តារាចម្រៀងនាង សុខ ពិសី បានប្រកាសពីថ្ងៃខួបកំណើតរបស់ខ្លួនគម្រប់អាយុ៣៣ឆ្នាំ ធ្វើអោយមិត្តភក្តិ ជាពិសេសបណ្តាអ្នកគាំទ្ររូបនាងជាច្រើននាក់បានផ្ញើសារជូនពរដល់រូបនាងពេញបណ្តាញសង្គម
រាជធានីភ្នំពេញ ៖ កាលពីថ្ងៃទី១៩ ខែធ្នូ ឆ្នាំ២០២៣ តារាចម្រៀងនាង សុខ ពិសី បានប្រកាសពីថ្ងៃខួបកំណើតរបស់ខ្លួនគម្រប់អាយុ៣៣ឆ្នាំ ធ្វើអោយមិត្តភក្តិ ជាពិសេសបណ្តាអ្នកគាំទ្ររូបនាងជាច្រើននាក់បានផ្ញើសារជូនពរដល់រូបនាងពេញបណ្តាញសង្គម ។
យ៉ាងណាម៉ិញ ចូលដល់វ័យរាងជ្រេបន្តិចទៅហើយក្តី ប៉ុន្តែរហូតទល់នាពេលនេះ តារាចម្រៀងសាច់.សខ្ចីរូបនេះ នៅមិនទាន់លេចលឺដំណឹងចូលរោងការនៅឡើយទេ ក្នុងពេលដែលគេដឹងថា នាងបានភ្ជាប់ទំនាក់ទំនងស្នេហ៍ជាមួយកូនថៅកែផលិតកម្មសាន់ដេ ទីដែលនាងកំពុងជ្រកកោនអស់រយៈពេលជាច្រើនឆ្នាំមកនេះក៏ដោយ ។ ផ្ទុយទៅវិញ ក្នុងថ្ងៃខួបកំណើតវ័យ៣៣ឆ្នាំនេះដែរ ស្រីស្រស់ សុខ ពិសី បែជាបង្ហោះសារបែបលេងសើចទៅវិញថា «ខ្ញុំមិនខ្វល់ពីអាយុរបស់ខ្ញុំឡើយ។ ខ្ញុំនៅតែជាកូនក្មេងនៅឡើយ»។
ទោះបីជាបណ្តាប្រិយមិត្តគាំទ្ររូបនាងមួយចំនួននៅតែជម្រុញ និងចង់ឃើញតារាចម្រៀងរូបនេះ រៀបការមានស្វាមីពេញមុខ ខណៈពេលតារារួមជំនាន់របស់នាងសុទ្ធតែមានគ្រួសាររួចទៅហើយ។
ជាការកត់សម្គាល់ តារាចម្រៀងនាង សុខ ពិសី បានចាប់ផ្តើមទំនាក់ទំនងស្នេហាជាមួយកូនប្រុសថៅកែផលិតកម្មសាន់ដេ គឺលោក ឡាយ សុខចំរើន អស់រយៈពេលជាច្រើនឆ្នាំមកហើយ។ ទោះបីជាទំនាក់ទំនងស្នេហ៍មួយនេះ បានបែកធ្លាយជាង១០ឆ្នាំមកនេះក៏ដោយ ប៉ុន្តែអ្នកទាំងពីរនៅតែរក្សាភាពស្ងៀមស្ងាត់ ដោយបន្តភាពលាក់លៀមរហូតមកទល់នាពេលនេះ និងមិនទាន់បង្ហើបគម្រោងរៀបការនៅឡើយ ។
យ៉ាងណា ក្រោយបែកធ្លាយរឿងស្នេហាក្រៅឆាកនេះក៏ដោយ ស្រីស្អាត សុខ ពិសី នៅតែបន្តទទួលបានប្រជាប្រិយភាពរបស់ខ្លួនរហូតមកទល់នាពេលនេះ ដោយសារតែនាងនៅតែរក្សានូវភាពល្អប្រសើរលើអាជីពចម្រៀង។ ជាងនេះទៅទៀត នាងនៅតែអាចទាក់ទាញអ្នកគាំទ្រកាន់តែច្រើន ដោយក្នុងពេលដែលចេញច្រៀងតាមខនសឺតម្តងៗ គេឃើញវត្តមានអ្នកគាំទ្ររូបនាងជាច្រើនទៅចូលរួម និងលើកទឹកចិត្តនាងស្ទើរមិនដាច់។
ទោះជាយ៉ាងណា គេរំពឹងថា ស្រីស្អាត សុខ ពិសី អាចនឹងគិតគូររឿងរៀបការមានស្វាមីនៅអំឡុងពេលឆ្នាំថ្មីនេះ ក្នុងពេលដែលអ្នកសិល្បៈចាស់ថ្មីមួយចំនួនក៏មានគម្រោងចូលរោងការនៅឆ្នាំថ្មីនេះផងដែរ ៕
ចែករំលែកព័តមាននេះ