ក្រោមការយកចិត្តទុកដាក់ពីសំណាក់អាជ្ញាធរខេត្ត បានរៀបចំការប្រណាំងទូក.ងចេញព្រះវស្សា ដោយធ្វើឡើងរយៈពេល២ថ្ងៃ គឺថ្ងៃទី២៨ និងថ្ងៃទី២៩ ខែតុលា ឆ្នាំ២០២៣នេះ ដែលប្រារព្ធធ្វើឡើងនៅមាត់ទន្លេក្រុងកំពង់ចាម។ ជាមួយគ្នានោះ ក៏មានការតាំងពិព័រណ៍ផលិតផលក្នុងស្រុក ការប្រគំតន្ត្រីខ្នាតធំ និងមានការបណ្ដែតប្រទីប ព្រមទាំង
ខេត្តកំពង់ចាម ៖ ក្រោមការយកចិត្តទុកដាក់ពីសំណាក់អាជ្ញាធរខេត្ត បានរៀបចំការប្រណាំងទូក.ងចេញព្រះវស្សា ដោយធ្វើឡើងរយៈពេល២ថ្ងៃ គឺថ្ងៃទី២៨ និងថ្ងៃទី២៩ ខែតុលា ឆ្នាំ២០២៣នេះ ដែលប្រារព្ធធ្វើឡើងនៅមាត់ទន្លេក្រុងកំពង់ចាម។ ជាមួយគ្នានោះ ក៏មានការតាំងពិព័រណ៍ផលិតផលក្នុងស្រុក ការប្រគំតន្ត្រីខ្នាតធំ និងមានការបណ្ដែតប្រទីប ព្រមទាំងការបា.ញ់កាំជ្រួច ដើម្បីបង្កើតភាពសប្បាយរីករាយជូនដល់ប្រជាពលរដ្ឋ ហើយសមត្ថកិច្ចគ្រប់លំដាប់ថ្នាក់ ក៏មានការយកចិត្តទុក ដាក់ពង្រឹងសន្តិសុខ និងសណ្ដាប់ធ្នាប់បានល្អប្រសើរផងដែរ ដែលភ្ញៀវជាតិ និងអន្តរជាតិមកទស្សនាកម្សាន្តសរុបជាង៤០ម៉ឺននាក់ឯណោះ។
លោក ស៊ាន សុគុណ ប្រធានមន្ទីរទេសចរណ៍ខេត្ត បានមានប្រសាសន៍ប្រាប់ឲ្យដឹងនាព្រឹកថ្ងៃទី៣០ ខែតុលា ឆ្នាំ២០២៣នេះថា ក្រោយពីជំងឺកូវីដ១៩ បានស្ងប់ស្ងាត់ ត្រូវបានឯកឧត្តម អ៊ុន ចាន់ដា អភិបាលខេត្ត រៀបចំព្រឹត្តិការណ៍ប្រណាំងទូក.ងខ្នាតជាតិ និងអន្តរជាតិ ដែលមានសរុបចំនួន៤៧ទូក មកពីតាមបណ្ដាស្រុក ក្នុងខេត្តកំពង់ចាម និងមួយផ្នែកមកពីខេត្តត្បូងឃ្មុំ បានចូលរួមប្រកួតប្រជែង ដើម្បីយកជ័យលាភី។
លោកប្រធានមន្ទីរទេសចរណ៍ខេត្ត បានមានប្រសាសន៍បន្តថា ជាមួយគ្នានោះ រយៈពេល២យប់នេះ គឺមានស្តង់តាំងពិព័រណ៍ផលិតផលនៅក្នុងស្រុកមានរហូតដល់ជាង១០០ស្តង់ ហើយគេក៏ឃើញមនុស្សម្នា ក្មេងចាស់ ប្រុសស្រីជាច្រើននាក់ដើរទស្សនា ក្នុងនោះរួមមាន ៖ នំខ្មែរ, ត្រីងៀត. ចេកឆាប. ឆ្នាំងចាក់អាលុយមីញ៉ូម .ផលិតផលធ្វើពីឫស្សី, ម្ទេសខ្មែរ, ប្រេងស្លឹកគ្រៃ,ហូលផាមួង ព្រមទាំងរបស់របរមួយចំនួនទៀតជាច្រើន។
លោកប្រធានមន្ទីរទេសចរណ៍ខេត្ត មានប្រសាសន៍បន្តថា នៅតាមដងផ្លូវមាត់ទន្លេ ត្រូវបានដាក់ពង្រាយដោយកម្លាំងសមត្ថកិច្ចចម្រុះ គឺមិនអនុញ្ញាតឱ្យម៉ូតូ ឬរថយន្តបើកឆ្លងកាត់នោះទេ ដើម្បីបញ្ជៀសការកកស្ទះចរាចរណ៍ជាយថាហេតុណាមួយ។ ហើយក្នុងពិធីប្រណាំងទូក.ងនេះ ប្រជាពលរដ្ឋមកពីគ្រប់ទិសទី ក្នុងនោះមកពីតាមបណ្ដាខេត្តនៅជុំវិញខេត្តកំពង់ចាម រួមមាន ៖ ត្បូងឃ្មុំ, ព្រៃវែង, កណ្ដាល និងក្រចេះ ដែលក្នុងរយៈពេលពីថ្ងៃនេះ គឺមានភ្ញៀវជាតិ និងអន្តរជាតិ សរុបរហូតដល់ជាង៤០ម៉ឺននាក់ឯណោះ។
លោកប្រធានមន្ទីរទេសចរណ៍ខេត្ត មានប្រសាសន៍បន្តទៀតថា ចំពោះភ្ញៀវដែលមកលេង គឺក្នុងចិត្តរបស់ពួកគាត់ម្នាក់ៗពោរពេញទៅដោយភាពសប្បាយរីករាយ។ ហើយក៏ចេះអធ្យាស្រ័យគ្នាទៅវិញទៅមក គឺមិនមានបាតុភាពអសកម្មណាមួយកើតឡើងនោះទេ។ ហើយសម្រាប់ឆ្នាំ២០២៤ខាងមុខនេះ ប្រសិនបើពេលវេលាអំណោយផលល្អ ឯកឧត្តមអភិបាលខេត្ត នឹងរៀបចំពិធីប្រណាំងទូក.ងនេះបន្តទៀត ដើម្បីបង្កើតនូវភាពសប្បាយរីករាយ និងឱ្យព្រឹត្តិការណ៍នេះ រឹតតែល្អប្រសើរពីមួយឆ្នាំទៅមួយឆ្នាំ។
សូមបញ្ជាក់ថា នៅក្នុងស្តង់តាំងពិព័រណ៍នោះ ក៏មានមន្ទីរទេសចរណ៍មួយបានដាក់តាំងបង្ហាញពីតំបន់រមណីយដ្ឋាននានានៅក្នុងខេត្តកំពង់ចាមដែរ។ ហើយអ្វីដែលគួរឱ្យកត់សម្គាល់នោះ គឺមុនពេលពិធីអុំទូក គឺមានប្រជាពលរដ្ឋមួយចំនួន ពួកគាត់បានចំណាយពេលវេលាធ្វើដំណើរតាមរថយន្តជាលក្ខណៈគ្រួសារទៅកម្សាន្តលេងនៅតំបន់រមណីយដ្ឋានបែបធម្មជាតិមួយចំនួនទៀតផង។
លោកស៊ាន សុគុណ ប្រធានមន្ទីរទេសចរណ៍ខេត្ត ក៏បានរំលឹកដែរថា នៅតាមប្រាង្គសិលាចារឹកអង្គរវត្តក្នុងខេត្តសៀមរាប គឺបានចារពីពិធីប្រណាំងទូក.ងនេះ ដែលមានប្រវត្តិដ៏យូរលង់ណាស់មកហើយ។ ក្រោយមក បុព្វបុរសយើងបានប្រារព្ធពិធីប្រណាំងទូក.ងនេះ ដោយធ្វើឡើងពីសម័យកាលមួយទៅសម័យកាលមួយបន្ត រហូតមកដល់បច្ចុប្បន្ន ហើយយើងក៏នៅតែរក្សាប្រពៃណីដ៏ល្អផូរផង់របស់ខ្មែរនេះ មិនឲ្យបាត់បង់ឡើយ។
លោកប្រធានមន្ទីរទេសចរណ៍ខេត្ត ក៏បានរំលឹកបន្តថា សម្រាប់ទូក.ងរបស់មន្ទីរទេសចរណ៍ខេត្ត ក៏បានចូលរួមប្រណាំងដែរ ប៉ុន្តែមិនបានជាប់ចំណាត់ថ្នាក់នោះទេ តែក៏ជាការបង្ហាញនៅចំណងសាមគ្គីភាពរវាងកីឡាករទូក.ង ដែលតែងតែមានចាញ់ មានឈ្នះ គឺជារឿងធម្មតា។ ហើយនៅយប់ថ្ងៃទី២៩ ខែតុលា ឆ្នាំ២០២៣ គឺមានការបណ្ដែតប្រទីប បា.ញ់កាំជ្រួច ដើម្បីបង្កើតនូវភាពសប្បាយរីករាយជូនដល់ប្រជាពលរដ្ឋ។
គួរបញ្ជាក់ផងដែរថា នៅក្នុងព្រឹត្តិការណ៍ខាងលើនេះ ក៏មានការអញ្ជើញចូលរួមពីសំណាក់ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំ យុវជន និងកីឡា, ឯកឧត្តមសេង ទៀង និងលោកជំទាវជំនួយការផ្ទាល់អតីតសម្ដេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា ក៏បានបង្ហាញវត្តមានក្នុងទឹកមុខស្រស់ស្រាយទៀតផង។
ចែករំលែកព័តមាននេះ