រាជធានីភ្នំពេញ ៖ កែវភ្នែកមុតថ្លា គួបផ្សំ នឹងភាពសិចស៊ីគួរឱ្យទាក់ទាញចិត្តបុរស នោះគឺកញ្ញាមឹង រីសា វ័យ២៧ឆ្នាំ ជាអ្នកចម្រៀងថ្មីប្រចាំភោជនីយដ្ឋានវ៉ាស៊ីនតោន ស្ថិតនៅតំបន់ព្រែកលៀប តាមដងផ្លូវជាតិលេខ៦A ។ សម្រាប់អ្នកចេញចូលភោជនីយដ្ឋាននោះគេពិតជាធ្លាប់ស្គាល់នាងយ៉ាងច្បាស់ ព្រោះនាងមិនត្រឹមតែជាអ្នកចម្រៀងទេ គឺជាពិធីការិនីដែលមានវោហារក្បោះក្បាយទៀតផង ។
ទស្សនិកជនជាច្រើនទៀត ក៏ធ្លាប់បានឃើញនាង និងស្តាប់សំនៀងរបស់នាងពេលនាងច្រៀងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាដូចជាកម្មវិធីប្រគំតន្ត្រីនៃស្ថានីយទូរទស្សន៍ CTN បាយ័ននិងប៉ុស្តិ៍លេខ៥ ជាដើម ។ ជាពិសេសនោះគេស្គាល់នាងច្បាស់តាមរយៈបទ«មិនយកទេប្រុសញៀនថ្នាំ»ដែលជាបទអប់រំអំពីគ្រឿងញៀន ។
កញ្ញាមឹង រីសា រំលឹកឱ្យដឹងថា មុនក្លាយជាអ្នកចម្រៀងអាជីពនាងធ្លាប់បានហាត់រៀនច្រៀងនៅក្នុងក្លឹបសិល្បៈមួយរយៈ ។ ក្រោយពេលរៀនចប់នាងចេញច្រៀងនៅតាមភោជនីយ ដ្ឋាន ។ នាងចូលចិត្តជ្រើសរើសបទចម្រៀងទំនើបចម្រុះមកច្រៀងមិនប្រកាន់ថាបទបែបមនោសញ្ចេតនាចាស់ៗរបស់រាជិនីសម្លេងមាស រស់ សេរីសុទ្ធា ឬបទថ្មីបែបយុវវ័យឌីស្កូញ័រញាក់កន្ត្រាក់អារម្មណ៍ទេ ។
ក្រៅពីច្រៀងជាប្រចាំនៅក្នុងភោជនីយដ្ឋាន គេឧស្សាហ៍ឃើញនាងមានកិត្តិយសឡើងច្រៀងលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានា និងថតសម្លេងចូលស៊ីឌី និងសម្តែងកាយវិការខារ៉ាអូខេឱ្យផលិតកម្មរៃមាស តោមាស និងបុប្ផា ។ ជាកិត្តិយសសម្រាប់រូបនាងគឺពេលនេះនាងកំពុងត្រៀមចេញទៅច្រៀងនៅឯក្រៅប្រទេសក្នុងពេលឆាប់ៗខាងមុខ ។
ក្នុងភាពសិចស៊ីបែបយុវវ័យសម័យថ្មី មឹង រីសា អះអាងថា នាងពុំទាន់មានជាប់ពាក់ព័ន្ធស្នេហាជាមួយបុរសណាម្នាក់ទេ តែក៏មិនមែនបានន័យថា គ្មានអ្នកស្រឡាញ់ដែរ គឺមានបុរសជាច្រើនតាមសុំស្នេហ៍នាង តែនាងគិតថា«ការសុំស្នេហ៍តាមផ្លូវមិនអាចយកជាការបានទេ បើស្រឡាញ់ពិតសូមចូលដល់មេបា » ៕
ចែករំលែកព័តមាននេះ