រា គឺបាប ហើយណាមួយចៀសវាងការនាំឱ្យមានបញ្ហានានានៅតាមដងផ្លូវ ពេលធ្វើដំណើរផងដែរ» ។
នាងបន្តថា «នាងនឹងជម្រាបប្រាប់ភ្ញៀវដែលចូលរួមអំពីរឿងនេះឱ្យពួកគាត់បានដឹងមុន និងសុំទោសពួកគាត់សម្រាប់រឿងនេះផងដែរ» ។
ដោយឡែក ពាក់ព័ន្ធពីចំណងស្នេហ៍រវាងនាង និងស្វាមី ដែលគេស្គាល់ឈ្មោះថា «ពុទ្ធីឆាត» ឬហ៊ាឆាត ជាអ្នកផលិតមាទិកាតាមយូធូបដ៏ល្បីម្នាក់នោះ តារាសម្តែងនាង ដួង ម៉ានិច បានលើកឡើងថា «នាងបានស្គាល់ សិក្សាពីគ្នា ហើយបានចាប់ផ្តើមស្រឡាញ់គ្នារយៈពេលជិតកន្លះឆ្នាំ មុនពេលដែលពួកនាងសម្រេចចិត្តនឹងដឹកដៃគ្នាចូលរោងការ» ។
នាងបញ្ជាក់ថា «បុរសដែលជាអនាគតស្វាមីរបស់នាង គឺជាមនុស្សម្នាក់ដែលល្អសម្រាប់នាង ដែលអាចមើលថែនាងបាននាពេលអនាគត ក្នុងពេលដែលនាងធ្លាប់រស់នៅម្នាក់ឯង និងតស៊ូប្រឹងប្រែងតែម្នាក់ឯង តាំងពីអាយុ១២ឆ្នាំមកម្ល៉េះ ហើយគាត់ក៏ជាមនុស្សម្នាក់ដែលអាចបំពេញគ្រប់បែបយ៉ាងទាំងអស់សម្រាប់នាង» ។
យ៉ាងណាម៉ិញ បើតាមស្រីស្អាត ដួង ម៉ានិច ថា «ការសម្រេចចិត្តចូលរោងការនាពេលនេះ គឺដោយសារតែពួកនាងបានយល់ចិត្តគ្នាច្រើន ហើយទំនាក់ទំនងស្នេហារបស់នាងក៏មិនមានជាការលាក់បាំងអ្វីនឹងគ្នាឡើយ»។
ជាការកត់សម្គាល់ មួយរយៈចុងក្រោយនេះ តារាសម្តែងនាង ដួង ម៉ានិច តែងតែបង្ហាញភាពស្និទ្ធស្នាល និងផ្អែមល្ហែមជាមួយគូស្នេហ៍វ័យក្មេងនៅលើបណ្តាញសង្គម ក្នុងពេលដែលនាងក៏តែងតែបើកចំហមិនលាក់លៀមពីទំនាក់ទំនងស្នេហារបស់នាងឡើយ ។
កន្លងមក តារារូបនេះ ធ្លាប់បានបង្ហោះសារយ៉ាងចាក់ដោតនៅលើបណ្តាញសង្គមទៅកាន់គូស្នេហ៍របស់ខ្លួនថា «ហ៊ាប្រាប់ថា ហ៊ា ស្រលាញ់អូន ចង់ឃើញអូន មានស្នាមញញឹមឱ្យបានច្រើន ពីព្រោះអូនខំប្រឹងធ្វើការងារ តាំងពីអាយុ១២ឆ្នាំ រហូតដល់ឥឡូវ៣៣ឆ្នាំហើយ អូនគួរតែមានសម្រាប់ខ្លួនឯង មានពេលថែរក្សាសុខភាពឱ្យបានច្រើន អូនអត់មានអីក្រៅពីអរគុណហ៊ា គ្រប់យ៉ាងដែលស្រលាញ់អូនជាអូន Lyderzz ហ៊ាឆាត» ៕
ចែករំលែកព័តមាននេះ