បងប្អូនអាចនឹងស្គាល់ល្ខោនបាសាក់ លោក អុល សំអាង ហើយ ដោយកាលពីកន្លងទៅ វង់ល្ខោនរបស់លោកពិតជាទទួលបានការគាំទ្រច្រើនពីសំណាក់មហាជន ពោលគឺកាលពីពេលថ្មីៗ លោកបានទម្លាយសារមួយយ៉ាងចាក់ដោតថា
រាជធានីភ្នំពេញ ៖ បងប្អូនអាចនឹងស្គាល់ល្ខោនបាសាក់ លោក អុល សំអាង ហើយ ដោយកាលពីកន្លងទៅ វង់ល្ខោនរបស់លោកពិតជាទទួលបានការគាំទ្រច្រើនពីសំណាក់មហាជន ពោលគឺកាលពីពេលថ្មីៗ លោកបានទម្លាយសារមួយយ៉ាងចាក់ដោតថា «ភាគតិចណាស់ តារាចម្រៀងសម័យ ដែលល្បីៗជួយបង្ហោះ ចែករំលែកផ្សព្វផ្សាយពីសិល្បៈល្ខោនបាសាក់ខ្មែរ នៅក្នុងបណ្តាញសង្គម មិនដឹងយ៉ាងម៉េច»។
តាមរយៈសារមួយនេះផងដែរ អាចថាជាសារមួយនូវកាលដាស់តឿន មហាជន យុវជន សិល្បករ សិល្បការិនី គ្រប់រូបទូទាំងប្រទេសអោយជួយធ្វើលើកតម្លើង ជួយផ្សព្វផ្សាយ លើកស្ទួយល្ខោនបាក់សាក់នេះអោយបានផុសផុលផងដែរ។
ប្រាកដណាស់ ល្ខោនបាសាក់នាពេលបច្ចុប្បន្ន នៅជនបទមានការគាំទ្រច្រើន ប៉ុន្តែនៅទីក្រុងវិញដូចជាពុំសូវមានការគាំទ្រនោះឡើយ ដោយភាគច្រើនគេនិយាយតែទស្សនាអ្វីដែលជាវប្បធម៌បទេស ដូច្នេះលោក អុល សំអាង ចេះតែក្រើនរំលឹក ដោយពុំចង់អោយសិល្បៈនៃទម្រង់ល្ខោនបាសាក់មានការបាត់បង់ ហើយអាចគង់វង់រាប់រយពាន់ឆ្នាំតទៅមុខទៀត។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក អុល សំអាង ដែលជាប្រធានក្រុមល្ខោនបាសាក់មហាជន អុល សំអាង វង់ទី១ រាជធានីភ្នំពេញ បានប្រាប់អោយដឹងថា «មូលហេតុដែលលោកបានបង្ហោះសារដូច្នេះ ដោយសារលោកចង់អោយសិល្បករ សិល្បការិនី យុវជន យុវនារី និងមហាជនគ្រប់ស្រទាប់សង្គម ជួយផ្សាយសិល្បៈល្ខោនបាសាក់ ជាជាងវប្បធម៌បរទេស ដែលធ្វើអោយសិល្បៈមានការធ្លាក់ចុះ»។
លោក អុល សំអាង ដែលមានអាយុ៤៣ឆ្នាំ និងបានសម្តែងជាតួរអង្គល្ខោនបាសាក់តាំងពីអាយុ២២ឆ្នាំរូបនោះ បានបន្តថា «ពិតជាមានតម្លៃណាស់ ដោយល្ខោនបាសាក់ខ្មែរជាអត្តសញ្ញាណជាតិខ្មែរ ដោយល្ខោនបាសាក់ បានបម្រើអារម្មណ៍ពុកម៉ែបងប្អូន តាយាយជាច្រើន កន្លងមកហើយដែលបុព្វេបុរសខ្មែរបានបន្សល់ទុកអោយ។ ហើយល្ខោនបាសាក់នេះទៀតសោតអាចថា កេរ្តិ៍មរតកដ៏មានតម្លៃដែលពុំអាចកាត់ថ្លៃបាននោះឡើយចំពោះជាតិខ្មែរ»។
បន្ថែមពីនេះ លោកបន្តថា «មិនមែនជួយផ្សព្វផ្សាយចំពោះតែល្ខោនបាសាក់មួយមុខនោះទេ ក៏ជួយផ្សព្វផ្សាយនៅអ្វីផ្សេងៗទៀត ដែលជារបស់ខ្មែរ ដូចជា ៖ ចាប៉ីដងវែង យីកេ អាយ៉ៃ និងអ្វីផ្សេងទៀតដែលជារបស់ខ្មែរអោយបានផុសផុលក្នុងបណ្តាញងសង្គមនាពេលបច្ចុប្បន្ន»។
លោក អុល សំអាង បានធ្លាប់សម្តែងតួរឯកជាច្រើនឆ្នាំមកនេះ លោកបានបន្តថា «កន្លងមក លោកធ្លាប់ទស្សនាតាមបណ្តាញសង្គមផងដែរ ពីល្ខោនបាសាក់មួយចំនួន ដោយការសម្តែងខុសពីទម្រង់ដើម ការនិយាយមិនសមគួរ ប្រើពាក្យពេលខ្លីលើសលួស ដូច្នេះលោកទិតៀនក្នុងន័យស្ថាបនា មិនចង់អោយមានពាកយចម្អេសចម្អាស់ ដែលនាំអោយតម្លៃនៃល្ខោនបាសាក់ខ្មែរមិនល្អផងដែរ»។
ជាចុងក្រោយ លោកពិតជាអរគុណខ្លាំងណាស់ ចំពោះការគាំទ្រសិល្បៈល្ខោនបាសាក់ខ្មែរ ដោយលោកនឹងខិតខំសម្រិតសម្រាំងអោយកាន់ល្អប្រសើរ និងរួមជាគ្នាជាធ្លុងមួយ ជួយលើកតម្កើងអោយតម្លៃនៃល្ខោនបាសាក់ខ្មែរ កាន់តែល្បីសុះសាយខ្ទរខ្ទាររាប់រយពាន់ឆ្នាំទៅមុខ៕ ដោយ ៖ លីហួ គីមឆាយ
ចែករំលែកព័តមាននេះ