រាជធានីភ្នំពេញ ៖ តារាសម្តែង និងពិធីការិនី ណូម័រ បានធ្វើឲ្យមហាជន ជាពិសេសបណ្តាអ្នកលេងហ្វេសប៊ុកសម្តែងការភ្ញាក់ផ្អើល បន្ទាប់ពីនាងទើបតែបង្ហោះរូបភាពថ្មីមួយសន្លឹកជាមួយលោក ប៊ុត សីហា ក្នុងពេលដែលអតីតតារាចម្រៀងរូបនេះ ត្រូវបានគេដឹងថា កំពុងតែជាប់ឃុំ ដោយសារការជួញដូរគ្រឿ.ងញៀ.ន។
រូបភាពមួយសន្លឹកត្រូវបានស្រីស្អាត ណូម័រ បង្ហោះនៅលើបណ្តាញសង្គមកាលពីថ្ងៃ២៤ ខែតុលា ឆ្នាំ២០២៣ បង្ហាញពីសកម្មភាពថតរួមគ្នាមួយជាមួយលោក ប៊ុត សីហា ដោយអមជាមួយសំណេរថា «ជាពិធីការិនី បទសម្ពាសន៍ វត្តមានតារាកិត្តិយសលោក ប៊ុត សីហា»។
ការបង្ហោះខាងលើនេះ បានបង្កឱ្យមានការភ្ញាក់ផ្អើលយ៉ាងខ្លាំងពីសំណាក់មហាជន ខណៈពេលដែលមានអ្នកខ្លះបានដាក់ចេញនូវសំណួរស្រដៀងគ្នាថា «តើរូបភាពនេះថតនៅពេលថ្មីៗនេះ ឬយ៉ាងណា?»។ ក្នុងពេលអ្នកខ្លះទៀតក៏បានដាក់ជាចម្ងល់ថា «តើ ប៊ុត សីហា បានចេញពីឃុំវិញហើយឬ?។
ពាក់ព័ន្ធបញ្ហាខាងលើនេះ តារាសម្តែង ណូម័រ បានចេញមុខបកស្រាយតាមរយៈការខមិនពីក្រោមរូបភាពដែលនាងបានបង្ហោះជាមួយលោក ប៊ុត សីហា នោះថា «អធ្យាស្រ័យបងប្អូន នេះជារូបកាលពីប៉ុន្មានខែមុន ដោយសារក្រុមការងារទើបតែផ្ញើររូបមក ក៏យកមកបង្ហោះទុកជាអនុស្សារីយ៍ប៉ុណ្ណោះ»។
ជាការកត់សម្គាល់ អតីតម្ចាស់ជ័យលាភីលេខ១ របស់កម្មវិធីប្រឡងចម្រៀង «The Voice Cambodia» រដូវកាលទី១ គឺលោក ប៊ុត សីហា និងបក្សពួកម្នាក់ទៀត ត្រូវបានកម្លាំងនគរបាលស្រុកគងពិសី ឃាត់ខ្លួនកាលពីវេលាម៉ោង៤និង១០នាទីរសៀល ថ្ងៃទី១២ ខែកញ្ញា ឆ្នាំ២០២៣នេះ ស្ថិតនៅក្នុងភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ។
ស្រដៀងករណីខាងលើនេះដែរ លោក ប៊ុត សីហា ក៏ធ្លាប់ត្រូវបានសមត្ថកិច្ចចាប់ខ្លួនម្តងដែរពាក់ព័ន្ធនឹងការប្រើប្រាស់គ្រឿ.ងញៀ.ន កាលពីអំឡុងឆ្នាំ២០១៨ ស្ថិតក្នុងសង្កាត់ពងទឹក ខណ្ឌដង្កោ រាជធានីភ្នំពេញ ក្នុងពេលដែលលោកបានទិញគ្រឿ.ងញៀ.ន ដើម្បីយកមកជក់។ យ៉ាងណាអំឡុងពេលនោះ ក្រុមគ្រួសាររបស់លោកបានចេញមុខធានាឲ្យលោកចេញមកវិញ ដើម្បីធ្វើការអប់រំ និងដាក់នៅកន្លែងបន្សាបគ្រឿ.ងញៀ.ន។
គួររំលឹកថា ៖ តារាចម្រៀង ប៊ុត សីហា និងបក្ខពួក ត្រូវនគរបាលឃាត់ខ្លួន ពាក់ព័ន្ធគ្រឿងញៀ.ន ៕
ចែករំលែកព័តមាននេះ