នៅទីបំផុត បុរសម្នាក់ដែលបានធ្វើសកម្មភាពគប់ទឹកកកដាក់តារាចម្រៀងរ៉េប លោក ជី ដេវីដ បានសម្រេចចិត្តចេញមុខសុំទោសជាសាធារណៈហើយ បន្ទាប់ពីតារាចម្រៀងរូបនេះ បានប្រកាសទុកពេល៨ម៉ោងអោយបុរសរូបនោះចេញមុខដោះស្រាយ និងសុំទោស នៅមុនពេល
រាជធានីភ្នំពេញ ៖ នៅទីបំផុត បុរសម្នាក់ដែលបានធ្វើសកម្មភាពគប់ទឹកកកដាក់តារាចម្រៀងរ៉េប លោក ជី ដេវីដ បានសម្រេចចិត្តចេញមុខសុំទោសជាសាធារណៈហើយ បន្ទាប់ពីតារាចម្រៀងរូបនេះ បានប្រកាសទុកពេល៨ម៉ោងអោយបុរសរូបនោះចេញមុខដោះស្រាយ និងសុំទោស នៅមុនពេលលោកមានវិធានការផ្សេងៗ។
គណនីហ្វេសប៊ុករបស់បុរសខាងលើនេះ ដែលមានឈ្មោះ «Chhayleng khy» បានបង្ហោះសារសុំទោសលោក ជី ដេវីដ កាលពីថ្ងៃទី១ ខែសីហា ឆ្នាំ២០២៣ នេះថា «ខ្ញុំបាទឈ្មោះ ឃី ឆៃឡេង សូមធ្វើការសុំទោសជាសាធារណៈទៅកាន់លោក ជី ដេវីត តារាចម្រៀងរ៉េបនៃព្រះរាជាណាចក្រកម្ពុជា ក៏ដូចជាហ្វេនៗរបស់លោកទាំងអស់គ្នាផងដែរ ដោយរូបខ្ញុំបាទ បានប្រព្រឹត្តខុសកាលពីយប់ថ្ងៃទី២៩ ឈានចូលថ្ងៃទី៣០ ខែកក្កដាកន្លងមក នៅផាប់មួយកន្លែង ក្នុងខេត្តព្រះសីហនុ ដែលអមដោយរូបភាព និងអាកប្បកិរិយាមិនសមរម្យទៅដល់លោក ជី ដេវីត និងហ្វេនៗរបស់គាត់ដទៃទៀត»។
លោកបញ្ជាក់ថា «ខ្ញុំបាទ សូមទទួលស្គាល់នូវកំហុសខុសឆ្គងទាំងអស់ដែលបានប្រព្រឹត្ត ហើយក៏សូមសន្យាថា នឹងមិនអោយមានទង្វើបែបនេះកើតឡើងម្តងទៀតឡើយ។ ជាថ្មីម្តងទៀត សូមលោក ជី ដេវីត និងហ្វេនៗផ្តល់នូវការអភ័យទោសដល់រូបខ្ញុំបាទបានកែប្រែសារជាថ្មី! សូមទទួលនូវការសុំទោស និងគោរពពីខ្ញុំបាទ!»។
បុរសខាងលើនេះ ក៏បានបញ្ជាក់ចុងក្រោយតាមរយៈសារដែលបានបង្ហោះនោះដែរថា «មិត្តនៅរួមតុខ្ញុំទាំងអស់ ពួកគាត់មិនបានដឹងរឿងទាំងនេះទេ»។
ទោះជាយ៉ាងណា បើទោះបីជាបុរសខាងលើនេះ បានចេញមុខសុំទោសតារាចម្រៀងរ៉េបលោក ជី ដេវីដ នាពេលនេះក៏ដោយ ប៉ុន្តែគេឃើញមានបណ្តាអ្នកគាំទ្រតារាចម្រៀងរូបនេះជាច្រើនហាក់នៅមិនទាន់អស់ចិត្ត និងបង្ហាញអារម្មណ៍មិនទទួលយកនូវការសុំទោសនេះឡើយ ព្រោះពួកគេយល់ថា «ទង្វើបែបនេះ មិនអាចទទួលយកបានទេ»។
យ៉ាងណា ក្រោយការចេញមុខសុំទោសពីបុរសបង្កខាងលើនេះ គេនៅមិនទាន់ឃើញតារាចម្រៀងលោក ជី ដេវីដ មានការឆ្លើយតបបែបណានៅឡើយទេ។
ជាការកត់សម្គាល់ តារាចម្រៀងលោក ជី ដេវីដ បានប្រកាសទុករយៈពេល៨ម៉ោង ដើម្បីអោយជនបង្កដែលបានគប់ទឹកកកមកលើរូបលោកនៅក្នុងហាងផាប់មួយកន្លែង ដែលលោកបានទៅច្រៀងកាលពីពេលថ្មីៗនេះ។ ការប្រកាសខាងលើរបស់តារាចម្រៀងរូបនេះ បានធ្វើឡើង បន្ទាប់ពីលោកទើបតែទទួលវីដេអូដែលថតពីកាមេរ៉ាសុវត្ថិភាពជុំវិញករណីខាងលើនេះ។
ជាមួយនឹងរូបភាពដំបូងដែលត្រូវបានបង្ហោះតាមបណ្តាញសង្គម តារាចម្រៀងលោក ជី ដេវីដ ក៏បានភ្ជាប់ជាមួយនឹងសំណេរថា «ថ្ងៃនេះបន្ទាប់ពីខ្ញុំបានមើល Security Video ខ្ញុំពិតជាតក់ស្លុត និងហួសចិត្តជាមួយអាកប្បកិរិយាគួរអោយខ្ពើមរអើមពោរពេញទៅដោយការមើលងាយ ជិះជាន់តម្លៃមកលើរូបខ្ញុំជាអ្នកសិល្បៈខ្លាំងណាស់ គឺខ្លាំងហួសពីការស្មាន។ និយាយដោយស្មោះត្រង់ ក្នុងពេលនេះចិត្តខ្ញុំក៏ចង់លើកលែង ក៏មិនចង់បន្តផុស សឹងតែថាអោយកន្លងហួសហើយក៏ចប់ទៅចុះ ប៉ុន្តែដោយកម្លាំងអ្នកគាំទ្រ និងមហាជន ខ្ញុំមិនអាចប្រើប្រាស់ចិត្តប្រណីរបស់ខ្ញុំចំពោះមនុស្សដែលមានចិត្តពា.លដូចអ្នកបាននោះទេ វាហាក់ដូចជាមិនគប្បីទាល់តែសោះ បើខ្ញុំនៅតែចចេសចង់លើកលែង»។
លោកថា «ខ្ញុំជាមនុស្សរឹងមាំគ្រប់បញ្ហា តែខ្ញុំក៏មានបេះដូងឈឺចាប់នឹងទង្វើថោ.កទាបបែបនេះដែរ ដោយហេតុខ្ញុំផ្ទាល់បានជួបរឿងនេះ ខ្ញុំនឹងក្រោកឈរជាសិល្បករម្នាក់ ដើម្បីលុបបំបាត់ការមើលងា.យ មើលថោក ដល់សិល្បករ និងសិល្បការិនីដទៃទៀត ក៏ដូចជាក្រោកឈរ ដើម្បីមហាជន និងអ្នកគាំទ្ររបសខ្ញុំ ។ ខ្ញុំក៏សង្ឃឹមថា ជននេះនឹងចូលខ្លួនសុំទោសជាសាធារណៈចំពោះអ្នកគាំទ្ររបស់ខ្ញុំ និងមហាជន ពីទង្វើថោ.កទាបរបស់ខ្លួន ហេតុដែលខ្ញុំនិយាយដូចនេះ ពិតណាស់ពាក្យសុំទោសរបស់ជននេះចំពោះខ្ញុំ គឺវាមិនមានតម្លៃអ្វីអាចផ្សះផ្សារអារម្មណ៍ឈឺចាប់របស់ខ្ញុំបានទេ បើផ្អែកទៅឥរិយាបទអ្នកក្លាហានក្រោមមេឃរបស់គេ»។
គួររំលឹកថា ៖ លោក ជី ដេវីដ ប្រកាសទុកពេល៨ម៉ោងឱ្យជនបង្កចេញមុខដោះស្រាយករណីគប់ទឹកកមកលើរូបលោក(វីដេអូ) ៕
ចែករំលែកព័តមាននេះ