តារាចម្រៀងនាង វ៉ាន់ នីឡា បានសម្តែងក្តីរំភើបយ៉ាងខ្លាំង បន្ទាប់ពីនាងបានសម្រេចក្តីស្រមៃក្លាយជាពិធីការិនីនៅក្នុងកម្មវិធីមួយ បន្ទាប់ពីប្រឡូកក្នុងសិល្បៈអស់រយៈពេលជាច្រើនឆ្នាំមកនេះ។ តារារូបនេះ ត្រូវបានជ្រើសរើសជាពីធីការិនីនៅក្នុងកម្មវិធី
រាជធានីភ្នំពេញ ៖ តារាចម្រៀងនាង វ៉ាន់ នីឡា បានសម្តែងក្តីរំភើបយ៉ាងខ្លាំង បន្ទាប់ពីនាងបានសម្រេចក្តីស្រមៃក្លាយជាពិធីការិនីនៅក្នុងកម្មវិធីមួយ បន្ទាប់ពីប្រឡូកក្នុងសិល្បៈអស់រយៈពេលជាច្រើនឆ្នាំមកនេះ។ តារារូបនេះ ត្រូវបានជ្រើសរើសជាពីធីការិនីនៅក្នុងកម្មវិធី «The Rapper Cambodia» ដែលជាកម្មវិធីប្រឡងចម្រៀងបែបរ៉េបដ៏ល្បីមួយ នឹងមានផ្សាយលើកញ្ចក់ទូរទស្សន៍បាយ័នផងដែរ។ តារាស្រីរូបនេះ បានចាត់ទុកឱកាសក្លាយជាពិធីការិនីជាលើកដំបូងនាពេលនេះ គឺជាការសម្រេចក្តីស្រមៃតាំងពីតូចរបស់ខ្លួន បន្ទាប់ក្លាយជាតារាចម្រៀងអាជីព។
ស្រីស្អាត វ៉ាន់ នីឡា បានបង្ហាញក្តីរំភើបតាមរយៈសារដែលបានបង្ហោះលើបណ្តាញសង្គមថា «អារម្មណ៍មួយនេះ មិនដឹងត្រូវរៀបរាប់ចាប់ពីកន្លែងណា។ ទីបំផុតបំណងប្រាថ្នារបស់ខ្ញុំ តាំងពីតូចគឺបានសំរេចហើយ អាជីពជាពិធីការិនី គឺជាអ្វីដែលខ្ញុំស្រលាញ់ខ្លាំង បន្ទាប់ពីបំណងជាតារាចម្រៀង។ នាងខ្ញុំសូមយកឱកាសនេះ អរគុណទៅដល់ផលិតកម្ម បារមី Baramey Production ដែលបានផ្តល់ឱកាសមួយនេះមកកាន់នាងខ្ញុំ។ វាជារឿងដ៏អស្ចារ្យមួយដែលកើតឡើងដោយមិននឹកស្មានដល់ នាងខ្ញុំនឹងប្រឹងប្រែងអោយអស់ពីសមត្ថភាព»។
ទោះជាយ៉ាងណា គេរំពឹងថា ស្រីស្អាត វ៉ាន់ នីឡា នឹងធ្វើបានល្អសម្រាប់ការបង្ហាញវត្តមានជាពិធីការិនីជាលើកដំបូងរបស់នាង នៅក្នុងកម្មវិធីដ៏ធំនាពេលនេះ។
គួបញ្ជាក់ផងដែរថា កម្មវិធី «The Rapper Cambodia» បានរៀបចំឡើងដោយផលិតកម្ម Boramey ដោយមានការចូលរួមពីតារារ៉េបល្បីៗនៅកម្ពុជា ជាពិសេសតារាចម្រៀង វណ្ណដា ធ្វើជាគណៈកម្មការដាក់ពិន្ទុផងដែរ។ «The Rapper Cambodia» គឺជាកម្មវិធីប្រឡងរ៉េបដ៏ពេញនិយមដែលមានប្រភពមកពីប្រទេសថៃ ហើយក៏ត្រូវបានប្រទេសវៀតណាម ទិញសិទ្ធិផលិតកម្មវិធីក្រោមឈ្មោះ Rap Viet ផងដែរ។
កម្មវិធី «The Rapper» របស់ថៃ និងវៀតណាម ទទួលបានការគាំទ្រជាខ្លាំង ហើយត្រូវបានចាត់ទុកថា ជាកម្មវិធីប្រឡងរ៉េបលេខ១ ឈានមុខគេនៅក្នុងប្រទេសរៀងៗខ្លួន។ ការប្រកួតប្រជែងនេះ គឺផ្តោតលើការស្វែងរកបេក្ខជនដែលមានទេពកោសល្យជំនាន់ថ្មីរបស់ប្រទេសកម្ពុជា និងជួយជ្រោមជ្រែងឱ្យពួកគេបានឡើងលើវេទិកា ដើម្បីបង្ហាញពីជំនាញរបស់ពួកគេនៅក្នុងតន្ត្រី លក្ខណៈផ្ទាល់ខ្លួន ក៏ដូចជាលំហូរនៃការរ៉េបទៅតាមភ្លេង និងការលេងពាក្យជាដើម។
ដើម្បីចូលរួមប្រកួតប្រជែង បេក្ខជនត្រូវតែមានអាយុលើសពី១៨ឆ្នាំ ហើយត្រូវតែបង្ហាញទេពកោសល្យរ៉េបកម្រិតខ្ពស់ជាបន្តបន្ទាប់ ដើម្បីធ្វើឱ្យគណៈកម្មការ ដែលក្នុងនោះមានអ្នកផលិត (Producers) និងទស្សនិកជនចាប់អារម្មណ៍។ ចំណែកអ្នកឈ្នះក្នុងការប្រកួត នឹងឈ្នះទឹកប្រាក់ 40,000,000 រៀលខ្មែរ (10,000 ដុល្លារអាមេរិក) ព្រមទាំងអាចចាប់ផ្តើមអាជីពរ៉េបរបស់ពួកគេជាមួយនឹងការសម្តែងផ្សេងៗ និងឱកាសជាច្រើនទៀតផងដែរ៕
ចែករំលែកព័តមាននេះ