រហូតមកដល់នាពេលនេះ តារាចម្រៀងនាង សុវត្ថិឌី ធារីកា នៅមិនទាន់ហ៊ានបង្ហាញអត្តសញ្ញាណអនាគតស្វាមីរបស់ខ្លួននៅឡើយទេ បើទោះបីជា គេដឹងថា
រាជធានីភ្នំពេញ ៖ រហូតមកដល់នាពេលនេះ តារាចម្រៀងនាង សុវត្ថិឌី ធារីកា នៅមិនទាន់ហ៊ានបង្ហាញអត្តសញ្ញាណអនាគតស្វាមីរបស់ខ្លួននៅឡើយទេ បើទោះបីជា គេដឹងថា ពិធីមង្គលការរបស់នាងនឹងធ្វើឡើងក្នុងពេលឆាប់ៗខាងមុខនេះក៏ដោយ ។
តាមគំរោង មង្គលការរបស់ស្រីស្រស់ ធារីកា នឹងប្រារព្ធធ្វើឡើងនៅថ្ងៃទី២៦ ខែមករា ឆ្នាំ២០២៤ ខាងមុខនេះ នៅទីតាំងមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វា ខណៈពេលដែលរូបនាងក៏កំពុងតែមមាញឹកក្នុងការហៅភ្ញៀវផងដែរ ដោយភ្ញៀវដែលចូលរួមភាគច្រើន គឺជាអ្នកសិល្បៈដូចគ្នា ។
ចំណែកអនាគតស្វាមីរបស់តារាចម្រៀងរូបនេះ គឺមានឈ្មោះថា សូផានិត តែគេមិនទាន់ដឹងទេថា តើបុរសរូបនេះ គឺជាអ្នកនៅក្នុងរង្វង់ និងក្រៅសិល្បៈនោះឡើយ? ខណៈពេលដែលស្រីស្រស់ ធារីកា ក៏នៅតែមិនទាន់អាចបង្ហាញអត្តសញ្ញាណពីអនាគតស្វាមីរបស់ខ្លួនថា តើជានរណានៅឡើយទេ? ។
តារាចម្រៀងក្នុងផលិតកម្មថោន ស្រីស្រស់ សុវត្ថិឌី ធារីកា បានអះអាងប្រាប់កោះសន្តិភាពតាមសារអេឡិចត្រូនិច ដោយខ្លីថា «នាងមិនទាន់អាចបញ្ចេញអត្តសញ្ញាណស្វាមីរបស់នាង តើជាអ្នកណានាពេលនេះឡើយ? ពោលគឺនាងចង់ធ្វើឱ្យភ្ញាក់ផ្អើល (Suprise) សម្រាប់ទស្សនិកជន»។
នាងបញ្ជាក់ថា «នាងនឹងបង្ហាញអនាគតស្វាមីរបស់នាងដោយខ្លួនឯងផ្ទាល់តែម្តង នៅពេលដែលពិធីមង្គលការរបស់នាងបានធ្វើឡើងជាផ្លូវការតាមវេលាដែលបានកំណត់ ក្នុងពេលដែលមង្គលការបស់នាងនឹងធ្វើឡើងនៅថ្ងៃទី២៦ ខែមករា ខាងមុខនេះហើយ»។
យ៉ាងណាម៉ិញ ស្រីស្រស់ ធារីកា ក៏បានថ្លែងអំណរគុណដល់ទស្សនិកជន ជាពិសេសបណ្តាអ្នកគាំទ្ររូបនាងទាំងអស់ដែលបានផ្ញើសារជូនពរ និងចូលរួមអបអរសាទរដល់នាងសម្រាប់ការស្វែងរកឃើញដៃគូរជីវិ.តនាពេលនេះ ។
ជាការកត់សម្គាល់ សម្រាប់ការសម្រេចចិត្តរៀបការកសាងមានគ្រួសារពីសំណាក់តារាចម្រៀងនាង សុវត្ថិឌី ធារីកា នាពេលនេះ អាចនិយាយបានថា គឺជាភាពកក់ក្តៅមួយ លែងឯកការសម្រាប់រូបនាង បន្ទាប់ពីតារាចម្រៀងស្រីរូបនេះរស់នៅកំព្រាឪពុកម្តាយដែលទទួលមរណភាពដោយសារគ្រោះថ្នាក់ចរាចរណ៍កាលពីអំឡុងឆ្នាំ២០២២ កន្លងទៅ ។
ទោះជាយ៉ាងណា គេរំពឹងថា ក្រោយមង្គលការ អនាគតស្វាមី សុវត្ថិឌី ធារីកា នឹងអាចផ្តល់ភាពកក់ក្តៅ និងមានសុភមង្គលក្នុងរង្វង់គ្រួសារ ហើយអាចនឹងកាន់ដៃនាង ស្រឡាញ់នាងរហូតដល់ចាស់កោងខ្នងរៀងៗខ្លួន៕
ចែករំលែកព័តមាននេះ