រាជធានីភ្នំពេញ ៖ តារាសម្តែងអ្នកនាង អេង វ៉ាណង បានសម្រេចវិលរកការសម្តែងជាថ្មីឡើងវិញហើយ បន្ទាប់ពីអ្នកនាងបានតស៊ូនូវការសម្រាកព្យាបាលជំងឺមហារីកអស់ជាច្រើនខែមកនេះ ខណៈពេលការព្យាបាលជំងឺរបស់នាងក៏ត្រូវបានបញ្ចប់ ។
តារាសម្តែងស្រីរូបនេះ បានប្រកាសថា «ចាប់ពីពេលនេះតទៅ នាងនឹងទទួលយកការថតជាថ្មីឡើងវិញហើយ និងស្នើសុំមហាជនជួយគាំទ្រ និងលើកទឹកចិត្តរូបនាង ដើម្បីតស៊ូទៅមុខទៀត ក្រោយពេលដែលនាងធ្លាប់បា.ក់ទឹកចិត្តយ៉ាងខ្លាំង បន្ទាប់ពីដឹងថា ខ្លួនមានជំងឺមហារីកនេះ»។
អ្នកនាង អេង វ៉ាណង បានប្រកាសតាមរយៈបណ្តាញសង្គមថា «ថ្ងៃនេះ នាងខ្ញុំមកថតរឿងភាគថ្មីដែលនឹងដាក់បញ្ចាំងនៅ PNN TV ឆាប់ៗនេះ។ ឆ្លៀតក្នុងឱកាសនេះដែរ នាងខ្ញុំសូមអរគុណដល់ពុកម៉ែបងប្អូន លោកតា លោកយាយ មិត្តភក្តិទាំងអស់ ដែលបានលើកទឹកចិត្ត និងបានជួយនាងខ្ញុំកន្លងមក ។ ហើយឥឡូវនេះ ការព្យាបាលក៏បានបញ្ចប់ដែរ ពេលនេះខ្ញុំទទួលថតបានធម្មតាវិញហើយ សូមជួយគាំទ្រ និងផ្តល់កម្លាំងចិត្តបន្តទៀត ដើម្បីអោយនាងខ្ញុំមានកម្លាំងចិត្តតស៊ូទៅមុខទៀត»។
ក្រោយឃើញការប្រកាសខាងលើពីអ្នកនាង អេង វ៉ាណង នាពេលនេះ មហាជន ជាពិសេសបណ្តាអ្នកគាំទ្របានសម្តែងការរីករាយ ក្នុងពេលដែលគេបានលឺដំណឹងពីស្ថានភាពជំងឺរបស់នាងបានវិវដ្ដមករកភាពល្អប្រសើរ និងអាចមានឱកាសចូលរួមសម្តែងជាថ្មីនាពេលនេះ ។
គួរបញ្ជាក់ផងដែរថា តារាសម្តែងក្នុងរឿងភាគទូរទស្សន៍ អ្នកនាង អេង វ៉ាណង ប្រែក្លាយរូបរាងកាយ១៨០ដឺក្រេ ពោលគឺមើលលែងចង់ស្គាល់ បន្ទាប់ពីនាងបានពើបប្រទះនូវជំងឺមហារីកដំណាក់កាលទី៣ បូករួមជំងឺបា.ក់ទឹកចិត្ត ។ តារារូបនេះ បាត់មុខយូរពីវិថីសិល្បៈ ដោយសារតែនាងពួនសម្ងំតស៊ូប្រយុទ្ធប្រឆាំងជាមួយនឹងជំងឺដ៏កា.ចសា.ហា.វមួយនេះអស់រយៈពេលយូរមកហើយ មុនពេលដែលអ្នកនាងដាច់ចិត្តទម្លាយអោយមហាជន ជាពិសេសមិត្តភក្តិសិល្បៈបានដឹងជាសាធារណៈអំពីស្ថានភាពជំងឺ និងការវិវដ្ដយ៉ាងឆាប់រហ័ស នៃជំងឺមហារីកមួយនេះ ។
អ្នកនាង វ៉ាណង បានលើកឡើងថា «ដំបូងឡើយ អ្នកនាងមិនបានដឹងទេថា ខ្លួនមានជំងឺនេះ ទើបតែរយៈពេល៥ខែចុងក្រោយនេះ ទើបដឹង ហើយទម្រាំតែដឹងខ្លួន គឺជំងឺនេះវិវឌ្ឍន៍ដល់ដំណាក់កាលទី៣រួចទៅហើយ»។
អ្នកនាងបញ្ជាក់ថា «ដំបូង អ្នកនាងបានទៅព្យាបាលនៅមន្ទីរពេទ្យរុស្សី តែការព្យាបាលនៅក្នុងស្រុកហាក់មិនទទួលបានផល ទើបអ្នកនាងសម្រេចចិត្តចេញទៅព្យាបាលនៅឯប្រទេសថៃ ។ តែពេលទៅដល់ ក្រុមវេជ្ជបណ្ឌិតប្រាប់ថា សាច់ដែលដុះក្នុងខ្លួននាង គឺសាច់កា.ច ហើយតម្រូវអោយធ្វើការវះកាត់ចេញជាបន្ទាន់ និងបន្តចាក់សារធាតុគីមីចំនួន១៦ដង ដែលក្នុងមួយម្តងត្រូវចំណាយអស់ខ្ទង់៨០០ដុល្លារ»។
អ្នកនាងបានបន្ថែមថា «ដោយសារតែក្រុមគ្រួសារគ្មានលទ្ធភាពក្នុងការព្យាបាល ទើបសម្រេចចិត្តត្រឡប់មកប្រទេសកម្ពុជាវិញ ហើយលេបថ្នាំបណ្តោះអាសន្នសិន» ។ អ្នកនាង វ៉ាណង បានបន្តទៀតថា «ដំបូង អ្នកនាងមិនចង់ទម្លាយអោយសាធារណជនបានដឹងទេ ដោយសារតែនៅមានរបស់របរលក់យកលុយមើលជំងឺ ហើយណាមួយខ្លាចពាក្យមហាជនដៀលថា «តារាខ្មែរអោយតែឈឺ គឺសុំជំនួយ» ទើបចេះតែសម្ងំទៅ។ តែសម្ងំព្យាបាលរយ:ពេល៥ខែមកនេះ អ្នកនាង លក់ទ្រព្យអស់ពីខ្លួនទៅហើយ ហើយស្ថានភាពជំងឺនៅតែមិនទាន់ប្រសើរទៀត ដោយទាមទារការព្យាបាលម៉ត់ចត់ថែមទៀត»។
អ្នកនាងបញ្ជាក់ថា «សភាពជំងឺរបស់អ្នកនាង ត្រូវការចាំបាច់ប្រមាណ២ម៉ឺនដុល្លារ សម្រាប់ប្រើប្រាស់ក្នុងការចាក់សារធាតុគីមី ដោយសារតែបែបនេះហើយ ទើបអ្នកនាងដាច់ចិត្តទម្លាយការពិត ហើយស្នើសុំជំនួយពីសប្បុរសជន ដើម្បីបន្តជីវិ.តបានរស់នៅបីបាច់ថែរក្សាកូនចំនួន៣នាក់ និងម្តាយចាស់ម្នាក់ទៀតផង»៕
ចែករំលែកព័តមាននេះ