ក្រោយគ្រងមកុដ Miss Grand Cambodia 2023 កញ្ញា ភឹម ស្រីនោ បានប្តេជ្ញាត្រៀមខ្លួននឹងធ្វើរឿងមួយសម្រាប់ជាតិ ក្នុងពេលដែលនាងមានឱកាសបង្ហាញវត្តមាននៅលើឆាកអន្តរជាតិនាពេលខាងមុខនេះ
រាជធានីភ្នំពេញ ៖ ក្រោយគ្រងមកុដ Miss Grand Cambodia 2023 កញ្ញា ភឹម ស្រីនោ បានប្តេជ្ញាត្រៀមខ្លួននឹងធ្វើរឿងមួយសម្រាប់ជាតិ ក្នុងពេលដែលនាងមានឱកាសបង្ហាញវត្តមាននៅលើឆាកអន្តរជាតិនាពេលខាងមុខនេះ។
អ្វីដែលនាងនឹងធ្វើនោះ គឺការនាំប្រទេសកម្ពុជាដ៏ល្អមួយនេះ ទៅកាន់ឆាកអន្តរជាតិ ដើម្បីឲ្យបរទេសស្គាល់កាន់តែច្បាស់ ក្នុងនាមតំណាងប្រទេសចូលរួមប្រកួត Miss Grand international 2023 ដែលនឹងធ្វើឡើងនៅប្រទេសវៀតណាម។
ស្រីស្អាត ភឹម ស្រីនោ បានលើឡើងតាមរយៈសំណេរដែលបានបង្ហោះលើបណ្តាញសង្គមថា «ជាដំបូង នាងខ្ញុំសូមអរគុណដល់អ្នកមានគុណរបស់ខ្ញុំទាំងពីរ ដែលបានចិញ្ចឹមបីបាច់ថែរក្សាកូន បង្រៀនកូនឲ្យក្លាយជាមនុស្សរឹងមាំ មានការតស៊ូតាំងពីតូចមក ទោះបីជាលោកទាំងពីរលំបាកយ៉ាងណាក៏លោកទាំងពីរតែងតែប្រាប់ឲ្យកូនក្លាយជាមនុស្សល្អនៅក្នុងសង្គម។ នាងខ្ញុំក៏សូមអរគុណចំពោះក្តីស្រលាញ់របស់ប្រជាជនខ្មែរ និងអ្នកគាំទ្រដែលតែងតែផ្តល់កម្លាំងចិត្ត និងការចូលចិត្តមកលើរូបនាងខ្ញុំ សូមសន្យាថានាងខ្ញុំនឹងខិតខំប្រឹងប្រែងឲ្យអស់ពីសមត្ថភាព ដើម្បីនាំប្រទេសកម្ពុជាដ៏ល្អមួយនេះ ទៅកាន់ឆាកអន្តរជាតិនៃ Miss Grand International 2023»។
ស្រីស្អាត ភឹម ស្រីនោ បន្តថា «នាងខ្ញុំសង្ឃឹមថា ពុកម៉ែ បងប្អូន នៅតែបន្តការគាំទ្រមកដល់រូបនាងខ្ញុំផងណា៎! នាងខ្ញុំពិតជាត្រូវការអ្នកទាំងអស់គ្នា ដើម្បីរួមដំណើរមួយនេះជាមួយនឹងនាងខ្ញុំណាស់!» ។
ស្រីស្អាត ភឹម ស្រីនោ បានបន្ថែមថា «ជាក្មេងស្រីម្នាក់ ដែលតែងតែដើរតាមក្តីស្រមៃ រហូតក្លាយជា Miss Grand Cambodia 2023 ហើយនៅក្នុងពេលនេះ នាងខ្ញុំបានទទួលកាតព្វកិច្ចដ៏សំខាន់មួយដែលត្រូវបំពេញនាពេលខាងមុខនេះ គឺការក្លាយខ្លួនជាបវរកញ្ញាតំណាងឲ្យ ប្រទេសកម្ពុជា ទៅលើឆាកអន្តរជាតិក្នុងកម្មវិធី Miss Grand International 2023 ដែលប្រារព្ធឡើងនៅប្រទេសវៀតណាម ដែលការប្រកួតនឹងចាប់ផ្តើមនៅខែតុលាខាងមុខនេះហើយ។ អរគុណបងប្អូនប្រជាជនខ្មែរ សូមអរគុណសម្រាប់ការស្រលាញ់ នាងខ្ញុំនឹងខិតខំអោយល្អ អស់ពីឱ្យអស់ពីសមត្ថភាពដើម្បីប្រទេសជាតិ»។
ក្នុងភាពជោគជ័យមួយនេះ ស្រីស្អាត ភឹម ស្រីនោ ក៏សម្តែងការដឹងគុណចំពោះបុគ្គលសំខាន់ៗជាច្រើន ជាពិសេសលោកស្រី អ៊ឹម សុគន្ធា ជាថ្នាក់ដឹកនាំ និងផលិតកម្មវិធី Miss Grand Cambodia និង បង Sara Pich ក៏ដូចជាគណៈកម្មាការគ្រប់រូប ដែលការជឿជាក់លើរូបនាងរហូតនាងខ្ញុំអាចគ្រងតំណែងជាបវរកញ្ញាប្រចាំប្រទេសកម្ពុជាឆ្នាំ២០២៣នាពេលនេះ។
នាងក៏អរគុណបងប្អូនអ្នកសិល្បៈ មិត្តភក្តិទាំងអស់ និងសាច់ញាតិដែលបានមកគាំទ្រដោយផ្ទាល់ ហើយស្រែក និងហ៊ោរផ្តល់កម្លាំងចិត្តនៅថ្ងៃផ្តាច់ព្រ័ត្រដែលជាកម្លាំងចិត្តដល់រូបនាង។ សូមអរគុណដល់បណ្តាអ្នកគាំទ្រជាទីស្រឡាញ់របស់នាងទាំងអស់ អ្នកទាំងអស់គ្នាជាកម្លាំងចិត្ត ជាភាពជោគជ័យសម្រាប់ដំណើរមួយនេះ បើគ្មានអ្នកទាំងអស់គ្នា ក៏គ្មានភាពជោគជ័យមួយនេះដែរ សង្ឃឹមថា ពុកម៉ែបងប្អូននៅតែស្រឡាញ់ ហើយបន្តការគាំទ្រដល់រូបនាង នៅពេលខាងមុខនេះ ហើយកាន់ដៃគ្នាទៅមុខបន្តទៀត សម្រាប់ការប្រកួតលើឆាកអន្តរជាតិ៕
ចែករំលែកព័តមាននេះ