តារាសម្តែង ព្រំ រដ្ឋា ទទួលស្គាល់រឿងជំពាក់បំណុលតួ តែបដិសេធរឿងគេចវេសមិនសង(វីដេអូ)
- ភ្នំពេញ
នៅទីបំផុត តារាសម្តែង និងជាចាងហ្វាងផលិតកម្ម អ្នកនាង ព្រំ រដ្ឋា បានចេញមុខទទួលស្គាល់ថា
រាជធានីភ្នំពេញ ៖ នៅទីបំផុត តារាសម្តែង និងជាចាងហ្វាងផលិតកម្ម PR Production អ្នកនាង ព្រំ រដ្ឋា បានចេញមុខទទួលស្គាល់ថា នាងពិតជានៅជំពាក់លុយតួសម្តែងពិតប្រាកដមែន ប៉ុន្តែនាងបដិសេធពីការចោទប្រកាន់រឿងគេចវេសមិនទទួលខុសត្រូវលើការសង។
ការចេញមុខអះអាងខាងលើពីអ្នកនាង ព្រំ រដ្ឋា នាពេលនេះ បានធ្វើឡើង បន្ទាប់ពីអ្នកនាងបានចាកចេញពីប្រទេសកម្ពុជា ទៅរស់នៅសហរដ្ឋអាមេរិក ដែលចំណុចនេះ ត្រូវបានគេចាត់ទុកថា អ្នកនាងទំនងជាចង់គេចវេសពីការទទួលខុសត្រូវលើកូនបំណុលជាច្រើនដែលអ្នកនាងបានជំពាក់។
យ៉ាងណាម៉ិញ អ្នកនាង ព្រំ រដ្ឋា បានចេញមុខបញ្ជាក់យ៉ាងច្បាស់ថា «រហូតមកទល់នាពេលនេះ នាងមិនមានបំណងគេចវេសពីរឿងខាងលើនេះឡើយ ហើយកាលដែលនាងមករស់នៅអាមេរិកមួយរយៈនេះ គឺដោយសារនាងមានបញ្ហាត្រូវដោះស្រាយ ជាពិសេសគឺមកធ្វើការរកលុយ និងមើលថែកូនដែលកំពុងរស់នៅទីនេះ»។
តាមរយៈវីដេអូដែលបានបង្ហោះតាមបណ្តាញសង្គម អ្នកនាង ព្រំ រដ្ឋា បានលើកឡើងថា «នាងទទួលស្គាល់ នាងពិតជានៅខ្វះលុយតួ ហើយតួសម្តែងមួយចំនួនក៏បានយល់ច្បាស់អំពីនាងដែរ ក្នុងពេលដែលនាងពិតជាអរគុណដល់បណ្តាតួមួយចំនួនដែលបានលះបង់សម្រាប់ធ្វើការងារជាមួយនាងអំឡុងពេលកូវីដ»។
នាងបញ្ជាក់ថា «នាងពិតជាអរគុណដល់បណ្តាតួមួយចំនួនដែលបានទុកឱកាសម្រាប់អោយនាងដោះស្រាយចំពោះរឿងបំណុលមួយនេះ ខណៈពេលដែលនាងមិនបានគេចវេសនោះឡើយ»។ អ្នកនាងថា «ខ្ញុំរស់នៅក្នុងសង្គមនេះអស់រយៈពេលជាច្រើនឆ្នាំមកហើយ ហើយខ្ញុំក៏យល់ពីច្បាប់ទម្លាប់នៅក្នុងសង្គមដែរ ចឹងខ្ញុំមិនមែនជាមនុស្សដែលគេចវេសនោះទេ។ ធម្មតាខ្ញុំមិនឆ្លើយតប មិនមែនខ្ញុំមិនទទួលខុសត្រូវនោះឡើយ ហើយកន្លងមក រឿងរ៉ាវដែលបានចុះផ្សាយនោះ គឺចេញពីបុគ្គលតែប៉ុណ្ណោះ»។
អ្នកនាង ព្រំ រដ្ឋា បាននលើកឡើងបន្ថែមថា «កន្លងមក អ្នកនាងក៏បានដោះស្រាយបំណុលប្រមាណ៦០%ផងដែរ ទៅអោយតារាសម្តែងមួយរូបដែលនាងបានជំពាក់ នៅពេលដែលនាងមានរឿងថតឡើងវិញ»។ អ្នកនាងបញ្ជាក់ថា «សម្រាប់រឿងបំណុល គឺអ្នកនាងដឹងពីលទ្ធភាពខ្លួនឯងសម្រាប់ដោះស្រាយ ព្រោះនាងមិនមែនលេងតុងទីនជំពាក់គេរាប់លានដុល្លារនោះឡើយ ហើយបំណុលនាងត្រឹមម៉ឺនដុល្លារប៉ុណ្ណោះ»។ នាងបន្តថា «ប្រសិននៅសម័យដែលនាងធ្វើការនោះ គឺនាងចំណាយពេលត្រឹម២ខែទេ នឹងអាចដោះស្រាយបំណុលនេះបានហើយ»។
យ៉ាងណា បើតាមអ្នកនាង ព្រំ រដ្ឋា ថា «កន្លងមក នាងមិនដែលខ្វល់ចំពោះព័ត៌មានដែលបានចុះផ្សាយមិនល្អពីរូបនាងឡើយ ដោយនាងខ្វល់តែចំពោះមនុស្សដែលល្អ និងតែងតែផ្តល់កម្លាំងចិត្តដល់រូបនាងប៉ុណ្ណោះ»។ អ្នកនាង ព្រំ រដ្ឋា បានអះអាងបន្ថែមថា «នាងមករស់នៅទឹកដីអាមេរិកនេះ ដោយសារនាងត្រូវមានកាតព្វកិច្ចមើលបីបាច់ថែរក្សាកូនចៅ បើទោះបីពួកគាត់ខ្លះធំដឹងក្តីក៏ដោយ ប៉ុន្តែនាងត្រូវផ្តល់ភាពកក់ក្តៅសម្រាប់គាត់ដែរ។ មួយទៀត នាងត្រូវប្រឹងប្រែងធ្វើការ ដើម្បីរកប្រាក់ ហើយប្រសិនបើនាងគិតថា នាងបានរឹងមាំហើយនោះ នាងអាចនឹងវិលត្រឡប់ទៅកាន់ប្រទេសកម្ពុជាវិញនៅចុងឆ្នាំនេះ»។
អ្នកនាងបញ្ជាក់ថា «អំឡុងពេលនេះ បើទោះបីជានាងត្រូវខូចឈ្មោះក៏ដោយ ប៉ុន្តែនាងនៅតែប្រឈមមុខទទួលយករឿងនេះ ហើយនាងក៏មិនចុះចាញ់ចំពោះរឿងនេះដែរ ដោយសារនាងនឹងរឹងមាំ ហ៊ានដើរត្រឡប់មកវិញ ដើម្បីធ្វើកិច្ចការរបស់នាងតាមសមត្ថភាពដែលនាងមាននាពេលនេះ»។
គួររំលឹកផងដែរថា ៖ តារាសម្តែង ព្រំ រដ្ឋា ចេញទៅរស់នៅអាមេរិកវិញ ក្រោយផ្ទុះរឿងជំពាក់គេជុំទិស៕
ចែករំលែកព័តមាននេះ