ស្ងាត់ៗពេញវ័យបាត់ អតីតបេក្ខភាពចម្រៀងកុមារ កញ្ញា រ៉ន ចាន់ឌីន ដែលបងប្អូនមហាជនអាចនឹងស្គាល់ហើយ ពេលនេះបេក្ខភាពរូបនេះពេញក្រមុំស្តូក ហើយឆ្នាំនេះកញ្ញាមានវ័យ១៨ឆ្នាំ ដែលជាឆ្នាំដែលស្រីស្រស់ត្រូវប្រឡងផងដែរ។ ប្រាកដណាស់
រាជធានីភ្នំពេញ ៖ ស្ងាត់ៗពេញវ័យបាត់ អតីតបេក្ខភាពចម្រៀងកុមារ កញ្ញា រ៉ន ចាន់ឌីន ដែលបងប្អូនមហាជនអាចនឹងស្គាល់ហើយ ពេលនេះបេក្ខភាពរូបនេះពេញក្រមុំស្តូក ហើយឆ្នាំនេះកញ្ញាមានវ័យ១៨ឆ្នាំ ដែលជាឆ្នាំដែលស្រីស្រស់ត្រូវប្រឡងផងដែរ។ ប្រាកដណាស់ ស្រីស្រស់ រ៉ន ចាន់ឌីន អតីតបេក្ខភាពចម្រៀងកុមារ «The Voice Kids Cambodia» រដូវកាលទី១ ឆ្នាំ២០១៧ នាពេលនេះ កញ្ញាបាននិងកំពុងប្រឡងនាមណ្ឌល វិទ្យាល័យទឹកល្អក់ ដោយដំណើរនៃការប្រឡង ក៏ដូចជាសណ្តាប់ធ្នាប់នៅទីនោះ គឺប្រព្រឹត្តិទៅដោយរលូន។
តាមរយៈបទសម្ភាសន៍ជាមួយសារព័ត៌មានកោះសន្តិភាព ស្រីស្រស់ រ៉ន ចាន់ឌីន បានជម្រាបជូនថា ដំណើរនៃការប្រឡងប្រព្រឹត្តទៅដោយរលូន ហើយសម្រាប់កញ្ញាផ្ទាល់មានអារម្មណ៍រំភើបរីករាយជាមួយនឹងការប្រឡងមធ្យមសិក្សាទុតិយភូមិ។ ដោយការប្រឡងនេះ ពិតជាពិសេសសម្រាប់កញ្ញាផ្ទាល់។
ស្រីស្រស់ រ៉ន ចាន់ឌីន បានអោយដឹងបន្តថា សម្រាប់ថ្ងៃដំបូង សម័យប្រឡងថ្ងៃទី៦ ខែវិច្ឆិកា ឆ្នាំ២០២៣ សម្រាប់វិញ្ញាសាវិទ្យសាស្ត្រសង្គម ដោយម៉ោងដំបូងកញ្ញារៀងភ័យបន្តិច តែក្រោយពេលកញ្ញាបានឆ្លើយសំណួរបានខ្លះៗ កញ្ញាក៏មានអារម្មណ៍ថាធម្មតាវិញ ដោយកញ្ញាអាចសម្រួលអារម្មណ៍ និងធ្វើបានច្រើនគួរសម ដែលអាចធ្វើទៅបាន។
ស្រីស្រស់ រ៉ន ចាន់ឌីន អតីតបេក្ខភាពច្រៀងកុមារ ដែលតែងតែបំពេរអារម្មណ៍ពុកម៉ែបងប្អូនតាមយៈចម្រៀងកម្សត់ និងមនោសញ្ចេតនានោះ កញ្ញាបានបន្តថា ចំពោះវិញ្ញាសាសម្រាប់ការប្រឡងដែលលំបាក គឺគណិតវិទ្យា ប្រព្រឹត្តិទៅនាព្រឹកទី២នេះ ដោយគណិតវិទ្យានេះ កញ្ញាគិតថា ពិបាកនឹងយកពិន្ទុ ហើយចំណែកមុខវិជ្ជាដែលកញ្ញារំពឹងថា នឹងធ្វើទៅបានល្អ គឺភាសាខ្មែរ ព្រោះកាលពីកន្លងទៅ កញ្ញាបានហ្វឹកហាត់រៀនសូត្របានច្រើន។ ហើយចំពោះមុខវិជ្ជាភាសាខ្មែរនេះទៀតសោត កញ្ញាក៏ទទួលបានពិន្ទុល្អកាលពីប្រឡងប្រចាំខែផងដែរ។
ស្រីស្រស់ ចាន់ឌីន បានបន្តថា សម្រាប់ការប្រឡងបាក់ឌុបនេះ កញ្ញាប្រឡងនៅបន្ទប់ទី៧ លេខតុទី១៦២ នាវិទ្យាល័យទឹកល្អក់ ដោយក្នុងនោះដែរ កញ្ញា គឺមានប្អូន និងម្តាយមកជួយលើកទឹកចិត្ត ផ្តល់កម្លាំងចិត្តចំពោះកញ្ញាផ្ទាល់។
ជាចុងក្រោយ ស្រីស្រស់ រ៉ន ចាន់ឌីន ពិតជាអរគុណខ្លាំងណាស់ចំពោះការលើកទឹកចិត្ត ផ្តល់កម្លាំងចិត្តពីមហាជន ក្នុងនោះផងដែរ កញ្ញាក៏មានសារខ្លះៗ ដោយកញ្ញាសូមកុំអោយបេក្ខជនភ័យ ពោលគឺត្រូវតាំងចិត្តធ្វើអោយបានល្អ ទោះសំណួរដែលបានធ្វើនោះយ៉ាងម្តេចក៏ដោយ ជាពិសេសត្រូវធ្វើអោយអស់ពីលទ្ធភាព៕ ដោយ ៖ លីហួ គីមឆាយ
ចែករំលែកព័តមាននេះ