រាជធានីភ្នំពេញ ៖ លោក ហេង រតនា អគ្គនាយកមជ្ឈមណ្ឌលជាតិកម្ចាត់មីនកម្ពុជា (ស៊ីម៉ាក់) បានស្នើឲ្យមានច្បាប់ហាមឃាត់ការបរិភោគសាច់សុនខ(ឆ្កែ) និងដាក់ទោសចំពោះជនល្មើសតាមច្បាប់ ។…
រាជធានីភ្នំពេញ ៖ លោក ហេង រតនា អគ្គនាយកមជ្ឈមណ្ឌលជាតិកម្ចាត់មីនកម្ពុជា (ស៊ីម៉ាក់) បានស្នើឲ្យមានច្បាប់ហាមឃាត់ការបរិភោគសាច់សុនខ(ឆ្កែ) និងដាក់ទោសចំពោះជនល្មើសតាមច្បាប់ ។
ការស្នើនេះបន្ទាប់ពី ស៊ីម៉ាក់ ចូលរួមអបអរសាទរចំពោះប្រទេសកូរ៉េខាងត្បូង បានសម្រេចអនុវត្តច្បាប់ហាមឃាត់ការបរិភោគសាច់សុនខកាលពីថ្ងៃទី០៩ ខែមករា ឆ្នាំ២០២៤ ។
យោងតាមបណ្តាញសង្គមហ្វេសប៊ុករបស់លោក ហេងនរតនា អគ្គនាយកស៊ីម៉ាក់ បានបញ្ជាក់នៅថ្ងៃទី១០ ខែមករា ឆ្នាំ២០២៤នេះថា ៖ «
លោកយល់ថា ខ្មែរអាចធ្វើបាន នៅចំពោះមុខ កម្ពុជាក៏មានច្បាប់គ្រប់គ្រងសត្វ និងចំណីអាហារមួយចំនួន ដែលក្រសួងស្ថប័នពាក់ព័ន្ធអាចយកមកអនុវត្តហាមឃាត់បាន។ ទន្ទឹងនឹងនេះ លោកសូមសំណូមពរចលនាកសាងច្បាប់មួយនៅព្រះរាជាណាចក្រនេះ ដើម្បីហាមឃាត់ការបរិភោគសាច់សុនខ និងដាក់ទោសចំពោះជនល្មើសតាមច្បាប់តែម្តង!» ។
លោក ហេង រតនា បានលើកឡើងថា ប្រទេសកូរ៉េខាងត្បូង បានសម្រេចដាក់ច្បាប់ហាមឃាត់ការបរិភោគសាច់សុនខនេះ អាចធ្វើការផាកពិន័យជនល្មើសជាង ២២,០០០ដុល្លារ ឬជាប់គុក ៣ឆ្នាំ ។ នៅកូរ៉េខាងត្បូង មានអាជីវកម្មចិញ្ចឹមសុនខ លក់សាច់ ជាង ៣,៥០០កន្លែង និងហាងលក់សាច់សុនខ ចំនួនជាង៣,០០០កន្លែង មានសុនខ ចំនួនប្រមាណជាង១.៥លានក្បាល ។ ប្រពៃណីកូរ៉េ ការបរិភោគសាច់សុនខបានចាក់ឫសជ្រៅ តាំងពីសម័យបុរាណមកម្ល៉េះ តែកូរ៉េខាងត្បូង នៅតែកែប្រែបាន! ។
លោក ហេង រតនា លើកឡើងបន្តថា បើក្រឡេកមកមើលកម្ពុជាយើងវិញ មានប្រពៃណីទំនៀមទម្លាប់ថ្លៃថ្លូរ មិនបរិភោគសាច់សុនខនេះទេតាំងពីបុរាណកាលមកម្ល៉េះ ប៉ុន្តែបច្ចុប្បន្ននេះ មានអ្នកបរិភោគសាច់សុនខ កាន់តែច្រើនឡើងៗ ជាពិសេស ក្នុងចំណោមយុវជន ។
លោក ហេង រតនា បញ្ជាក់ថា យោងតាមឯកសារស្រាវជ្រាវបានឱ្យដឹងថា មានការសម្លា.ប់សុនខយកសាច់ មានប្រមាណ២-៣លានក្បាល ក្នុងមួយឆ្នាំៗ ហើយកន្លែងសត្វឃាត(សុនខ) សុទ្ធតែគ្មានច្បាប់អនុញ្ញាតឡើយ ដូច្នេះការបរិភោគសាច់សុនខ អាចប្រឈមនឹងគ្រោះថ្នាក់ដល់សុខភាពសាធារណៈផងដែរ តែអ្វីកាន់គ្រោះថ្នាក់ថែមទៀតនោះ គឺប្រពៃណីទំនៀមទម្លាប់ដ៍ផូរផង់របស់ដូនតាខ្មែរ ត្រូវបានបំផ្លាញ ធ្វើឱ្យប៉ះពាល់ធ្ងន់ធ្ងរ ដល់សីលធម៌សង្គម និងភ្លៀវទេសចរអន្តរជាតិមួយចំនួន មិនចង់មកទស្សនាកម្ពុជា ដោយសារទិដ្ឋភាពអវិជ្ជមាន នៃការធ្វើអាជីវកម្មសត្វសុនខ ជាអាហារនេះ ។
កន្លងមក អគ្គនាយកស៊ីម៉ាក់ ក៏បានចុះកិច្ចព្រមព្រៀងជាមួយ ប្រធានក្រុមសម្ពន្ធ័អន្តរជាតិការពារសត្វ (VIER PFOTEN International) និងនាយក រួមនិងស្ថាបនិកអង្គភាពសង្គ្រោះសត្វកម្ពុជា ដើម្បីសហការគ្នាសំរបសំរួលការងារសត្វសុនខនៅកម្ពជា ក៏ដូចជាជំរុញការផ្សព្វផ្សាយប្រឆាំងនឹងការជួញដូរ និងបរិភោគសាច់សុនខ នៅកម្ពុជា ផងដែរ ។ កិច្ចព្រមព្រៀងនេះ អង្គការទាំង២ នឹងជួយគាំទ្រស៊ីម៉ាក់ឲ្យរៀបចំសិក្ខាសាលា ថតស្ពតអប់រំ ការងារផ្សព្វផ្សាយតាមវិទ្យុ ទស្សទសន៍ សារព័ត៌មាន និងការងារផ្តល់ការជួយថែទាំសុខភាពសត្វសុនខជាដើម។ អង្គភាពស៊ីម៉ាក់ចូលរួមលើកកំពស់វប្បធម៌ ប្រពៃណី និងសីលធម៌ស្រលាញ់សុនខ ទាំងរូបភាពជាសុនខគ្រួសារ សុនខបំរើការងារដោះមីន ការងារសន្តិសុខជាដើម។
ជាច្រើនលើកច្រើនសារហើយដែលលោក ហេង រតនា អគ្គនាយកស៊ីម៉ាក់ បានបញ្ចេញទស្សនៈ ក្នុងគោលបំណង ដើម្បីប្រឆាំងការជួញដូរ និងហូបសាច់សុនខ នៅប្រទេសកម្ពុជា ដោយលោកបញ្ជាក់ថា ស្ថានភាពការជួញដូរ និងហូបសាច់សុនខ អាចបង្កឲ្យមានបញ្ហា៤សំខាន់ៗ រួមមាន ៖
ទី១៖ បាត់បង់វប្បធម៌ទំនៀមទម្លាប់ និងប្រពៃណីដ៏ល្អរបស់ប្រជាជនខែ្មរ ដែលផ្តាំតកូនចៅដោយហាមមិនឲ្យបរិភោគសាច់សុនខឡើយ រហូតដល់យល់ថា ជាទង្វើនាំឲ្យចង្រៃដល់ខ្លួនឯង និងគ្រួសារ។ បើគ្មានវិធានការទេ ប្រពៃណី និងវប្បធម៌ដ៏ប្រពៃថ្លៃថ្នូរនេះ នឹងរលាយសាបសូន្យមិនខានឡើយ។
ទី២៖ ការបង្កអំពើចោរកម្ម និងបង្កបទល្មើសផ្សេងៗក្នុងសង្គម រួមទាំងទង្វើកាចសាហាវបង្កហិង្សាក្នុងគ្រួសារ។
ទី៣៖ មានផលប៉ះពាល់ដល់សុខភាពសាធារណៈ មានប្រភេទជំងឺឆ្លងផងដែរ (នេះបើយោងតាមការវាយតំលៃ មន្ត្រីជំនាញសុខភាពមកពីប្រទេសអូស្ត្រាលី ហើយអង្គភាពស៊ីម៉ាក់ នឹងសហការរយៈ២ឆ្នាំ២០១៩-២០២០ ជាមួយសាស្ត្រាចារ្យមកពីសាកលវិទ្យាល័យមែលប៊ន ដើម្បីតាមដានជំងឺសុនខ នៃអង្គភាពស៊ីម៉ាក់)
ទី៤៖ ភាពអសីលម៌ចំពោះគុណបំណាច់សុនខបម្រើមនុស្សជាតិ ជាពិសេសសុនខហិតមីន សុនខសន្តិសុខ (សម្រាប់សន្តិសុខគ្រួសារ និងសាធារណៈ) សុនខប្រឆាំងភេវរកម្ម សុនខប្រឆាំងគ្រឿងញៀន សុនខការពារព្រំដែនជាដើម។
បន្ថែមពីនេះ អគ្គនាយកស៊ីម៉ាក់ ក៏បានអំពាវនាវផងដែរថា ពេលនេះជាពេលវេលាយ៉ាងសមស្របសម្រាប់ប្រជាជនកម្ពុជា និងអ្នកអនុវត្តច្បាប់អាចចូលរួមលុបបំបាត់ភាពអសកម្មក្នុងសង្គមខែ្មរ និងរួមគ្នាលើកកម្ពស់ប្រពៃណី និងសីលធម៌សង្គមខែ្មរ ។
សូមជម្រាបផងដែរថា កាលពីថ្ងៃទី០៩ ខែមករា ឆ្នាំ២០២៤ កូរ៉េខាងត្បូង បញ្ចប់ភាពចម្រូងចម្រាសលើទំនៀមទម្លាប់បុរាណនៃការបរិភោគសាច់ឆ្កែ ក្រោយរដ្ឋសភា បានអនុម័តច្បាប់ពិសេសមួយ ដើម្បីហាមប្រាមការធ្វើអាជីវកម្ម និងទទួលទានសាច់ឆ្កែ ។
ច្បាប់នេះ បានទទួលការអនុម័ត ជាឯកច្ឆ័ន្ទ នៅក្នុងការបោះឆ្នោតយល់ព្រម ចំនួន ២០៨សំឡេង, មិនព្រម សូន្យសំឡេង, អនុប្បវាទ២ សំឡេង។ ហើយច្បាប់នេះ ត្រូវបានកំណត់ឱ្យអនុវត្តចាប់ពីឆ្នាំ២០២៧ តទៅ។ ការបង្កាត់ពូជ ឬសម្លា.ប់សត្វឆ្កែ សម្រាប់ទទួលទាន ក៏ដូចជាការចែកចាយ ឬលក់ដូរ ត្រូវបានហាមឃាត់ដាច់ខាត។ អ្នកលក់ដូរចែកចាយ នឹងត្រូវប្រឈមមុខនឹងការជាប់ពន្ធនាគារពី២ទៅ៣ឆ្នាំ ឬពិន័យជាប្រាក់រហូតដល់២០លានវ៉ុន (១៥,១៨២ដុល្លារ) ទៅ៣០លានវ៉ុន (២២,៧៦៨ដុល្លារ) ៕
ចែករំលែកព័តមាននេះ