រាជធានីភ្នំពេញ ៖ ប្រធានមហោស្រពភាពយន្តខ្លីចតុមុខ លោក ស៊ុំ ស៊ីថែន បានគូសបញ្ជាក់ក្នុងសន្និសីទសារព័ត៌មានដែលបានធ្វើឡើងកាលពីថ្ងៃទី២៣ ខែតុលា ឆ្នាំ២០២៣ នៅមជ្ឈមណ្ឌលបណ្តុះបណ្តាលជំនាញ និងទទួលថតភាពយន្តនៅកម្ពុជា ( Cambodia Film Commission – CFC) ថា «ឆ្នាំនះ មហោស្រពទទួលបានភាពយន្តខ្លីសរុបចំនួន២២០ចំណងជើង តែសម្រាំងតែ៤៨ចំណងជើង ដើម្បីប្រកួត និងចាក់បង្ហាញឆ្នាំនេះ។ ខណៈពេលកាលពីឆ្នាំទៅ ភាពយន្តខ្លីកម្ពុជា មាន៦៣រឿង ឆ្នាំនេះទទួលបាន៦០រឿង ហើយទោះបីរឿងប្រឌិតខ្មែរខ្លី ក្នុងឆ្នាំនេះមានតែ៣០រឿង តែសុទ្ធតែខ្លឹម»។
លោកបន្ថែមថា «ឆ្នាំនេះ មហោស្រពមានលក្ខណៈពិសេសជាងមុន ដែលក្នុងនោះសម្រាប់រង្វាន់ គឺច្រើនជាងឆ្នាំមុនៗ សរុបដល់ទៅ៩ រួមមាន ៖ ភាពយន្តខ្លីកម្ពុជាល្អបំផុត ទទួលបានរង្វាន់ ១០០០ដុល្លារ និងពាន១, ភាពយន្តខ្លីកម្ពុជាល្អបន្ទាប់ ទទួលបាន៥០០ដុល្លារ និងពាន១, ភាពយន្តខ្លីអន្តរជាតិល្អបំផុត ទទួលបាន៣០០ដុល្លារ និងពាន១។ រង្វាន់ទស្សនិកជន ដល់ភាពយន្តខ្លីក្នុងស្រុក – ៣០០ ដុល្លារ និងលិខិតសរសើរ រង្វាន់ទស្សនិកជន។ ដល់ភាពយន្តខ្លីអន្តរជាតិ – លិខិតសសើរ។ ចំណារលើកទឹកចិត្តពីមេប្រយោគកម្ពុជា (Cambodian Special Jury Mention) – លិខិតសសើរ។ ចំណារលើកទឹកចិត្តពីមេប្រយោគអន្តរជាតិ (International Special Jury Mention) – លិខិតសសើរ។ រង្វាន់ឧបករណ៍ភ្លើងដល់ជយលាភីមហោស្រព និងរង្វាន់ឧបករណ៍ភ្លើងដល់ក្រុមឆ្នើមរបស់សិក្ខាសាលាប្រើភ្លើងពីAMARAN»។
លោកបញ្ជាក់ថា «ពិធីបើកជំនាន់ទី១២នេះ នឹងរំលេចស្នាដៃរបស់យុវសមិទ្ធករឯករាជ្យ១រូប គឺលោក លី ប៉ូឡែន តាមរយៈភាពយន្តខ្លីរបស់គាត់រឿង «ឆ្ងាយដាច់អាល័យ» (Further and Further Away)។ ភាពយន្តខ្លីនេះ បានធ្វើដំណើរឆ្លងកាត់ច្រើនមហោស្រពភាពយន្តនៅជុំវិញពិភពលោករួចហើយ តាំងពីបើកចាក់ដំបូងកាលពីឆ្នាំមុន»។
លោកថា «ជំនាន់ទី១២នេះ ពិសេសត្រង់ថា មហោស្រពសហការជាមួយដៃគូរជាច្រើន ជាពិសេស «ដៃគូសហគមន៍» ដើម្បីបង្កលក្ខណៈអំណោយផលដល់សមិទ្ធករ និងទស្សនិកជន ក្នុងការទទួលបានព័ត៌មាន ក៏ដូចជាពង្រឹងសាមគ្គីភាពក្នុងវិស័យ ប្រៀបដូច «ពីធីបុណ្យ» ក្នុងភូមិស្រុក មួយដូច្នោះដែរ»។
ចំណែក លោក រដ្ឋ សានសិទ្ធិនី ជាអ្នកគ្រប់គ្រង និងរើសរឿងក្រៅស្រុករបស់មហោស្រព បានលើកឡើងដែរថា «គោលបំណងរបស់ខ្ញុំ គឺមិនត្រឹមតែនាំសាច់រឿងដែលមានគុណភាពទេ តែក៏ដាស់អារម្មណ៍ដល់ទស្សនិកជនក្នុងស្រុក តាមរយៈមូលបទដែលឆ្លើយតបនឹងបញ្ហា ដែលសង្គមខ្មែរបច្ចុប្បន្នជួបប្រទះ។ ធ្វើដូចនេះ នឹងអាចប្រែក្លាយនិយមន័យសិល្បៈ និងភាពយន្តពីត្រឹមជាទម្រង់លម្អ ឬកម្សាន្ត មកជាឧបករណ៍ដែលជួយឱ្យយើងបានត្រិះរិះ និងស្វែងយល់ពីសង្គមយើង ដើម្បីអភិវឌ្ឍខ្លួនទៅមុខទៀត»។
គួរបញ្ជាក់ថា មហោសព្រភាពយន្តខ្លីចតុមុខនឹងប្រព្រឹត្តទៅចាប់ពីថ្ងៃទី២៧ រហូតដល់ទី៣០ ខែតុលា ឆ្នាំ២០២៣ ដោយមានរយៈពេលសរុប៤ថ្ងៃជាប់ៗគ្នា។ ទស្សនិកជន ដែលចង់លើកទឹកចិត្តយុវសមិទ្ធករយើង អាចទៅទស្សនារាល់រឿងខ្លីជាប់ជម្រើសទាំងអស់នេះ ក៏ដូចជា បោះឆ្នោតគាំទ្រដោយផ្ទាល់ដល់រឿងដែលខ្លួនពេញចិត្ត នៅរោងភាពយន្ត Legend Cinema – Olympia Mall, K-Mall, SenSok Mega Mall, Major Cineplex – Sorya និង Cine Hub ៕
ចែករំលែកព័តមាននេះ