រាជធានីភ្នំពេញ ៖ បន្ទាប់ពីឆ្លងកាត់នីតិវិធីនៃការដាក់ពាក្យសុំក្លាយជាសមាជិកដែលមានរយៈពេលយូរ និងល្អិតល្អន់ សមាជិកភាពរបស់សមាគមផ្តៅកម្ពុជាត្រូវបានទទួលការឯកភាពនាពេលកន្លងទៅនេះ ដោយក្រុមប្រឹក្សាភិបាលនៃអង្គការសមធម៌ ពាណិជ្ជកម្មពិភពលោក (WFTO) ។ ក្នុងន័យនេះសមាគមផ្តៅកម្ពុជាបានក្លាយជាសមាជិក
រាជធានីភ្នំពេញ ៖ បន្ទាប់ពីឆ្លងកាត់នីតិវិធីនៃការដាក់ពាក្យសុំក្លាយជាសមាជិកដែលមានរយៈពេលយូរ និងល្អិតល្អន់ សមាជិកភាពរបស់សមាគមផ្តៅកម្ពុជាត្រូវបានទទួលការឯកភាពនាពេលកន្លងទៅនេះ ដោយក្រុមប្រឹក្សាភិបាលនៃអង្គការសមធម៌ ពាណិជ្ជកម្មពិភពលោក (WFTO) ។ ក្នុងន័យនេះសមាគមផ្តៅកម្ពុជាបានក្លាយជាសមាជិកនៃសមាគមសមធម៌ពាណិជ្ជកម្មសាកលមួយ ដែលធ្វើការលើខ្សែសង្វាក់សមធម៌ពាណិជ្ជកម្មទាំងមូល ពោលគឺចាប់ពីផលិតកម្មរហូតដល់ការលក់ ។ ការក្លាយជាសមាជិកនៃអង្គ ការសមធម៌ពាណិជ្ជកម្មសាកលមួយនេះ គឺការគាំទ្រដល់ការផ្សព្វផ្សាយផលិតផលផ្តៅកម្ពុជាដែលមានលក្ខណៈនិរន្តរភាព និងប្រកបដោយគុណភាពស្តង់ដានៅក្នុងទីផ្សារអន្តរជាតិ ។
ក្នុងនាមជាសមាជិកបណ្តោះអាសន្នក្នុងដំណាក់កាលនេះ សមាគមផ្តៅកម្ពុជាចូលរួមជាមួយសមាជិកដទៃទៀតចំនួនប្រមាណ៤០០ មកពី៧១ប្រទេសជុំវិញពិភពលោក ក្នុងចលនាសមធម៌ពាណិជ្ជកម្ម ។ សមាជិកទាំងអស់សុទ្ធសឹងជាក្រុមអ្នកផលិតក្រុមសមាគម បណ្តុំក្រុមហ៊ុនទីផ្សារនាំចេញ នាំចូល បណ្តុំហាងទំនិញសមធម៌ពាណិជ្ជកម្ម បណ្តាញសមធម៌ពាណិជ្ជកម្មថ្នាក់មូលដ្ឋាន ថ្នាក់ជាតិ និងថ្នាក់តំបន់ ព្រមទាំងក្រុមស្ថាប័នហិរញ្ញវត្ថុផ្សេងៗទៀត ។
លោកលិប ជាង ប្រធានសមាគមផ្តៅកម្ពុជានិងជាម្ចាស់សិប្បកម្មផ្តៅធំជាងគេនៅក្នុងប្រទេសកម្ពុជា និយាយថា ការកសាងបណ្តាញ និងទំនាក់ ទំនងការងារនៅក្នុងទីផ្សារសាកលតាមរយៈអង្គការបណ្តាញអន្តរជាតិធំៗដូចជា អង្គការ WFTO នេះ មានសារសំខាន់ណាស់ ដោយហេតុថា វានឹងជួយផ្តល់ចំណេះដឹង និងចក្ខុវិស័យរបស់ផលិតករកម្ពុជាអំពីទីផ្សារសមធម៌ពាណិជ្ជកម្ម ព្រមទាំងអនុញ្ញាតឱ្យពួកគេទទួលបាននូវព័ត៌មានសំខាន់ៗស្តីពីការអភិវឌ្ឍន៍ទីផ្សារការផ្គត់ផ្គង់ និងតម្រូវការ។
លោកលិប ជាង បានបន្ថែមថា «ផលិតករផ្តៅកម្ពុជានៃសមាគមផ្តៅ មានសេចក្តីរីករាយនឹងដំណឹងល្អនេះ ពីព្រោះពួកគេនឹងអាចទទួលបាននូវប្រយោជន៍អំពីអង្គការបណ្តាញពាណិជ្ជដ៏ធំមួយនេះក្នុងការផ្សព្វផ្សាយផលិតផល ដែលពួកគេធ្វើបាន ព្រមទាំងកសាងទំនាក់ទំនងជាមួយអ្នកទិញនៅក្នុងទីផ្សារសាកល ជាឧទាហរណ៍ពួកគេអាចផ្តើមការផ្សារភ្ជាប់ទំនាក់ទំនងជាមួយសមាជិកនៃអង្គការ WFTO ដទៃទៀត ក៏ដូចជាជាមួយដៃគូពាណិជ្ជកម្មនានា តាមរយៈគេហទំព័ររបស់អង្គការ WFTO ព្រឹត្តិការណ៍ និងកិច្ចប្រជុំពាណិជ្ជកម្មផ្សេងៗទៀតដែលរៀបចំដោយអង្គការ WFTO»។
ក្រោមកិច្ចសហការជាមួយអង្គការ WWF ព្រមទាំងដៃគូជារាជរដ្ឋាភិបាល និងអង្គការមិនមែនរដ្ឋាភិបាលដទៃទៀតសមាគមផ្តៅកម្ពុជាកំពុងអនុវត្តគម្រោងផ្តៅប្រកបដោយនិរន្តរភាពដែលទទួលបានការឧបត្ថម្ភរួមគ្នាដោយ EU និង IKEA ។ គម្រោងនេះ មានគោលបំណងគ្រប់គ្រងតំបន់ព្រៃធម្មជាតិ ដែលកំពុងមានផ្តៅដុះលូតលាស់ និងលើកកម្ពស់បច្ចេកទេសកែច្នៃដែលគោរពគោលការណ៍បរិស្ថានស្អាត ពោលគឺផលិតកម្មស្អាត ។ ដើម្បីធ្វើកិច្ចការទាំងនេះ គេត្រូវលើកទឹកចិត្តដល់ការប្រើប្រាស់ឱ្យអស់លទ្ធភាពនូវវត្ថុធាតុដើម និងជម្រុញឱ្យខ្សែសង្វាក់ផលិតកម្មមានប្រសិទ្ធភាពដោយកាត់បន្ថយឱ្យអស់លទ្ធភាពនូវការខ្ចះខ្ចាយវត្ថុធាតុដើម ការប្រើសារធាតុគីមី និងការបញ្ចេញចោលនូវឧស្ម័ន ។ ការផ្សារភ្ជាប់ក្រុមសិប្បកម្មផ្តៅកម្ពុជាទៅនឹងទីផ្សារសាកលជាគោលបំណងសំខាន់មួយរបស់គម្រោងនេះ ។
លោកអ៊ូ រតនៈ ប្រធានគម្រោងផ្តៅរបស់អង្គការ WWF មានប្រសាសន៍ថា ផលិតករផ្តៅកម្ពុជាអាចប្រាប់អ្នកបញ្ជាទិញអំពីឆន្ទៈរបស់ពួកគេក្នុងការអនុវត្តប្រព័ន្ធ និងបច្ចេកទេសកែច្នៃផ្តៅដើម្បីការពារបរិស្ថាន ហើយពួកគេមានសមត្ថភាពក្នុងការកែច្នៃផលិតផលស្អាតជាមួយនឹងការរចនាម៉ូដប្លែកៗ ។
លោកបានបន្តថា «នេះជាឱកាសល្អមួយសម្រាប់សមាគមផ្តៅកម្ពុជា កសាងទំនាក់ទំនងរយៈពេលយូរជាមួយក្រុមអ្នកទិញ និងក្រុមពាណិជ្ជករដែលមានការទទួលខុសត្រូវដោយហេតុថា វានឹងផ្តល់នូវតម្លៃបន្ថែមទៅក្នុងខ្សែសង្វាក់ផលិតកម្មផ្តៅទាំងមូល ហើយកត្តានេះ នឹងលើកទឹកចិត្តក្រុមសហគមន៍មូលដ្ឋានឱ្យការពារតំបន់ព្រៃធម្មជាតិ និងជីវចម្រុះ ព្រមទាំងរួមចំណែកពង្រឹងការអភិវឌ្ឍន៍វិស័យឧស្សាហកម្មផ្តៅនៅកម្ពុជា» ។
លោកម៉ែន ស៊ីនឿន នាយកប្រតិបត្តិនៃមជ្ឈមណ្ឌលសិប្បករកម្ពុជា ដែលជាអ្នកជួយជ្រោមជ្រែងសមាគមផ្តៅក្នុងនីតិវិធីនៃការដាក់ពាក្យសុំក្លាយជាសមាជិក និយាយថា វាមិនមែនជារឿងងាយស្រួលទេ ដើម្បីក្លាយទៅជាសមាជិកនៃអង្គការ WFTO ហើយថា ស្ថាប័នដែលដាក់ពាក្យសុំត្រូវបំពេញតាមលក្ខខណ្ឌតម្រូវសម្រាប់សមាជិកភាព ។ ឧទាហរណ៍សិប្បកម្មកែច្នៃត្រូវគោរពគោលការណ៍លក្ខខណ្ឌការងារល្អ ពោលគឺកន្លែងធ្វើការមានអនាម័យ បរិស្ថានជុំវិញល្អ មានសុវត្ថិភាព សម្រាប់កម្មករ និងមានការរៀបចំទុកដាក់សម្ភារ និងវត្ថុធាតុដើមប្រកបដោយសណ្តាប់ធ្នាប់ល្អ។
ក្រោយពេលបញ្ចប់ភាពជាសមាជិកបណ្តោះអាសន្នរយៈពេល២ឆ្នាំ សមាគមផ្តៅកម្ពុជានឹងត្រូវធ្វើការវាយតម្លៃផ្ទាល់ខ្លួនមួយ ដោយធៀបទៅនឹងលក្ខខណ្ឌស្តង់ដានៃអង្គការសមធម៌ពាណិជ្ជកម្មដើម្បីក្លាយខ្លួនជាសមាជិកពេញសិទ្ធិនៃអង្គការបណ្តាញពាណិជ្ជកម្មនេះ៕
ចែករំលែកព័តមាននេះ