តារាកំប្លែងនាយ តាក់ស៊ី ទាមទារអោយម្ចាស់ផលិតកម្មមួយរូប ចេញមុខសុំទោសរូបលោកជាសាធារណៈ បន្ទាប់ពីម្ចាស់ផលិតកម្មរូបនោះបានធ្វើរឿងមិនគប្បី ដោយប្រមា.ថអាយុជីវិតរបស់លោក
រាជធានីភ្នំពេញ ៖ តារាកំប្លែងនាយ តាក់ស៊ី ទាមទារអោយម្ចាស់ផលិតកម្មមួយរូប ចេញមុខសុំទោសរូបលោកជាសាធារណៈ បន្ទាប់ពីម្ចាស់ផលិតកម្មរូបនោះបានធ្វើរឿងមិនគប្បី ដោយប្រមា.ថអាយុជីវិតរបស់លោក។ តារាកំប្លែងរូបនេះ បានកើតទុក្ខមិនសុខចិត្ត ក្នុងពេលដែលផេកហ្វេសប៊ុករបស់ផលិតកម្ម «ភី» បានបង្ហោះរូបភាពលោក រួចអមជាមួយសំណេរថា «លោកបានទទួលមរណភាពហើយ» ក្នុងពេលរឿងរ៉ាវមួយនេះ ធ្វើអោយមហាជនមានការភាន់ច្រឡំ។
តាមរយៈវីអូដែលបាន Live តាមបណ្តាញសង្គម តារាកំប្លែងនាយ តាក់ ស៊ី និងភរិយា បានលើកឡើងថា «លោកពិតជាមិនសប្បាយនោះឡើយ ក្នុងពេលដែលបានឃើញម្ចាស់ផលិតកម្ម «ភី» បានបង្ហោះសារថា លោកបានទទួលមរណភាព»។
លោកបញ្ជាក់ថា «ផេកហ្វេសប៊ុកផលិតកម្ម «ភី» បានបង្ហោះរឿងនេះចំនួន២លើក ដែលធ្វើអោយមហាជនមានការភាន់ច្រឡំ ដ្បិតលោកមិនទាន់មានរឿងអ្វីកើតឡើងនោះឡើយ»។ នាយ តាក់ស៊ី បន្ថែមថា «លោកពិតជាមិនយល់ ដើម្បីបានការ like និង veiw ហើយបានផលប្រយោជន៍ទៅខ្លួន ទើបម្ចាស់ផលិតកម្ម «ភី» ហ៊ានធ្វើរឿងនេះឡើង»។
លោកបន្តថា «កន្លងមក លោកក៏ធ្លាប់ឃើញរឿងបែបនេះបានកើតឡើងចំពោះតារាជើងចាស់លោក ព្រហ្ម ម៉ាញ ដូចគ្នា ក្នុងពេលដែលលោក ព្រហ្ម ម៉ាញ ឈឺចូលសម្រាកនៅមន្ទីរពេទ្យ»។ លោកថា «នៅពេលនេះរឿងដូចគ្នានឹងក៏បានកើតឡើងចំពោះរូបលោកម្តង ដែលធ្វើអោយមហាជនមានការភាន់ច្រឡំ»។
យ៉ាងណាបើតាមនាយ តាក់ស៊ី ថា «ដំបូងលោកមិនចង់ចេញមុខបកស្រាយចំពោះរឿងនេះនាំអោយមានរឿងវែងឆ្ងាយឡើយ ព្រោះលោកជាមនុស្សដែលសន្សំសុខ ប៉ុន្តែដោយសារផេកផលិតកម្មនេះ បានធ្វើរឿងនេះ២ដង ដែលនោះនាំអោយលោកមិនអាចអង្គុយនៅស្ងៀម និងមិនចេញមុខបកស្រាយនោះឡើយ ខណៈពេលដែលលោកក៏មិនចង់អោយមានរឿងភាន់ច្រឡំនោះឡើយ»។
លោកបញ្ជាក់ថា «ដើម្បីកុំអោយមានរឿងវែងឆ្ងាយ និងភាន់ច្រឡំ លោកបានទាមទារអោយម្ចាស់ផលិតកម្ម «ភី» ចេញមុខសុំទោសលោកជាសាធារណៈ បើទោះបីជាការផុសថា លោកទទួលមរណភាពពីផេកផលិតកម្មខាងលើ ត្រូវបានលុបចេញហើយក៏ដោយ»។
យ៉ាងណា ក្រោយមានប្រតិកម្មពីនាយ តាក់ស៊ី ខាងលើនេះ ម្ចាស់ផលិតកម្ម «ភី» ក៏បានចេញមុខបកស្រាយថា «អ្វីដែលបានបង្ហោះនោះ គឺជាការសរសេរខុសលក្ខណៈបច្ចេកទេសតែប៉ុណ្ណោះ ពោលគឺលោកចង់សរសេរចូលរួមរំលែកទុក្ខម្តាយនាយ តាក់ស៊ី ដែលទទួលមរណភាព ប៉ុន្តែពេលបង្ហោះក៏បាត់ពាក្យម្តាយ ទើបមានការភាន់ច្រឡំកើតឡើង»។
លោកបញ្ជាក់ថា «រហូតមកទល់នាពេលនេះ លោកមិនមានចេតនាអាក្រក់ ឬកេងចំណេញទទួលផលប្រយោជន៍ពីនាយ តាក់ស៊ីនោះឡើយ ហើយក្រុមការងាររបស់លោកក៏ធ្លាប់រួមការងារជាមួយតារាកំប្លែងរូបនេះកន្លងមកដែរ»។
បន្ថែមពីលើនេះផេកហ្វេសប៊ុកផ្លូវការរបស់ផលិតកម្ម «ភី» ក៏បានបញ្ចេញសារបង្ហោះបកស្រាយដែរថា «យើងខ្ញុំ ជាអ្នកសិល្បៈរួមអាជីព ផុសសារជួយរំលែកទុក្ខគ្រួសារបង បែរជាមានកំហុស? ខ្ញុំបានសរសេខុស ព្រោះទូរស័ព្ចលោ.តហ្វុងអក្សរ តែខុសភ្លាមបានកែភ្លាមៗ រួចរាល់នៅពេលនោះទៅហើយ ម៉េចបានទៅជាមានការយល់ច្រឡំខុសបែបនេះ? ។ ខ្ញុំបាទ ជាម្ចាស់ផេក ផលិតកម្ម «ភី» សុំបកស្រាយរឿងសរសេរខុសពីថ្ងៃនោះ តែក៏បានកែភ្លាមៗ ពេលដឹងថា សរសេរខុស តែអ្នកមើលហើយស្គ្រីនភ្លាម មានបំណងចោ.ទប្រកាន់បំណងល្អពួកយើងខ្ញុំ»។
ផេកហ្វេសប៊ុកផ្លូវការរបស់ផលិតកម្ម «ភី» បន្តទៀតថា «តាមពិតទៅ ក្នុងនាមខ្ញុំជាអ្នកសិល្បៈរួមអាជីព ពេលបានដឹងដំណឹងអ្នកសិល្បៈដូចគ្នាមានទុក្ខ ពួកយើងតែងតែព្យាយាមជួយទៅតាមអ្វីដែលអាចធ្វើទៅបានតែប៉ុណ្ណោះ មិនមានបំណងអាក្រក់ណាមួយនោះទេ សូមពុកម៉ែបងប្អូន យោគយល់ និងអព្យាស្រ័យដល់ពួកយើងខ្ញុំផង និងជាពិសេសេ សូមការអធ្យាស្រ័យ ពីបង នាយ តាក់ស៊ី ផង សូមបងកុំមានការយល់ច្រឡំ»៕
ចែករំលែកព័តមាននេះ