ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក សម្រាប់ថ្ងៃទី១ សភាពការណ៍សន្តិសុខ សណ្តាប់ធ្នាប់ មានភាពល្អប្រសើរ និងមានប្រជាពលរដ្ឋមកចូលរួមកម្សាន្ត
រាជធានីភ្នំពេញ ៖ ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក សម្រាប់ថ្ងៃទី១ សភាពការណ៍សន្តិសុខ សណ្តាប់ធ្នាប់ មានភាពល្អប្រសើរ និងមានប្រជាពលរដ្ឋមកចូលរួមកម្សាន្តសប្បាយយ៉ាងច្រើនកុះករ ប្រមាណ ១.២០០.០០០នាក់។
យោងតាមរបាយការណ៍ចេញដោយអនុគណៈកម្មការការពាររក្សាសន្ដិសុខ របៀបរៀបរយ សណ្ដាប់ធ្នាប់សង្គម ចរាចរណ៍ សង្គ្រោះទូកលិច និងអ្នកជំងឺ ថ្ងៃទី២៦ ខែវិច្ឆិកា ឆ្នាំ២០២៣ បានឲ្យដឹងថា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ថ្ងៃទី១ ត្រូវនឹងថ្ងៃទី២៦ ខែវិច្ឆិកា ឆ្នាំ២០២៣ មានទូកចូលរួមប្រកួតចំនួន៣៣៨ទូក (ទូកអន្តរជាតិចំនួន១៣៧ទូក) ចំណុះទូកសរុប ១៦.៥៩៦នាក់ (ត្រៀម ៣.៨៤៨នាក់) ប្រទីបដែលនឹងត្រូវបណ្តែតអបអរសាទរព្រះរាជពិធីបុណ្យមាន ចំនួន៣០ប្រទីប។
របាយការណ៍បានបន្ដថា ចំពោះសភាពបទល្មើសព្រហ្មទណ្ឌ ពុំមានអ្វីកើតឡើងគួរឲ្យកត់សម្គាល់ឡើយ ហើយក្រុមគ្រូពេទ្យប្រចាំការនៅតាមគោលដៅបានធ្វើការសង្គ្រោះបឋមដល់អ្នកដែលមានបញ្ហាសុខភាពសរុបចំនួន១.៦៧៤នាក់ (ស្រី២៤៣នាក់) និងបញ្ជូនទៅសង្គ្រោះនៅមន្ទីរពេទ្យចំនួន០១នាក់។ កម្លាំងការពារគៅលដៅ បានរកឃើញក្មេងវង្វេងសាច់ញាតិចំនួន៦នាក់ ដោយបានធ្វើការផ្សព្វផ្សាយ ហើយត្រូវសាច់ញាតិមកទទួលយកទៅវិញចំនួន០៤នាក់ និងកំពុងស្វែងរកសាច់ញាតិចំនួន២នាក់បន្តទៀត។
ក្នុងរបាយការណ៍ដដែល បានឲ្យដឹងទៀតថា ចំពោះកម្លាំងត្រៀមអន្តរគមន៍ បានចេញជួយសង្គ្រោះករណីទូកប្រណាំងលិចទឹកចំនួន០៩ទូក ដោយបានជួយសង្គ្រោះកីឡាករសរុប១៩៨នាក់ ប្រកបដោយសុវត្ថិភាព។ ហើយក៏បានចុះផ្សពផ្សាយអប់រំស្ដីពីការបង្ការទប់ស្កាត់ និងពន្លត់អគ្គិភ័យតាមបណ្តាយានដ្ឋាន ផ្ទះជួល ផ្ទះសំណាក់ ភោជនីយដ្ឋាន នៅជុំវិញតំបន់ប្រារព្ធព្រះរាជពិធីបុណ្យផងដែរ។
សូមបញ្ជាក់ថា កម្លាំងសមត្ថកិច្ចចម្រុះប្រមាណជាង១៦,០០០នាក់ ត្រូវបានដាក់ពង្រាយតាមគោលដៅសំខាន់ៗ ដើម្បីការពារសន្ដិសុខ សណ្ដាប់ធ្នាប់ និងសុវត្ថិភាព ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ចាប់ពីថ្ងៃទី២៦-២៨ ខែវិច្ឆិកា ឆ្នាំ២០២៣៕
ចែករំលែកព័តមាននេះ