តារាសម្តែងសាច់.សខ្ចី គឺកញ្ញា ផាន់ មីនា ហៅ វល្លិក បានបង្ហាញវត្តមានជាលើកដំបូង នៅក្នុងកម្មវិធីប្រកួតផ្នែកសម្រស់ «Miss Grand Cambodia 2024» បន្ទាប់ពីនាងបានប្រឡូកក្នុងវិស័យសិល្បៈអស់រយៈពេលប្រមាណជា១០ឆ្នាំមកហើយ
រាជធានីភ្នំពេញ ៖ តារាសម្តែងសាច់.សខ្ចី គឺកញ្ញា ផាន់ មីនា ហៅ វល្លិក បានបង្ហាញវត្តមានជាលើកដំបូង នៅក្នុងកម្មវិធីប្រកួតផ្នែកសម្រស់ «Miss Grand Cambodia 2024» បន្ទាប់ពីនាងបានប្រឡូកក្នុងវិស័យសិល្បៈអស់រយៈពេលប្រមាណជា១០ឆ្នាំមកហើយ ។
តារារូបនេះ កំពុងស្ថិតនៅក្នុងវគ្គជម្រុះដំបូង នៅតំបន់ភ្នំពេញ (Miss Grand Phnom Penh) ដែលមានបេក្ខភាព មានទេពកោសល្យ និងរូបសម្រស់ស្រស់ស្អាតជាច្រើនរូបផ្សេងទៀតមកចូលរួមប្រកួតប្រជែង ជាពិសេសនោះ ក៏មានបេក្ខភាពតារាសម្តែងពហុជំនាញ គឺស្រីស្អាត នាង ព្រះកាយច័ន្ទ ម្នាក់ផងដែរ ។
បើតាមការប្រកាសពីផេកផ្លូវការរបស់ Miss Grand Phnom Penh បានឲ្យដឹងថា បេក្ខភាពស្ថិតក្នុងវគ្គជំរុះជុំទីមួយ Miss Grand Phnom Penh 2024 កញ្ញា «ផាន់ មិនា», អាយុ : ២៣ឆ្នាំ, សញ្ជាតិ : ខ្មែរ, កម្ពស់ : 1.70m, ទំហំទាំង៣ (24 34 34), ការសិក្សា : បញ្ចប់ថ្នាក់សិក្សាទុតិយភូមិ, កំរិតភាសា : ខ្មែរ អង់គ្លេស, ការងារបន្ថែម : តារាសម្តែង ។
ក្រោយការបង្ហាញបេក្ខភាពប្រកួតក្នុងកម្មវិធី Miss Grand Cambodia 2024 ជាផ្លូវការនោះ តារាសម្តែងក្នុងរឿង «ប្រុសលក់ខ្លួន» រូបនេះ បានបញ្ចេញសារថា «នាងខ្ញុំឈ្មោះ ផាន់ មិនា ហៅក្រៅ (វល្លិក) ជាបេក្ខភាពមួយរូប នឹងត្រូវចូលប្រកួតក្នុងកម្មវិធី Miss Grand Phnom Penh សូមបងប្អូនគាំទ្ររូបនាងខ្ញុំផងណាចា៎ អរគុណបងប្អូនទាំងអស់គ្នា »។
យ៉ាងណាម៉ិញ សម្រាប់ការចូលរួមការប្រកួតខាងលើពីកញ្ញា វល្លិក នាពេលនេះ គេក៏បានឃើញមានមហាជន មិត្តភក្តិសិល្បៈ ជាពិសេសបណ្តាអ្នកគាំទ្រជាច្រើនបានសម្តែងការអបអរសាទរ និងគាំទ្រសម្រាប់រូបនាងឲ្យសម្រេចបានជោគជ័យនៅក្នុងប្រកួតនេះផងដែរ ។
ជាការកត់សម្គាល់ ការប្រឡូកក្នុងអាជីពសម្ដែង និងដើរម៉ូដប្រមាណ១០ឆ្នាំ កញ្ញា ផាន់ មីនា ហៅវល្លិក កាន់តែមានភាពលេចធ្លោក្នុងវិស័យសិល្បៈ ដោយនាងតែងតែបង្ហាញវត្តមានសម្តែងក្នុងខ្សែភាពយន្ត MV និងស្ពតពាណិជកម្មនានាជាបន្តបន្ទាប់ ។
ចំពោះបញ្ហាស្នេហាវិញកន្លងមក តារាស្រីរូបនេះធ្លាប់បានបញ្ជាក់ដោយមិនលាក់លៀមថា «នាងកំពុងតែមានទំនាក់ទំនងស្នេហាជាមួយបុរសម្នាក់ តែនាងមិនទាន់អាចបញ្ជាក់ពីអត្តសញ្ញាណបុរសរូបនោះនៅឡើយទេ ប៉ុន្តែពួកនាងបានយល់ចិត្ត ទុកចិត្តគ្នាច្រើនឆ្នាំមកហើយ បើគិតមកទល់ពេលនេះ គឺចំណងស្នេហ៍របស់នាងបានជាង៥ឆ្នាំហើយ»។
គួរបញ្ជាក់ផងដែរថា បច្ចុប្បន្ននេះ ស្រីស្អាត វល្លិ មានបងប្អូនប្រុសស្រីចំនួន៤នាក់ ដោយ វល្លិក គឺជាកូនស្រីពៅ រីឯបងៗទាំង៣នាក់របស់នាង បានរៀបការរស់នៅបែកផ្ទះអស់ហើយ។ ចំណែកស្រីស្អាត វល្លិក និងម្ដាយ កំពុងតែរស់នៅជុំគ្នា ចំពោះថ្លៃជីវភាព និងថ្លៃមើលថែជំងឺប្រចាំកាយរបស់ម្ដាយដែលមានវ័យ៥៣ឆ្នាំ គឺកញ្ញា វល្លិក ជាអ្នកទទួលបន្ទុក៕
ចែករំលែកព័តមាននេះ