តារាសម្តែងនាង ស៊ឹម ស្រីនិច បានសម្រេចចិត្តបដិសេធមិនទទួលយកការសម្តែងរឿងប្រមាណជាង១០រឿងមកហើយ ដោយគិតចាប់ពីដើមឆ្នាំ២០២៣ រហូតមកទល់នាពេលបច្ចុប្បន្ននេះ។ ដោយតារាស្រីរាងតូចច្រឡឹករូបនេះ បញ្ជាក់ថា
រាជធានីភ្នំពេញ ៖ តារាសម្តែងនាង ស៊ឹម ស្រីនិច បានសម្រេចចិត្តបដិសេធមិនទទួលយកការសម្តែងរឿងប្រមាណជាង១០រឿងមកហើយ ដោយគិតចាប់ពីដើមឆ្នាំ២០២៣ រហូតមកទល់នាពេលបច្ចុប្បន្ននេះ។ ដោយតារាស្រីរាងតូចច្រឡឹករូបនេះ បញ្ជាក់ថា «នាងខកខានមិនទទួលយកការថតភាពយន្តចំនួន១៥រឿងហើយគិតមកទល់នាពេលនេះ ក្រោមហេតុផល នាងមិនមានពេលគ្រប់គ្រាន់»។
តារាសម្តែងស្រីស្អាត ស៊ឹម ស្រីនិច បានបង្ហោះសារនៅលើបណ្តាញសង្គម ដោយបញ្ជាក់ពីរឿងខាងលើនេះថា «សរុបទាំងថ្ងៃនេះទៀត គឺខកខានថតអស់១៥រឿងរាប់ពីដើមឆ្នាំរហូតមកដល់ខែនេះ»។ យ៉ាងណា នាងក៏បានធ្វើការសុំទោសដល់ផលិតករទាំងអស់ ដែលតែងតែផ្តល់ឱកាសមកកាន់រូបនាង និងនឹករលឹកដល់ការរួមការងារជាមួយគ្នា ហើយនឹងអ្នកដែលធ្លាប់រួមការងារជាមួយនាងផងដែរ។ នាងបញ្ជាក់ថា «នាងនឹងថតឡើងវិញ នៅពេលដែលនាងមានពេលវេលាច្រើនជាងនេះ »។
ទោះបីជាយ៉ាងណា មុនពេលខកខានមិនបានទទួលថតភាពយន្តជាង១០រឿងនេះ ស្រីស្អាត ស៊ឹម ស្រីនិច ទើបតែបញ្ចប់ការថតរឿង «ឈា.មបាប» កាលពីពេលថ្មីៗនេះ ខណៈពេលដែលនាងក៏បានចូលរួមសម្តែងភាពយន្តភាគខ្នាតធំរឿង «អប្សរាមហាអង្គរ» ដឹកនាំដោយលោក ហ្វៃ សំអាង ដែលគ្រោងនឹងចាក់ផ្សាយនៅលើកញ្ចក់ទូរទស្សន៍ហង្សមាសផងដែរ។
ជាការកត់សម្គាល់ តារាសម្តែងនាង ស៊ឹម ស្រីនិច ធ្លាប់បានបាត់មុខមួយរយៈពីអាជីពសិល្បៈអស់រយៈពេលប៉ុន្មានឆ្នាំចុងក្រោយនេះ បន្ទាប់ពីតារារូបនេះ ប្រឹងប្រែងសាងកេរ្តិ៍ឈ្មោះនៅលើវិថីអស់រយៈពេលប្រមាណជា៦ឆ្នាំទៅហើយ។ ហើយការបាត់វត្តមានរបស់ស្រីស្អាត ស៊ឹម ស្រីនិច នាពេលនេះ គឺកន្លងមក នាងក៏ធ្លាប់បង្ហាញការភ្ញាក់ផ្អើលសម្រាប់មហាជន ដោយនាងបានប្រកាសជាសាធារណៈពីការបញ្ចប់អាជីពសិល្បៈ។
ស្រីស្អាត ស៊ឹម ស្រីនិច បានបញ្ជាក់នៅលើបណ្តាញសង្គមកាលពីអំឡុងខែកក្កដា ឆ្នាំ២០២១ ថា «លាហើយជីវិតសិល្បៈ៦ឆ្នាំ នាងខ្ញុំទទួលបានការសើចសប្បាយ និងសំណើចជាច្រើន ហើយមេរៀនក៏រាប់មិនអស់ថែមទៀតផង។ អរគុណដល់បងៗអ្នកដឹកនាំ ក្រុមហ៊ុនផលិតកម្មទាំងអស់ ដែលធ្លាប់ផ្តល់ឱកាសនឹងស្នាមញញឹមដល់ក្មេងស្រីម្នាក់នេះ ឱ្យរៀនក្រោកឈរដើរ ដេក អង្គុយ បត់បែន គ្រប់ស្ថានការ និងកាលៈទេសៈទាំងអស់ ហើយជាចុងក្រោយក៏សុំទោសទៅដល់បងៗ ដែលប្អូនសុំអនុញ្ញាតមិនបានទទួលការងារថតវិញ ដោយសារប្អូនត្រូវបំពេញធុរកិច្ចដែលត្រូវបំពេញ មើលថែខ្លួនឯង និងការងារដែលគប្បីនឹងផ្អាក ក៏បញ្ចប់ពីជីវិតសិល្បៈមួយនេះ»។
ដោយឡែកកន្លងមក ពាក់ព័ន្ធនឹងការឈប់ពីសិល្បៈនេះ ស្រីស្អាត ស៊ឹម ស្រីនិច បានអះអាងថា ដោយសារតែនាងត្រូវមានស្វាមី ហើយនឹងត្រូវចាប់ផ្តើមនូវមុខរបរផ្សេង ហេតុនេះហើយនាងត្រូវបង្ខំចិត្តបញ្ចប់អាជីពសិល្បៈត្រឹមពេលនេះតែម្តង។
តារាសម្តែងក្នុងបទ «ទឹកភ្នែកសាប» បានបញ្ជាក់ថា នាងបានសម្រេចចិត្តជ្រើសរើសបុរសម្នាក់ធ្វើជាគូអនាគត បន្ទាប់ពីបានសិក្សាយល់ចិត្តគ្នាមួយរយៈមកនេះ»។ ដោយមិនបញ្ជាក់លម្អិតពីអត្តសញ្ញាណអនាគតស្វាមីឲ្យបានច្បាស់ តែនាងថា «អនាគតស្វាមីរបស់នាង គឺជាមនុស្សធម្មតាម្នាក់ និងមានវ័យមិនក្មេងឡើយ ហើយពួកនាងមិនបានរៀបចំពិធីមង្គលការធំដុំឡើយ ពោលគឺត្រឹមសែនព្រេងចាស់ទុំដឹងឮតែប៉ុណ្ណោះ ព្រោះភ័យខ្លាចពីការឆ្លងរាលដាលនៃជំងឺកូវីដ១៩»៕
ចែករំលែកព័តមាននេះ