ម្សិលម៉ិញនេះ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំងក្នុងពេលដែលស្ងាត់ៗ ស្រាប់តែគេឃើញទិដ្ឋភាពពិធីភ្ជាប់ពាក្យរបស់អ្នកជំនួញសំបូរទ្រព្យ គឺអ្នកស្រី ទ្រី ដាណា ជាមួយនឹងគូដណ្តឹងជាបុរសវ័យក្មេងរូបសង្ហា ដែលមិនមែនជាតារាសម្តែងលោក
រាជធានីភ្នំពេញ ៖ ម្សិលម៉ិញនេះ មហាជន ជាពិសេសបណ្តាអ្នកលេងហ្វេសប៊ុកបានសម្តែងការភ្ញាក់ផ្អើលយ៉ាងខ្លាំងក្នុងពេលដែលស្ងាត់ៗ ស្រាប់តែគេឃើញទិដ្ឋភាពពិធីភ្ជាប់ពាក្យរបស់អ្នកជំនួញសំបូរទ្រព្យ គឺអ្នកស្រី ទ្រី ដាណា ជាមួយនឹងគូដណ្តឹងជាបុរសវ័យក្មេងរូបសង្ហា ដែលមិនមែនជាតារាសម្តែងលោក សេង មង្គល នោះឡើយ។
ពិធីចូលចែចូវ ឬស្តីដណ្តឹងភ្ជាប់ពាក្យរបស់អ្នកស្រី ទ្រីដាណា នាពេលនេះ បានធ្វើឡើងនៅថ្ងៃទី៩ ខែ វិច្ឆិកា ឆ្នាំ២០២៣ម្សិលម៉ិញនេះ នៅគេហដ្ឋានរបស់អ្នកស្រីផ្ទាល់តែម្តង។ ហើយទិដ្ឋភាពនៃការរៀបចំពិធីខាងលើនេះ ក៏ត្រូវបានផ្សព្វផ្សាយផ្ទាល់តាមរយៈផេកហ្វេសប៊ុកផ្លូវការរបស់អ្នកស្រីផងដែរ។
ពិធិភ្ជាប់ពាក្យរបស់អ្នកស្រី ទ្រីដាណា នាពេលនេះ បានធ្វើឡើងតាមគន្លងប្រពៃណី និងមានការចូលរួមពីសំណាក់សាច់ញាតិ ចាស់ទុំទាំងសងខាង ហើយអ្វីដែលកាន់តែពិសេសនោះ ក៏មានវត្តមានតារាល្បីៗចូលរួមផងដែរ មានដូចជា ៖ អ្នកនាង ឱក សុគន្ធកញ្ញា, ពេជ្រ សោភា, សួស វីសា និងលោក ឆឹម សក្កដា ។
យ៉ាងណា គេមិនទាន់ដឹងច្បាស់នៅឡើយទេថា តើគូដណ្តឹងរបស់អ្នកស្រី ទ្រីដាណា មានប្រភពមក ពី ណា? តើជាអ្នកធ្វើការ ឬមួយក៏ជាអ្នករកស៊ីអ្វីឡើយ? ប៉ុន្តែគេដឹងត្រឹមថា អនាគតស្វាមីរូបសង្ហារបស់អ្នកស្រី ក៏ជាតារា Tik Tok ដ៏ល្បីម្នាក់ផងដែរ។
ទោះបីជាយ៉ាងណា តាមរយៈពិធីភ្ជាប់ពាក្យជាផ្លូវការនេះ មិនមែនជាការសម្តែងរបស់អ្នកស្រី ទ្រីដាណាឡើយ ហើយនាពេលនេះផងដែរ ក៏បានធ្វើឱ្យមហាជនជាច្រើននាក់សម្តែងការខកចិត្ត ត្បិតកូនកំលោះមិនមែនជាតារាសម្តែងលោក សេង មង្គល។ ព្រោះថា កន្លងមក មហាជនបានកត់សម្គាល់ពីទំនាក់ទំនងយ៉ាងស្អិតរមួតរវាងលោក សេង មង្គល និងអ្នកស្រី ទ្រីដាណា ខណៈពេលអ្នកទាំងពីរ ត្រូវបានគេរំលេចរូបភាពដ៏ផ្អែមល្ហែមជាមួយគ្នាជាបន្តបន្ទាប់តាមបណ្តាញសង្គមហ្វេសប៊ុក។
តាមរយៈសកម្មភាពទាំងអស់នោះ ត្រូវបានគេគិតថា អ្នកទាំងពីរមិនមែនស្និទ្ធស្នាលក្នុងទិដ្ឋភាពការងារជាមួយគ្នានោះឡើយ ពោលគឺពួកគេទាំងពីរ អាចនឹងមានទំនាក់ទំនងក្រៅជាមួយគ្នាផងដែរ។ មិនត្រឹមតែប៉ុណ្ណោះ មហាជនតែងតែលើកសរសើរពីភាពសាកសមគ្នារវាងអ្នកទាំងពីរ ហើយគេក៏តែងតែរំពឹងទុកថា លោក សេង មង្គល នឹងដឹកដៃអ្នកស្រី ទ្រី ដាណា ចូលរោងការអំឡុងពេលណាមួយនាថ្ងៃអនាគត។
យ៉ាងណានៅពេលនេះ រឿងរ៉ាវត្រូវបានដឹងច្បាស់ដូចថ្ងៃហើយ ដោយអនាគតស្វាមីរបស់អ្នកជំនួញសំបូរទ្រព្យអ្នកស្រី ទ្រី ដាណា នាពេលនេះ គឺជាបុរសផ្សេង ដែលមិនមែនជាលោក សេង មង្គល ដូចការរំពឹងទុករបស់មហាជននោះឡើយ។ ទោះជាយ៉ាងណាក៏ដោយ ក៏មហាជន ជាពិសេសបណ្តាអ្នកគាំទ្រ ចូលរួមសម្តែងការអបអរសាទរ និងជូនពរចំពោះអ្នកស្រី ទ្រី ដាណា ដែលបានរកឃើញដៃគូរជីវិត បន្ទាប់ពីអ្នកស្រីបានរស់មានឈ្មោះជាស្ត្រីមេម៉ាយអស់រយៈពេលជាច្រើនឆ្នាំមកនេះ៕
ចែករំលែកព័តមាននេះ