រាជធានីភ្នំពេញ ៖ តារាសម្តែងនាង លីវ ជីលី ផ្ទុះប្រតិកម្មឆ្លើយតបទៅកាន់មហាជនមួយចំនួន ដែលប្រើពាក្យសម្ដីនាំភ្លើងមកលើរូបនាង ក្រោយពីតារាស្រីរូបនេះ បង្ហោះសារនៅលើបណ្តាញសង្គមមួយ ពាក់ព័ន្ធលទ្ធផលជាប់ជ័យលាភីរបស់ «Miss Grand Cambodia 2023» ដែលទើបតែបិទបញ្ចប់ការពីពេលថ្មីៗនេះ ។
ស្រីស្អាត លីវ ជីលី បានបង្ហោះសារខ្លីមួយ នៅលើគណនីហ្វេសប៊ុករបស់ខ្លួន ក្រោយកម្មវិធីប្រកួតសម្រស់ «Miss Grand Cambodia 2023» បានបញ្ចប់ថា «បងចូលរួមសោកស្តាយដែលអូនមិនបានមកុដ Leakena In បងសោកស្តាយខ្លាំងបំផុត »។
ការបង្ហោះសារខាងលើនេះ បានធ្វើឲ្យអ្នកស្នេហាវិស័យបវរកញ្ញានាំគ្នាខំមិនពីក្រោមដោយធ្វើការវែងញែក និងលើកជាយោបល់ផ្សេងៗគ្នាទៅលើការបង្ហោះសាររបស់នាង រហូតមានអ្នកខ្លះសម្តែងការមិនពេញចំពោះការសរសេរបង្ហោះរបស់នាងនាពេលនេះឡើយ ខណៈពេលអ្នកខ្លះទៀត ក៏បានប្រើពាក្យថា «នាងគឺជាអ្នកនាំភ្លើងថែមទៀតផង»។
ការលើកឡើងនូវពាក្យមួយនេះ បានធ្វើឲ្យអតីត «Miss Grand Cambodia 2020» ស្រីស្អាតនាង លីវ ជីលី សម្តែងការមិនសប្បាយចិត្ត និងបង្ហោះសារឆ្លើយតបវិញថា «ប្រហែលពួកគាត់ចង់អោយខ្ញុំបិទមាត់ទាំងដែលខ្ញុំមានសិទ្ធិជាប្រជាពលរដ្ឋមួយរូបដែរ អបអរក៏ខុស សោកស្តាយក៏ខុស លើកមុនហូបបាយក៏ខុស តិចទៀតចូលបន្ទប់ទឹកក៏ខុស ចឹងបានថា យើងម្នាក់ផ្គាប់ចិត្តគេ១ប្រទេសមិនបានទេ មានអ្នកស្អប់ មានអ្នកស្រលាញ់ ជារឿងធម្មតា»។
នាងបញ្ជាក់ថា «ខ្ញុំមានសិទ្ធិបញ្ចេញមតិ បងប្អូនទាំងអស់គ្នាក៏មានសិទ្ធិ បើខ្ញុំទៅលួ.ច ឆ.ក់ ប្ល.ន់ អានឹងវាខុស ហួសចិត្តដល់ពេកៗចឹងទៅ សូមបងប្អូនរៀនបើកចិត្តខ្លះ ខ្ញុំមិនទាន់ទៅដៀល ទៅជេរ ប្រជាជនយើងម្នាក់ណាទេ ជាចុងក្រោយខ្ញុំស្រលាញ់ប្រជាជនកម្ពុជា»។
ដោយឡែកតាមរយៈវីដែអូដែលបាន Live តាមបណ្តាញសង្គម បន្ថែមពីលើអ្វីដែលនាងបានបង្ហោះខាងលើនេះ ស្រីស្អាត លីវ ជីលី បានលើកឡើងថា «ការបង្ហោះសារខាងលើនេះ គឺគ្រាន់តែបញ្ចេញមតិផ្ទាល់ខ្លួន ក្នុងនាមជាប្រជាពលរដ្ឋមួយរូបតែប៉ុណ្ណោះ ចុះហេតុអ្វីត្រូវប្រើពាក្យរិះគន់បែបនេះមកលើរូបនាងទៅវិញ?»។
នាងបញ្ជាក់ថា «នាងយល់ពីស្ថាប័ននៃការរៀបចំកម្មវិធីប្រកួតសម្រស់នេះច្បាស់ ហើយការបង្ហោះនេះ គឺនាងមានហេតុផលមួយនៅក្នុងនោះ ខណៈពេលដែលនាងមិនបានបង្ហោះដៀមដាម ឬជេរបុគ្គណាម្នាក់នោះឡើយ»។ នាងបន្ថែមថា «នាងធ្លាប់ឆ្លងកាត់ការប្រកួតនេះ ទើបនាងក៏ចង់ផ្តល់ជាបទពិសោធន៍សម្រាប់ប្អូនៗជំនាន់ក្រោយដែលមានបំណងចង់ចូលរួមការប្រកួត និងត្រូវត្រៀមខ្លួនធ្វើយ៉ាងណាឲ្យបានចូលដល់វគ្គ Top»។
យ៉ាងណាបើតាមស្រីស្អាត លីវ ជីលី ថា «ការលើកឡើងខាងលើនេះ គឺជាហេតុផលរបស់នាង ហើយស្នើសុំអោយទស្សនិកជនកុំមានការភាន់ច្រឡំទៅលើអ្វីដែលនាងបានផុសនេះ ក្នុងពេលដែលនាងក៏បានសម្តែងការអបអរសាទរចំពោះម្ចាស់មកុដនៃកម្មវិធីនេះផងដែរ»។
គួរបញ្ជាក់ថា បន្ទាប់ពីការប្រកួតនៃកម្មវិធី «Miss Grand Cambodia» បានបិទបញ្ចប់ ដោយបានរកឃើញម្ចាស់មកុដបានលើបេក្ខនារីមកពីរាជធានីភ្នំពេញ គឺកញ្ញា ភឹម ស្រីណូ នោះ ក៏មានមហាជនមួយចំនួននាំគ្នារិះគន់សម្តែងការមិនពេញចិត្ត ចំពោះការជ្រើសរើសបេក្ខភាពខាងលើនេះឲ្យគ្រងមកុដពីគណៈកម្មការនៃកម្មវិធីនេះឡើយ ។ ភាគច្រើនអ្នកគាំទ្រទាំងអស់នោះ ចង់ឃើញបេក្ខនារី២រូប គ្រងមកុដនៃកម្មវិធីសម្រស់មួយនេះ គឺកញ្ញា កុយ អេនណា និងកញ្ញា អ៊ិន លក្ខិណា ដែលពួកគេយល់ឃើញថា អ្នកទាំងពីរមានសមត្ថភាព និងរូបសម្រស់គ្រប់គ្រាន់សម្រាប់ការប្រកួតនៅលើឆាកអន្តរជាតិតំណាងកម្ពុជា។
យ៉ាងណា ក្រោយមើលឃើញពីការរិះគន់ខាងលើនេះ អ្នករៀបចំកម្មវិធី «Miss Grand Cambodia 2023» អ្នកនាង អ៊ឹម សុគន្ធា ក៏បានបង្ហោះសារនៅលើគណនីហ្វេសប៊ុករបស់ខ្លួនឆ្លើយតបការរិះគន់ទាំងនោះថា «នាងខ្ញុំមិនខឹង មិនអន់ចិត្តទេ សម្រាប់បងប្អូនមួយចំនួនដែលគាត់គិតមកលើខ្ញុំយ៉ាងណា តែនាងខ្ញុំបានប្រាប់ហើយកម្មវិធី ត្រូវតែសុក្រឹត ខ្វះតែបន្តិចក៏មិនបានដែរ ឱកាសមានតែ១នាទីទេ ហើយបើចង់អោយ idol របស់អ្នកទទួលបានមកុដនៅឆ្នាំណាមួយ ត្រូវតែចេះលើកទឹកចិត្តគាត់ កុំបង្កបញ្ហា ពីព្រោះកម្មវិធីនេះ នាងខ្ញុំរៀបចំអស់ថវិកាច្រើនណាស់ យកបេះដូង នឹងក្ដីស្រលាញ់មកធ្វើជូនដល់ជាតិ »។
នាងបញ្ជាក់ថា «សូមប្រើសារ comment របស់អ្នក មកជាប្រយោជន៍ដល់បេក្ខនារីដែលអ្នកស្រលាញ់ និងផ្ដល់កម្លាំងចិត្តដល់ក្រុមការងារ Miss grand ទាំងអស់ ពួកគាត់អត់បានគេងជាង១០ថ្ងៃហើយ ។ បេក្ខនារីទាំងអស់ចូលប្រើពេលវេលាមួយនេះ យកបទពិសោធន៍ហាត់រៀន ហើយរៀបចំខ្លួនអោយរួចរាល់ជាបរវកញ្ញាសម្រាប់ឆ្នាំណាមួយ ស្វែងយល់ពីកម្មវិធីថា Grandត្រូវការអ្វី?? នោះ អ្នកនឹងមានសំឡេងគាំទ្រកាន់តែខ្លាំងទូទាំងប្រទេស100% ដើម្បីត្រៀមខ្លួន ទៅយកមកុដអោយប្រទេសកម្ពុជានៅថ្ងៃណាមួយ»។
បើតាមអ្នកនាង អ៊ឹម សុគន្ធា ថា «ទោះបីជាការជ្រើសរើសមួយនេះ បងប្អូនមួយចំនួនមិនពេញចិត្ត តែនាងខ្ញុំគិតថា ការជ្រើសរើសរបស់ខ្ញុំសាកសមបំផុតដែលខ្ញុំជាអ្នកដឹកនាំនៃកម្មវិធី Miss Grand Cambodia 2023 ។ ខ្មែរស្រលាញ់ខ្មែរ ប្រទេសតូចតែបេះដូងធំ… សូមលើកទឹកចិត្តដល់គាត់ Phoem Sreyno ដែលបវរកញ្ញាតំណាងប្រទេសកម្ពុជាឆ្នាំ២០២៣ ទាំងអស់គ្នាក្នុងនាមជាខ្មែរដូចគ្នា»៕
ចែករំលែកព័តមាននេះ